ಶಾಂಘೈ: ಕೊರೊನಾ ವೈರಸ್ನಿಂದಾಗಿ ಬರುವ ರೋಗವನ್ನು ಮನುಷ್ಯನ ದೇಹದಲ್ಲಿರುವ ಪ್ಲಾಸ್ಮಾದಿಂದ ಬಹುಬೇಗ ಗುಣಪಡಿಸಬಹುದು. ಇದೀಗ ಚೀನಾದಲ್ಲಿ ಕೊರೊನಾ ರೋಗಕ್ಕೆ ಚಿಕಿತ್ಸೆ ಪಡೆದು ಗುಣಮುಖರಾಗಿರುವ ಜನರು ಇತರೆ ರೋಗಿಗಳಿಗೆ ತಮ್ಮ ಪ್ಲಾಸ್ಮಾವನ್ನು ದಾನ ಮಾಡಲು ಮುಂದಾಗಿದ್ದಾರೆ.
ವುಹಾನ್ನಲ್ಲಿ ಕೊರೊನಾಕ್ಕೆ ಚಿಕಿತ್ಸೆ ಪಡೆಯುತ್ತಿರುವ ರೋಗಿಗಳಿಗೆ ಈಗಾಗಲೇ ಗುಣಮುಖರಾಗಿರುವ ರೋಗಿಗಳು ತಮ್ಮ ದೇಹದ ಪ್ಲಾಸ್ಮಾವನ್ನು ದಾನ ಮಾಡುವುದಾಗಿ ತಿಳಿಸಿದ್ದಾರೆ. ತಮಗೆ ಚಿಕಿತ್ಸೆ ನೀಡಲಾಗುತ್ತಿದ್ದ ಸಂದರ್ಭದಲ್ಲಿ ಆಸ್ಪತ್ರೆಯ ಸಿಬ್ಬಂದಿಯ ಪ್ಲಾಸ್ಮಾದಿಂದ ಈ ರೋಗ ಬೇಗ ಗುಣವಾಗುತ್ತದೆ ಎಂದು ತಿಳಿದುಕೊಂಡಿದ್ದು ಅದಕ್ಕಾಗಿಯೇ ತಾವು ಪ್ಲಾಸ್ಮಾ ದಾನ ಮಾಡುವ ನಿರ್ಧಾರ ಮಾಡಿರುವುದಾಗಿ ಅವರು ತಿಳಿಸಿದ್ದಾರೆ. ಸುಮಾರು 20 ಜನರು ಪ್ಲಾಸ್ಮಾ ದಾನಕ್ಕೆ ಮುಂದಾಗಿ ಬಂದಿದ್ದಾರೆ ಎನ್ನಲಾಗಿದೆ.
ಕೊರೊನಾ ಪೀಡಿತರಿಗೆ ಮನುಷ್ಯನ ದೇಹದ ಪ್ಲಾಸ್ಮಾ ಬಳಸಿಕೊಂಡು ಚಿಕಿತ್ಸೆ ನೀಡಲಾಗುತ್ತದೆ. ಈ ಚಿಕಿತ್ಸೆಯಿಂದಾಗಿ ರೋಗಿಯ ದೇಹದಲ್ಲಿ 12ರಿಂದ 24 ಗಂಟೆಗಳಲ್ಲಿ ವೈರಸ್ ಪ್ರಮಾಣ ಕಡಿಮೆಯಾಗಿ ಅವರು ಗುಣಮುಖರಾಗುತ್ತಾರೆ ಎನ್ನಲಾಗಿದೆ.
ಶನಿವಾರದಂದು ಶಾಂಘೈನಲ್ಲಿ ಕೊರೊನಾ ಪೀಡಿತರಿಗೆ ಚಿಕಿತ್ಸೆ ನೀಡುತ್ತಿರುವ ಆಸ್ಪತ್ರೆಯಿಂದ 124 ಜನರು ಗುಣಮುಖರಾಗಿ ತಮ್ಮ ಮನೆಯತ್ತ ತೆರಳಿದ್ದಾರೆ. ಈ ಪೈಕಿ 20 ಜನರು ಆಸ್ಪತ್ರೆಯಿಂದ ತೆರಳುವ ವೇಳೆ ಪ್ಲಾಸ್ಮಾ ದಾನ ಮಾಡುವುದಾಗಿ ತಿಳಿಸಿ ಹೋಗಿದ್ದಾರೆ. ಗುಣಮುಖರಾಗಿ 10 ದಿನಗಳ ನಂತರ ಅವರ ದೇಹದಿಂದ ಪ್ಲಾಸ್ಮಾ ದಾನ ತೆಗೆದುಕೊಳ್ಳಲಾಗುವುದು.
ಇದೇ ವೇಳೆ ವುಹಾನ್ನಲ್ಲಿ ಕೊರೊನಾ ರೋಗಿಗಳಿಗೆ ಚಿಕಿತ್ಸೆ ನೀಡಲಾಗುತ್ತಿರುವ ಜಿನಿಂಟನ್ ಆಸ್ಪತ್ರೆಯ ಮುಖ್ಯಸ್ಥ ಜಾಂಗ್ ಡಿಂಗ್ಯು , ಪ್ಲಾಸ್ಮಾ ದಾನ ಮಾಡುವಂತೆ ಜನಸಾಮಾನ್ಯರಲ್ಲಿ ಕೇಳಿಕೊಂಡಿದ್ದಾರೆ. (ಏಜೆನ್ಸೀಸ್)