ಪ್ಯಾರಿಸ್: ಮಾರಕ ಕೊರೊನಾ ವೈರಸ್ ಫ್ರಾನ್ಸ್ ಮೇಲೆಯೂ ಆಕ್ರಮಣ ಮಾಡಿರುವ ಬೆನ್ನಲ್ಲೇ 5 ಸಾವಿರಕ್ಕಿಂತ ಹೆಚ್ಚು ಜನರು ಒಂದೆಡೆ ಸೇರುವುದನ್ನು ಸರ್ಕಾರ ನಿಷೇಧಿಸಿದೆ. ಅಲ್ಲದೆ, ಪರಸ್ಪರ ಶುಭಕೋರಲು ಚುಂಬಿಸುವುದುನ್ನು ನಿಲ್ಲಿಸುವಂತೆ ಸರ್ಕಾರ ಜನರಲ್ಲಿ ಮನವಿ ಮಾಡಿದೆ.
ಫ್ರಾನ್ಸ್ನಲ್ಲಿ ಹೊಸದಾಗಿ 16 ಕೊರೊನಾ ವೈರಸ್ ಪ್ರಕರಣಗಳು ವರದಿಯಾಗಿದ್ದು, ಈಗಾಗಲೇ ಇಬ್ಬರು ಮೃತರಾಗಿದ್ದಾರೆ. ವೈರಸ್ ಮತ್ತಷ್ಟು ಹರಡದಂತೆ ಕಟ್ಟುನಿಟ್ಟಿನ ಕ್ರಮಕೈಗೊಂಡಿರುವ ಫ್ರಾನ್ಸ್ ತನ್ನ ಪ್ರಜೆಗಳಿಗೆ ಎಚ್ಚರಿಕೆಯ ಸಂದೇಶವನ್ನು ರವಾನಿಸಿದೆ.
ಇಂದು ಫ್ರಾನ್ಸ್ ರಾಜಧಾನಿ ಪ್ಯಾರಿಸ್ನಲ್ಲಿ ನಿಗದಿಯಾಗಿದ್ದ ಹಾಫ್ ಮ್ಯಾರಥಾನ್ ರದ್ದು ಪಡಿಸಲಾಗಿದೆ. ಈಗಾಗಲೇ ವಾರ್ಷಿಕ ಕೃಷಿ ಮೇಳವೂ ರದ್ದಾಗಿದೆ. ಮಾರ್ಚ್ 15ರಂದು ನಿಗದಿಯಾಗಿರುವ ಮುನ್ಸಿಪಾಲ್ ಚುನಾವಣೆ ನಿಗದಿಯಂತೆ ನಡೆಯುವ ಸಾಧ್ಯತೆ ಇದೆ.
ಫ್ರಾನ್ಸ್ನ ಆರೋಗ್ಯ ಸಚಿವ ಒಲಿವರ್ ವೆರಾನ್ ಈ ಮೊದಲೇ ಶೇಕ್ ಹ್ಯಾಂಡ್ ಮಾಡುವುದನ್ನು ಕಡೆಗಣಿಸಿ ಎಂದು ಮನವಿ ಮಾಡಿದ್ದರು. ಇದೀಗ ಶುಭಕೋರುವಾಗ ಚುಂಬಿಸುವುದನ್ನು ನಿಲ್ಲಿಸಿ ಎಂದು ಹೇಳಿದ್ದಾರೆ.
ಫ್ರಾನ್ಸ್ನಲ್ಲಿ ಖಚಿತಗೊಂಡ ಕೊರೊನಾ ವೈರಸ್ ಪ್ರಕರಣಗಳು 100ಕ್ಕೇರಿದೆ. ಸುಮಾರು 59 ಮಂದಿ ಆಸ್ಪತ್ರೆ ಸೇರಿದ್ದು, 12 ಮಂದಿ ಚೇತರಿಸಿಕೊಳ್ಳುತ್ತಿದ್ದಾರೆ. ಈವರೆಗೂ ಇಬ್ಬರು ಸಾವಿಗೀಡಾಗಿದ್ದಾರೆ ಎಂದು ಶನಿವಾರ ಮಧ್ಯಾಹ್ನ ವೆರಾನ್ ತಿಳಿಸಿದ್ದಾರೆ. (ಏಜೆನ್ಸೀಸ್)