ಕೊಚ್ಚಿ: ಗೂಗಲ್ ಮ್ಯಾಪ್ ನೆರವಿನೊಂದಿಗೆ ಕಾರು ಚಲಾಯಿಸುವಾಗ ದಾರಿ ತಪ್ಪಿ ತುಂಬಿ ಹರಿಯುವ ನದಿಗೆ ಬಿದ್ದ ಪರಿಣಾಮ ಕಾರಿನಲ್ಲಿದ್ದ ಐವರಲ್ಲಿ ಯುವ ವೈದ್ಯರಿಬ್ಬರು ದುರಂತ ಸಾವಿಗೀಡಾಗಿರುವ ಘಟನೆ ನಿನ್ನೆ ತಡರಾತ್ರಿ ಎರ್ನಾಕುಲಂ ಗೋತುರುತ್ ಕಡಲ್ವತುರುತ್ ಎಂಬಲ್ಲಿ ನಡೆದಿದೆ.
ಘಟನೆಯಲ್ಲಿ ಮೂವರನ್ನು ಸ್ಥಳೀಯರು ರಕ್ಷಣೆ ಮಾಡಿದ್ದಾರೆ. ಮೃತರನ್ನು ಅದ್ವೈತ್ ಮತ್ತು ಅಜ್ಮಾಲ್ ಎಂದು ಗುರುತಿಸಲಾಗಿದೆ. ಇವರು ಕೊಡುಂಗಲ್ಲೂರಿನ ಖಾಸಗಿ ಆಸ್ಪತ್ರೆಯೊಂದರಲ್ಲಿ ವೈದ್ಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದರು. ಓರ್ವ ಮೆಡಿಕಲ್ ವಿದ್ಯಾರ್ಥಿ ಹಾಗೂ ನರ್ಸ್ ಸೇರಿದಂತೆ ಮೂವರನ್ನು ರಕ್ಷಿಸಿ, ಸ್ಥಳೀಯ ಆಸ್ಪತ್ರೆಗೆ ದಾಖಲಿಸಲಾಗಿದ್ದು, ಮೂವರ ಆರೋಗ್ಯ ಸ್ಥಿರವಾಗಿದೆ ಎಂದು ತಿಳಿದುಬಂದಿದೆ.
ಕೊಚ್ಚಿಯಲ್ಲಿ ಪಾರ್ಟಿ ಮುಗಿಸಿ ಹಿಂತಿರುಗುತ್ತಿದ್ದಾಗ ಈ ಘಟನೆ ನಡೆದಿದೆ. ಕಾರಿನಲ್ಲಿದ್ದವರಿಗೆ ಮಾರ್ಗದ ಪರಿಚಯವಿಲ್ಲದ ಕಾರಣ, ಗೂಗಲ್ ಮ್ಯಾಪ್ಗಳನ್ನು ಬಳಸಿಕೊಂಡು ಅದರ ನಿರ್ದೇಶನಗಳನ್ನು ಅನುಸರಿಸುತ್ತಿದ್ದರು. ಕಾರನ್ನು ಅತ್ಯಂತ ವೇಗವಾಗಿ ಓಡಿಸಲಾಗುತ್ತಿತ್ತು. ಈ ವೇಳೆ ನದಿ ಎದುರಾದ ಕಾರಣ ತಕ್ಷಣ ನಿಯಂತ್ರಣಕ್ಕೆ ಬಾರದೆ ಕಾರು ನದಿಯ ಒಳಗೆ ಬಿದ್ದಿತು. ಸ್ಥಳೀಯರು ಧಾವಿಸಿ ಬರುವಷ್ಟರಲ್ಲಿ ಕಾರು ನದಿಯಲ್ಲಿ ಮುಳುಗಿತ್ತು. ಅಲ್ಲದೆ, ಇದೇ ವೇಳೆ ಜೋರಾದ ಪ್ರವಾಹವೂ ಇತ್ತು. ಪ್ರತಿಕೂಲ ಪರಿಸ್ಥಿತಿಯನ್ನು ನಿರ್ಲಕ್ಷಿಸಿ, ಸ್ಥಳೀಯರು ಮತ್ತು ಅಗ್ನಿಶಾಮಕ ದಳ ತಕ್ಷಣ ರಕ್ಷಣಾ ಕಾರ್ಯಾಚರಣೆಯನ್ನು ಪ್ರಾರಂಭಿಸಿತು ಆದರೆ ಇಬ್ಬರನ್ನು ರಕ್ಷಿಸಲು ಸಾಧ್ಯವಾಗಲಿಲ್ಲ.
ಗೂಗಲ್ ಮ್ಯಾಪ್ನ ನಿರ್ದೇಶನಗಳನ್ನು ಅನುಸರಿಸಿ ಪ್ರಯಾಣಿಸುವಾಗ ಅನೇಕ ಜನರು ಇದೇ ರೀತಿ ಅಪಘಾತಕ್ಕೆ ಒಳಗಾಗುತ್ತಿದ್ದಾರೆ. ಗೂಗಲ್ ಮ್ಯಾಪ್ ಅನುಸರಿಸಿ ಕಾರಿನಲ್ಲಿ ತೆರಳುತ್ತಿದ್ದ ಆಂಧ್ರಪ್ರದೇಶದ ಮೂಲದ ಐವರು ದಿಕ್ಕು ತಪ್ಪಿ ಹೊಳೆಗೆ ಬಿದ್ದಿದ್ದರು. ಮೊನ್ನೆ ಕುಟ್ಟನಾಡಿನ ಪುಳಿಂಕುನ್ನು ಎಂಬಲ್ಲಿ ಈ ದುರ್ಘಟನೆ ನಡೆಯಿತು. ಮಂಕೊಂಬು ವಿಕಾಸ್ ಮಾರ್ಗ ರಸ್ತೆಯಿಂದ ಪುಳಿಂಕುನ್ನು ಸೇಂಟ್ ಮೇರಿಸ್ ಫೊರಾನೆ ಚರ್ಚ್ಗೆ ತೆರಳಿದ್ದರು. ಚರ್ಚ್ಗೆ ಹೋಗುವ ರಸ್ತೆಯ ಎದುರು ಬದಿಯಲ್ಲಿದ್ದ ಕಿರಿದಾದ ರಸ್ತೆಯಲ್ಲಿ ಸಾಗುತ್ತಿದ್ದಾಗ ತಿರುವಿನಲ್ಲಿ ಕಾರು ಹೊಳೆಗೆ ಬಿದ್ದಿತು. ಅಪಘಾತವನ್ನು ಕಂಡ ಸ್ಥಳೀಯರು ಐವರನ್ನೂ ರಕ್ಷಿಸಿದರು. (ಏಜೆನ್ಸೀಸ್)