ನವದೆಹಲಿ: ಟ್ರಾವೆಲ್ ಬುಕಿಂಗ್ ಪ್ಲಾಟ್ಫಾರ್ಮ್ ಇಕ್ಸಿಗೋವನ್ನು ನಿರ್ವಹಿಸುವ ಲೆ ಟ್ರಾವೆನ್ಯೂಸ್ ಟೆಕ್ನಾಲಜಿ ಲಿಮಿಟೆಡ್ನ ಷೇರುಗಳು ಮಂಗಳವಾರ ರೂ 93ರ ಐಪಿಒ ಬೆಲೆಗಿಂತ ಶೇಕಡಾ 78ರಷ್ಟು ಪ್ರೀಮಿಯಂನೊಂದಿಗೆ ಏರಿಕೆ ಕಂಡವು. ಅಂದರೆ, ಷೇರು ಮಾರುಕಟ್ಟೆಯಲ್ಲಿ ಪಟ್ಟಿಯಾದ ಮೊದಲ ದಿನವೇ ಹೂಡಿಕೆದಾರರಿಗೆ ಶೇ. 78ರಷ್ಟು ಲಾಭವಾಯಿತು.
ಬಿಎಸ್ಇಯಲ್ಲಿ ಈ ಷೇರುಗಳು 135 ರೂ.ನಲ್ಲಿ ವಹಿವಾಟನ್ನು ಪ್ರಾರಂಭಿಸಿದವು. ಐಪಿಒ ವಿತರಣೆಯ ಬೆಲೆಗಿಂತ ಶೇ 45.16 ರಷ್ಟು ಏರಿಕೆಯಾದವು. ನಂತರ, ಶೇ. 74.18 ರಷ್ಟು ಏರಿಕೆ ಕಂಡು 161.99 ರೂ. ಮುಟ್ಟಿದವು.
ಎನ್ಎಸ್ಇಯಲ್ಲಿ ಆರಂಭದಲ್ಲಿ ಶೇ. 48.49ರಷ್ಟು ಏರಿಕೆಯಾಗಿ 138.10 ರೂ. ಮುಟ್ಟಿದವು. ನಂತರ ಶೇ. 78.19ರಷ್ಟು ಗಗನಕ್ಕೇರುವ ಮೂಲಕ 165.72 ರೂ.ಗೆ ತಲುಪಿದವು.
ಈ ಮೂಲಕ ಕಂಪನಿಯ ಮಾರುಕಟ್ಟೆ ಮೌಲ್ಯ 6,275.87 ಕೋಟಿ ರೂ. ಮುಟ್ಟಿತು. ವಹಿವಾಟಿನ ಪರಿಮಾಣದ ಪ್ರಕಾರ, ಕಂಪನಿಯ 76.43 ಲಕ್ಷ ಷೇರುಗಳು ಬಿಎಸ್ಇಯಲ್ಲಿ ಮತ್ತು 964.60 ಲಕ್ಷ ಷೇರುಗಳು ಎನ್ಎಸ್ಇಯಲ್ಲಿ ವಹಿವಾಟು ನಡೆಸಿದವು.
ಬೆಂಚ್ಮಾರ್ಕ್ ಈಕ್ವಿಟಿ ಸೂಚ್ಯಂಕಗಳು ಸೆನ್ಸೆಕ್ಸ್ ಮತ್ತು ನಿಫ್ಟಿ ಮಂಗಳವಾರದಂದು ಜೀವಮಾನದ ಗರಿಷ್ಠ ಮಟ್ಟವನ್ನು ತಲುಪಲು ಏರಿಕೆ ಕಂಡಿವೆ. ನಾಲ್ಕನೇ ಸತತ ಸೆಷನ್ಗೆ ಏರಿಕೆಯಾಗಿ, 30-ಷೇರುಗಳ ಬಿಎಸ್ಇ ಸೆನ್ಸೆಕ್ಸ್ 308.37 ಅಂಕಗಳು ಅಥವಾ 0.40 ಪ್ರತಿಶತ ಏರಿಕೆ ಕಂಡು 77,301.14 ರ ಹೊಸ ಮುಕ್ತಾಯದ ಗರಿಷ್ಠ ಮಟ್ಟವನ್ನು ತಲುಪಿದವು. ಎನ್ಎಸ್ಇ ನಿಫ್ಟಿ ಸೂಚ್ಯಂಕವು 92.30 ಅಂಕಗಳು ಅಥವಾ ಶೇ. 0.39 ರಷ್ಟು ಏರಿಕೆಯಾಗಿ 23,557.90 ರ ದಾಖಲೆಯ ಗರಿಷ್ಠ ಮಟ್ಟ ತಲುಪಿದವು.
ಲೆ ಟ್ರಾವೆನ್ಯೂಸ್ ಟೆಕ್ನಾಲಜಿಯ ಆರಂಭಿಕ ಸಾರ್ವಜನಿಕ ಕೊಡುಗೆಯು (ಐಪಿಒ) ಕಳೆದ ವಾರ ಬುಧವಾರದ ಚಂದಾದಾರಿಕೆಯ ಮುಕ್ತಾಯದ ದಿನದಂದು 98.10 ಪಟ್ಟು ಚಂದಾದಾರಿಕೆ ಪಡೆದಿತ್ತು.
740 ಕೋಟಿ ರೂ.ಗಳ ಆರಂಭಿಕ ಷೇರು ಮಾರಾಟವು 120 ಕೋಟಿ ರೂ.ವರೆಗಿನ ತಾಜಾ ವಿತರಣೆಯನ್ನು ಹೊಂದಿತ್ತು. 6,66,77,674 ಈಕ್ವಿಟಿ ಷೇರುಗಳ ಮಾರಾಟ ಮಾಡಲಾಗಿತ್ತು. ಈ ಐಪಿಒ ಷೇರಿನ ಬೆಲೆ ಶ್ರೇಣಿಯು ಪ್ರತಿ ಷೇರಿಗೆ 88-93 ರೂ. ಇತ್ತು.
2007 ರಲ್ಲಿ ಅಲೋಕೆ ಬಾಜ್ಪೈ ಮತ್ತು ರಜನೀಶ್ ಕುಮಾರ್ ಅವರಿಂದ ಪ್ರಾರಂಭವಾದ ಲೆ ಟ್ರಾವೆನ್ಯೂಸ್ ಟೆಕ್ನಾಲಜಿಯು ದೇಶದ ಪ್ರಮುಖ ಆನ್ಲೈನ್ ಟ್ರಾವೆಲ್ ಅಗ್ರಿಗೇಟರ್ ಆಗಿದೆ. ಇದು ಪ್ರಯಾಣಿಕರಿಗೆ ರೈಲು, ವಿಮಾನ, ಬಸ್ಗಳು ಮತ್ತು ಹೋಟೆಲ್ಗಳಾದ್ಯಂತ ತಮ್ಮ ಪ್ರವಾಸಗಳನ್ನು ಯೋಜಿಸಲು, ಬುಕ್ ಮಾಡಲು ಮತ್ತು ನಿರ್ವಹಿಸಲು ಸಹಾಯ ಮಾಡುತ್ತದೆ.