ಕಾಲುಗಳಿಗೆ, ಬೆನ್ನಿಗೆ ವಿಶೇಷವಾದ ವ್ಯಾಯಾಮ ದೊರಕುವ ಯೋಗಾಸನವೆಂದರೆ 'ಊರ್ಧ್ವಮುಖ ಪಶ್ಚಿಮೋತ್ಥಾಸನ'. ಕಾಲುಗಳನ್ನು ತೀವ್ರವಾಗಿ ಎಳೆತಕ್ಕೆ ಒಳಪಡಿಸಿ ಮೇಲ್ಮುಖವಾಗಿ ತರುವ ಆಸನವಿದು. ಇದರ ಅಭ್ಯಾಸದ ವೇಳೆ ಶಿರಸ್ಸಿನಿಂದ ಕಾಲಿನ ತುದಿಯವರೆಗೆ ರಕ್ತಪರಿಚಲನೆ ಉತ್ತಮಗೊಳ್ಳುತ್ತದೆ.
ಪ್ರಯೋಜನಗಳು: ಊರ್ಧ್ವಮುಖ ಪಶ್ಚಿಮೋತ್ಥಾಸನ ಮಾಡುವುದರಿಂದ, ವಿಶೇಷವಾಗಿ, ಸಮತೋಲನವನ್ನು ಕಾಪಾಡಬಹುದು. ಜೀರ್ಣಾಂಗದ ವ್ಯವಸ್ಥೆ ಸುಧಾರಿಸುತ್ತದೆ. ಬೊಜ್ಜು ಕರಗಲು ಉಪಯುಕ್ತ. ಒತ್ತಡ ನಿಯಂತ್ರಣವಾಗಿ ಮನಸ್ಸು ಹಗುರವಾಗುತ್ತದೆ.
ಮಾಡುವ ವಿಧಾನ: ಪ್ರಥಮವಾಗಿ ದಂಡಾಸನದಲ್ಲಿ ಕಾಲು ಚಾಚಿ ಕುಳಿತುಕೊಳ್ಳಬೇಕು. ಎರಡೂ ಕೈಗಳ ಸಹಾಯದಿಂದ ನಿಧಾನವಾಗಿ ಉಸಿರನ್ನು ಬಿಡುತ್ತಾ ಕಾಲುಗಳನ್ನು ಮೇಲಕ್ಕೆತ್ತಬೇಕು. ಮೊಣಕಾಲುಗಳನ್ನು ಮತ್ತು ಬೆನ್ನನ್ನು ನೇರವಾಗಿಸಿ, ಮುಖವನ್ನು ಮಂಡಿಗೆ ಸ್ಪರ್ಶಿಸಲು ಪ್ರಯತ್ನಿಸಬೇಕು. ಈ ಸ್ಥಿತಿಯಲ್ಲಿ ಪೃಷ್ಠದ ಆಧಾರದಲ್ಲಿ ಕುಳಿತುಕೊಂಡು ಸ್ವಲ್ಪ ಹೊತ್ತು ಸಹಜ ಉಸಿರಾಟ ನಡೆಸಬೇಕು. ಹಾಯಾಗಿರಬೇಕು. ಆಮೇಲೆ ಉಸಿರನ್ನು ಬಿಡುತ್ತಾ ಕಾಲುಗಳನ್ನು ಕೆಳಗಿಳಿಸಬೇಕು. ಕೈಗಳನ್ನು ಹಿಂದಕ್ಕೆ ಊರಿ ಕಾಲುಗಳನ್ನು ಅಲ್ಲಾಡಿಸುತ್ತಾ ವಿಶ್ರಮಿಸಬೇಕು.
ಸ್ವಲ್ಪ ಕ್ಲಿಷ್ಟಕರವಾದ ಭಂಗಿ ಇರುವುದರಿಂದ ಈ ಆಸನವನ್ನು ಗುರುಮುಖೇನ ಮಾರ್ಗದರ್ಶನದೊಂದಿಗೆ ಕಲಿಯುವುದು ಒಳ್ಳೆಯದು. ಒಮ್ಮೆ ಅಭ್ಯಾಸವಾದ ಮೇಲೆ ಎರಡು ಬಾರಿ ಮೂರು ಬಾರಿ ಮಾಡಬೇಕು. ಕಾಲು ನೋವು ಅಥವಾ ಬೆನ್ನಿನ ಗಾಯವಿದ್ದವರು ಊರ್ಧ್ವಮುಖ ಪಶ್ಚಿಮೋತ್ಥಾಸನವನ್ನು ಮಾಡಬಾರದು.