ವಿಲ್ಮಿಂಗ್ಟನ್: ಮೆಟಾ ಸಿಇಒ ಮಾರ್ಕ್ ಜುಕರ್ಬರ್ಗ್ ಮತ್ತು ಕಂಪನಿಯ ಇತರ ಕೆಲವು ಅಧಿಕಾರಿಗಳ ವಿರುದ್ಧ 8 ಶತಕೋಟಿ ಡಾಲರ್ನ ಮೊಕದ್ದಮೆಯ ವಿಚಾರಣೆ ಆರಂಭವಾಗಿದೆ. 2018ರ ಕೇಂಬ್ರಿಡ್ಜ್ ಅನಲಿಟಿಕಾ ರಾಜಕೀಯ ಸಲಹಾ ಸಂಸ್ಥೆಗೆ ಸಂಬಂಧಿಸಿದ ಗೌಪ್ಯತೆ ಉಲ್ಲಂಘನೆ ಹಗರಣದಿಂದ ಉದ್ಭವಿಸಿದ ಆರೋಪಗಳನ್ನು ಒಳಗೊಂಡ ಪ್ರಕರಣ ಇದು.
ಫೇಸ್ಬುಕ್ ಬಳಕೆದಾರರ ವೈಯಕ್ತಿಕ ಮಾಹಿತಿಯನ್ನು ಕೇಂಬ್ರಿಡ್ಜ್ ಅನಲಿಟಿಕಾ ದುರುಪಯೋಗ ಮಾಡಿಕೊಳ್ಳುವ ಸಂಭವನೀಯ ಅಪಾಯಗಳನ್ನು ಮೆಟಾ ಮೊದಲೇ ಬಳಕೆದಾರರಿಗೆ ತಿಳಿಸಲಿಲ್ಲ ಎಂಬುದು ದೂರುದಾರರ ಆರೋಪ. ಈ ಸಂಸ್ಥೆ 2016ರಲ್ಲಿ ಡೊನಾಲ್ಡ್ ಟ್ರಂಪ್ರ ಅಧ್ಯಕ್ಷೀಯ ಚುನಾವಣಾ ಪ್ರಚಾರಕ್ಕೆ ಬೆಂಬಲ ನೀಡಿತ್ತು. ಬಳಕೆದಾರರ ವೈಯಕ್ತಿಕ ಮಾಹಿತಿಯನ್ನು ತನ್ನ ವಾಣಿಜ್ಯ ಪಾಲುದಾರರಿಗೆ ಮಾರಾಟ ಮಾಡಿದ ಆರೋಪವನ್ನು ಮೆಟಾ ಎದುರಿಸುತ್ತಿದೆ.
ಮೊದಲ ವಿಚಾರಣೆಯಲ್ಲಿ ವಾಷಿಂಗ್ಟನ್ ಯೂನಿವರ್ಸಿಟಿ ಲಾ ಸ್ಕೂಲ್ನ ಪೊ›ಫೆಸರ್, ಗೌಪ್ಯತೆ ತಜ್ಞ ನೀಲ್ ರಿಚರ್ಡ್ಸ್ ಷೇರುದಾರರ ಪರ ಸಾಕ್ಷ್ಯ ನೀಡಿದರು. ನಂತರ, 2018ರಿಂದ 2020ರವರೆಗೆ ಫೇಸ್ಬುಕ್ನಲ್ಲಿ ಸೇವೆ ಸಲ್ಲಿಸಿದ್ದ ಜೆಫ್ರಿ ಜಿಯೆಂಟ್ಸ್ ತಮ್ಮ ಹೇಳಿಕೆ ದಾಖಲಿಸಿದರು. ವಿಚಾರಣೆ ಇನ್ನೂ ಒಂದು ವಾರ ನಡೆಯುವ ನಿರೀಕ್ಷೆಯಿದೆ. ಜುಕರ್ಬರ್ಗ್ ಕೂಡ ಮುಂದಿನ ದಿನಗಳಲ್ಲಿ ಹೇಳಿಕೆ ನೀಡಬೇಕಾಗುತ್ತದೆ. ತೀರ್ಪು ಬರಲು ಇನ್ನೂ ಸಾಕಷ್ಟು ಸಮಯ ಹಿಡಿಯಲಿದೆ ಎಂದು ಹೇಳಲಾಗುತ್ತಿದೆ.