ಲಂಡನ್: ತನ್ನನ್ನು ತಾನೇ ಮದುವೆಯಾಗುತ್ತಿರುವವರ ಸಂಖ್ಯೆ ದಿನದಿಂದ ದಿನಕ್ಕೆ ಹೆಚ್ಚಾಗುತ್ತಿದೆ. ಹೀಗೆ ಲಂಡನ್ನ ಮಹಿಳೆಯೊಬ್ಬಳು ತನ್ನನ್ನು ತಾನೇ ಮದುವೆಯಾಗಿದ್ದಾಳೆ. ಆದರೆ ಮಹಿಳೆಯ ಈ ನಿರ್ಧಾರದ ಹಿಂದೆ ಇದೆ ವಿಚಿತ್ರ ಕಾರಣ. ಬನ್ನಿ ಈಕೆ ಹೀಗೆ ಮಾಡಲು ಕಾರಣವೇನು ಎಂದು ತಿಳಿಯೋಣ...
ಲಂಡನ್ನ ನಿವಾಸಿಯಾಗಿರುವ ಸಾರಾ ವಿಲ್ಕಿನ್ಸನ್ ಎನ್ನುವ ಮಹಿಳೆಯೊಬ್ಬಳು ಸರಿಯಾದ ಜೀವನ ಸಂಗಾತಿಗಾಗಿ ವಯಸ್ಸು 42 ಕಾಯ್ದು ಬೇಸರಗೊಂಡಿದ್ದಳು. ಕೊನೆಗೆ ತನ್ನನ್ನು ತಾನೇ ಮದುವೆಯಾಗುವ ನಿರ್ಧಾರಕ್ಕೆ ಬಂದು ಸ್ನೇಹಿತರು ಹಾಗೂ ಕುಟುಂಬಸ್ಥರ ಸಮ್ಮಖದಲ್ಲಿ ವಿವಾಹವಾದಳು . ಈ ಮದುವೆಗಾಗಿ ರೂ. 10 ಲಕ್ಷ ಖರ್ಚು ಮಾಡಿ ಅದ್ಧೂರಿಯಾಗಿ ತನ್ನನ್ನು ತಾನೇ ವಿವಾಹವಾಗಿದ್ದಾಳೆ. ಸೆಪ್ಟೆಂಬರ್ 30 ರಂದು ನಡೆದ ಸಮಾರಂಭದಲ್ಲಿ ಸಾರಾಳ 40 ಆತ್ಮೀಯ ಕುಟುಂಬ ಮತ್ತು ಸ್ನೇಹಿತರು ಭಾಗವಹಿಸಿದ್ದರು.
ಗಮನ ಸೆಳೆದ ಮದುವೆ: ತನ್ನನ್ನು ತಾನೇ ಮದುವೆಯಾಗಬೇಕೆಂದು ನಿರ್ಧರಿಸಿದಾಗ ಸಾರಾ ನಿಶ್ಚಿತಾರ್ಥಕ್ಕಾಗಿ ಉಂಗುರ ಖರೀದಿಸಿದಳು. ನಂತರ ಮದುವೆಯ ತಯಾರಿ ನಡೆಸಿದಳು. ಬಿಳಿ ಗೌನ್ ಧರಿಸಿ ಸ್ಥಳಕ್ಕೆ ಬಂದು ಕೇಕ್ ಕಟ್ ಮಾಡಿದ್ದಾಳೆ. ಸಫೊಲ್ಕ್ನ ಫೆಲಿಕ್ಸ್ಸ್ಟೋವ್ನಲ್ಲಿರುವ ಹಾರ್ವೆಸ್ಟ್ ಹೌಸ್ನಲ್ಲಿ ತನ್ನ ಸ್ನೇಹಿತರೊಂದಿಗೆ ಮದುವೆ ಎನ್ನುವ ವಿಶೇಷ ದಿನವನ್ನು ಆಚರಿಸಿಕೊಂಡಳು.
ಸಾರಾಹ್ ಮಾತನಾಡಿ, ‘ತಾನು ಹೀಗೆ ಎಲ್ಲರ ಗಮನ ಸೆಳೆದು ಕೇಂದ್ರಬಿಂದುವಾಗಿರಲು ಈ ದಿನ ಅತ್ಯಂತ ಸೂಕ್ತ ಮತ್ತು ಸುಂದರವಾದ ದಿನ.ಈ ಸಮಾರಂಭವು ಅಧಿಕೃತ ವಿವಾಹವಾಗಿರಲಿಲ್ಲ, ಆದರೆ ನನ್ನ ಮದುವೆಯ ದಿನವಾಗಿತ್ತು. ನನ್ನ ಪಕ್ಕದಲ್ಲಿ ನನ್ನ ಸಂಗಾತಿ ಇರಲಿಲ್ಲ ನಿಜ. ಆದರೆ ನಾನ್ಯಾಕೆ ಮದುವೆಯ ಅವಕಾಶವನ್ನು ತಪ್ಪಿಸಿಕೊಳ್ಳಬೇಕು? ಅದಕ್ಕಾಗಿಯೆಂದೇ ಹಣವನ್ನು ಕೂಡಿಟ್ಟಿದ್ದೆ. ಯಾವುದಕ್ಕೆ ಕೂಡಿಟ್ಟಿದ್ದೆನೋ ಅದಕ್ಕಾಗಿ ಆ ಹಣ ವಿನಿಯೋಗಿಸಿದೆ’ ಎಂದಿದ್ದಾಳೆ.