ಪಥನಂತಿಟ್ಟ: ಸ್ವಲ್ಪ ದಿನಗಳ ಹಿಂದೆ ಮಾನವನನ್ನು ಹಿಡಿದು, ಕೊಂದ ಹೆಣ್ಣು ಹುಲಿ ಅನುಮಾನಾಸ್ಪದವಾಗಿ ಮೃತಪಟ್ಟಿದೆ. ಹುಲಿಯ ಮೃತದೇಹ ಕೇರಳದ ಪಥನಂತಿಟ್ಟ ಜಿಲ್ಲೆಯ ಮಣಿಯಾರ್ನಲ್ಲಿನ ಒಂದು ಕೃಷಿಭೂಮಿ ಸಮೀಪದ ಹೊಳೆಯಲ್ಲಿ ಪತ್ತೆಯಾಗಿದೆ.
ಕಾಡಿಗೆ ಹೊಂದಿಕೊಂಡಿರುವ ಈ ಕೃಷಿಭೂಮಿಯಲ್ಲಿ ಕೆಲಸ ಮಾಡುತ್ತಿದ್ದ ರೈತನೋರ್ವನಿಗೆ ಹೊಳೆಯಲ್ಲಿ ಹುಲಿ ಮೃತಪಟ್ಟಿರುವುದು ಗೊತ್ತಾಗಿದೆ. ನಂತರ ಸ್ಥಳೀಯರು ಚಿತ್ತಾರ್ನಲ್ಲಿರುವ ಅರಣ್ಯಾಧಿಕಾರಿಗಳಿಗೆ ವಿಷಯ ತಿಳಿಸಿ, ಅವರು ಸ್ಥಳಕ್ಕೆ ಬಂದು ಪರಿಶೀಲನೆ ನಡೆಸಿದ್ದಾರೆ. ಇದನ್ನೂ ಓದಿ: ಚಿರಂಜೀವಿ ಸರ್ಜಾ ಅಂತ್ಯಕ್ರಿಯೆ ಮುಗಿಯುತ್ತಿದ್ದಂತೆ ತಾರಕಕ್ಕೇರಿತು ಅರ್ಜುನ್ ಸರ್ಜಾ ಸಿಟ್ಟು…
ಈ ಹೆಣ್ಣು ಹುಲಿಯ ಬಲಗಾಲಿನ ಮೇಲೆ ತೀವ್ರವಾದ ಗಾಯವಾಗಿದೆ. ಅಲ್ಲದೆ, ತುಂಬ ಸಣಕಲಾಗಿತ್ತು. ಈ ಪ್ರಾಣಿ ದೀರ್ಘಕಾಲದ ಅನಾರೋಗ್ಯದಿಂದ ಬಳಲುತ್ತಿತ್ತು, ಉಸಿರಾಟದ ಸಮಸ್ಯೆಯುಂಟಾಗಿತ್ತು ಎಂಬುದು ಮೇಲ್ನೋಟಕ್ಕೆ ಗೊತ್ತಾಗುತ್ತಿದೆ. ಆದರೂ ಕೆಲವು ಅನುಮಾನಗಳು ಕಾಡುತ್ತಿವೆ ಎಂದು ಅರಣ್ಯಾಧಿಕಾರಿಗಳು ತಿಳಿಸಿದ್ದಾರೆ. ಹುಲಿಯ ಮೃತದೇಹದ ಮಾದರಿಗಳನ್ನು ತಪಾಸಣೆಗಾಗಿ ಲ್ಯಾಬ್ಗೆ ಕಳಿಸಲಾಗಿದೆ.
ಮೇ ತಿಂಗಳಲ್ಲಿ ಇಡುಕ್ಕಿ ನಿವಾಸಿಯಾದ ರಬ್ಬರ್ ಟ್ಯಾಪಿಂಗ್ ಗುತ್ತಿಗೆದಾರನೋರ್ವ ಥನ್ನಿಥೋಡುನಲ್ಲಿರುವ ಮೇದಪ್ಪರಾ ಪ್ಲಾಂಟೇಶನ್ನಲ್ಲಿ ಹುಲಿಗೆ ಬಲಿಯಾಗಿದ್ದ. ಅಂದು ಆತನನ್ನು ಹಿಡಿದು ಕೊಂದ ಹುಲಿ ಇದೇ ಎಂದು ಅರಣ್ಯಾಧಿಕಾರಿಗಳು ಸ್ಪಷ್ಟಪಡಿಸಿದ್ದಾರೆ. ಇದನ್ನೂ ಓದಿ: ತಮಿಳುನಾಡಿಗೆ ನೀರು ಬೀಡಲು ಕಾವೇರಿ ಪ್ರಾಧಿಕಾರ ಆದೇಶ: ಮೇಕೆದಾಟು ಯೋಜನೆ ಪ್ರಸ್ತಾವನೆಗೂ ತಡೆ
ಕೇರಳದಲ್ಲಿ ಇತ್ತೀಚೆಗೆ ಗರ್ಭಿಣಿ ಆನೆಯೊಂದು ಯಾರೋ ಕೊಟ್ಟಿದ್ದ ಸ್ಫೋಟಕ ತುಂಬಿದ ಪೈನಾಪಲ್ ತಿಂದು ಮೃತಪಟ್ಟಿತ್ತು. ಈ ಕೃತ್ಯಕ್ಕೆ ದೇಶದೆಲ್ಲೆಡೆಯಿಂದ ವಿರೋಧ ವ್ಯಕ್ತವಾಗಿತ್ತು. (ಏಜೆನ್ಸೀಸ್)