ಹನೋಯಿ: ಬೈಕ್ ಮೇಲೆ ಕುಳಿತ ಇಬ್ಬರು ಸವಾರರು ಬೈಕ್ ಚಾಲನೆ ಮಾಡುತ್ತಾ ಸ್ನಾನ ಮಾಡಿದ ವಿಡಿಯೋ ಒಂದು ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆದ ಬೆನ್ನಲ್ಲೇ ಸವಾರರಿಬ್ಬರನ್ನು ಹಿಡಿದು ಪೊಲೀಸರು ದಂಡ ವಿಧಿಸಿರುವ ಘಟನೆ ದಕ್ಷಿಣ ವಿಯೆಟ್ನಾಂನಲ್ಲಿ ನಡೆದಿದೆ.
ಸದಾ ಬಿಜಿಯಾಗಿರುವ ರಸ್ತೆಯಲ್ಲಿಯೇ ಬೈಕ್ ಚಾಲನೆ ಮಾಡುತ್ತಾ ಸ್ನಾನ ಮಾಡಿರುವುದನ್ನು ಬೇರೆ ವಾಹನ ಸವಾರರು ಮೊಬೈಲ್ನಲ್ಲಿ ಸೆರೆಹಿಡಿದು ಸಾಮಾಜಿಕ ಜಾಲತಾಣದಲ್ಲಿ ಅಪ್ಲೋಡ್ ಮಾಡಿದ್ದಾರೆ.
ವಿಡಿಯೋದಲ್ಲಿ ಏನಿದೆ?: ಶಾರ್ಟ್ಸ್ ಧರಿಸಿ ಅರಬೆತ್ತಲೆ ಅವತಾರದಲ್ಲಿ ಬೈಕ್ ಚಾಲನೆ ಮಾಡುತ್ತಿರುವ ಸವಾರ ಹಾಗೂ ಹಿಂಬದಿ ಸವಾರನ ನಡುವೆ ಒಂದು ನೀರಿನ ಬಕೆಟ್ ಇದೆ. ಒಂದೇ ಕೈನಲ್ಲಿ ಬೈಕ್ ನಿರ್ವಹಣೆ ಮಾಡಿ ಇನ್ನೊಂದು ಕೈನಲ್ಲಿ ಸವಾರ ತಲೆ ಹಾಗೂ ಮುಖಕ್ಕೆ ಸೋಪು ಹಾಕಿಕೊಳ್ಳುತ್ತಾನೆ. ಹಿಂಬದಿ ಸವಾರನೂ ಕೂಡ ತಲೆ-ಮುಖಕ್ಕೆ ಸೋಪು ಹಾಕಿಕೊಂಡು ಸ್ನಾನ ಮಾಡುತ್ತಾ ಬೈಕ್ ಸವಾರಿ ಮಾಡುತ್ತಿರೋ ಸ್ನೇಹಿತನ ತಲೆಗೂ ನೀರು ಹಾಕುತ್ತಾನೆ. ಹೀಗೆ ದಾರಿಯುದ್ದಕ್ಕೂ ಸ್ನಾನ ಮಾಡಿಕೊಂಡು ಹೋಗಿದ್ದಾರೆ.
ಈ ವಿಡಿಯೋ ವೈರಲ್ ಆದ ಬೆನ್ನಲ್ಲೇ ಅನೇಕ ನೆಟ್ಟಿಗರು ಇದೊಂದು ಅಪಯಾಕಾರಿ ಸಾಹಸ ಎಂದು ಟೀಕಿಸಿದ್ದಾರೆ. ಬಳಿಕ ವಿಡಿಯೋ ಪೊಲೀಸ್ ಗಮನಕ್ಕೆ ಬಂದು ಬೈಕ್ ನಂಬರ್ ಸಹಾಯದಿಂದ ಕಳೆದ ಬುಧವಾರ ಸವಾರರಿಬ್ಬರನ್ನು ಪತ್ತೆ ಹಚ್ಚಿದ್ದಾರೆ. ಬಳಿಕ ಹೆಲ್ಮೆಟ್, ಡ್ರೈವಿಂಗ್ ಲೈಸೆನ್ಸ್, ಮಿರರ್ ಮತ್ತು ಸಿವಿಲ್ ಇನ್ಶೂರೆನ್ಸ್ ಪ್ರಮಾಣ ಪತ್ರವಿಲ್ಲದೆ ಚಾಲನೆ ಮಾಡಿದ್ದಕ್ಕೆ 5,500 ರೂ. ದಂಡ ವಿಧಿಸಿದ್ದಾರೆ. ಚಾಲಕನನ್ನು ಹುಯಿನ್ಹ್ ತನ್ ಖಾನ್ಹ್ ಎಂದು ಗುರುತಿಸಲಾಗಿದೆ. (ಏಜೆನ್ಸೀಸ್)