UPPCS 2025: ಸರ್ಕಾರಿ ಉದ್ಯೋಗದ ಸಂದರ್ಶನಕ್ಕೆ ತೆರಳುವ ಮುನ್ನ ತಂದೆಯೊಬ್ಬರು ಮಗನನ್ನು ಪ್ರೀತಿಯಿಂದ ರೆಡಿ ಮಾಡಿದ ವಿಡಿಯೋ ಇದೀಗ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ. ಪ್ರಯಾಗ್‌ರಾಜ್‌ನ ಉತ್ತರ ಪ್ರದೇಶ ಲೋಕಸೇವಾ ಆಯೋಗದ (UPPSC) ಕಚೇರಿಯ ಸರಸ್ವತಿ ಭವನದಲ್ಲಿ ಈ ಮನಮುಟ್ಟುವ ಕ್ಷಣ ಕ್ಯಾಮೆರಾದಲ್ಲಿ ಸೆರೆಯಾಗಿದೆ.
ಸಂದರ್ಶನಕ್ಕೆ ತೆರಳುವ ಮುನ್ನ ತಂದೆ ಮಗನ ಕೋಟ್ ಸರಿಪಡಿಸಿದ್ದಾರೆ. ಬಳಿಕ ಜೇಬಿನಿಂದ ಬಾಚಣಿಗೆ ತೆಗೆದು ಮಗನ ಕೂದಲನ್ನೂ ಅಚ್ಚುಕಟ್ಟಾಗಿ ಬಾಚಿದ್ದಾರೆ. ಮಗ ಸಂದರ್ಶನಕ್ಕೆ ಅಚ್ಚುಕಟ್ಟಾಗಿ ತೆರಳಬೇಕು ಎಂಬ ತಂದೆಯ ಕಾಳಜಿ ಈ ಕ್ಷಣದಲ್ಲಿ ಎದ್ದು ಕಾಣಿಸಿದೆ.
ಕೂದಲು ಹಾಗೂ ಕೋಟ್ ಸರಿಪಡಿಸಿದ ಬಳಿಕ ತಂದೆ ಮಗನಿಗೆ ಸಿಹಿ ತಿನ್ನಿಸಿ ಶುಭ ಹಾರೈಸಿದ್ದಾರೆ. ಪರೀಕ್ಷೆ, ಸಂದರ್ಶನ ಅಥವಾ ಹೊಸ ಕೆಲಸಕ್ಕೆ ತೆರಳುವ ಮುನ್ನ ಮಕ್ಕಳಿಗೆ ಸಿಹಿ ತಿನ್ನಿಸಿ ಶುಭ ಕೋರುವುದು ಭಾರತೀಯ ಕುಟುಂಬಗಳಲ್ಲಿ ಸಾಮಾನ್ಯ. ಈ ವಿಡಿಯೋದಲ್ಲೂ ಅಂತಹ ಆತ್ಮೀಯ ಕ್ಷಣ ಕಂಡುಬಂದಿದೆ.
ಸಂದರ್ಶನಕ್ಕೆ ತೆರಳುವ ಮುನ್ನ ಮಗ ತಂದೆಯ ಕಾಲಿಗೆ ನಮಸ್ಕರಿಸಿ ಆಶೀರ್ವಾದ ಪಡೆದಿದ್ದಾನೆ. ತಂದೆ-ಮಗನ ನಡುವಿನ ಈ ಸರಳ ಹಾಗೂ ಭಾವನಾತ್ಮಕ ಕ್ಷಣ ಸಾಮಾಜಿಕ ಜಾಲತಾಣದಲ್ಲಿ ಹಲವರ ಗಮನ ಸೆಳೆದಿದೆ.
ಸರ್ಕಾರಿ ಉದ್ಯೋಗ ಪಡೆಯುವ ಕನಸಿಗಾಗಿ ಅಭ್ಯರ್ಥಿಗಳು ಹಲವು ವರ್ಷಗಳ ಕಾಲ ತಯಾರಿ ನಡೆಸುತ್ತಾರೆ. ಈ ಹಾದಿಯಲ್ಲಿ ಕುಟುಂಬದ ಪ್ರೀತಿ, ಪ್ರೋತ್ಸಾಹ ಮತ್ತು ಬೆಂಬಲವೂ ಪ್ರಮುಖವಾಗಿರುತ್ತದೆ. ಇದೀಗ ವೈರಲ್ ಆಗಿರುವ ಈ ತಂದೆ-ಮಗನ ವಿಡಿಯೋ, ಪ್ರತಿಯೊಬ್ಬರ ಯಶಸ್ಸಿನ ಹಿಂದೆ ಕುಟುಂಬದ ಬೆಂಬಲವೂ ಇರುತ್ತದೆ ಎಂಬುದನ್ನು ನೆನಪಿಸಿದೆ.