ಪ್ರತಿಯೊಂದು ಕೃತ್ಯವೂ ನಾಲ್ಕು ವಿಷಯಗಳಿಂದ ನಡೆಯುತ್ತದೆ : 1. ನಿಮಗೆ ಆ ಕೃತ್ಯವನ್ನು ಮಾಡಬೇಕೆಂಬ ಉದ್ದೇಶವಿತ್ತು. 2. ಬೇರೆ ಯಾರಿಗೋ ಅದನ್ನು ಮಾಡಬೇಕಾಗಿತ್ತು. ಅದರ ಕಾರಣದಿಂದಾಗಿ ನೀವದನ್ನು ಮಾಡುವ ಹಾಗಾಯಿತು. 3. ನಿಮಗೂ, ಇತರ ವ್ಯಕ್ತಿಗೂ ಅದು ಬೇಕಿರಲಿಲ್ಲ, ಆದರೆ ಹೇಗೋ, ನಿಮ್ಮಿಬ್ಬರ ಇಚ್ಛೆಗಳ ವಿರುದ್ಧವಾಗಿ ನಡೆದುಹೋಯಿತು. 4. ಇಬ್ಬರಿಗೂ ಬೇಕಾಗಿದ್ದರಿಂದ ನಡೆಯಿತು. ಒಂದು ಜಗಳದಲ್ಲಿಇಬ್ಬರು ಸಹಭಾಗಿಗಳಾಗಿರುತ್ತಾರೆ. ಮೊದಲನೆಯ ಸಾಧ್ಯತೆಯೆಂದರೆ, ನಿಮಗೆ ಸಹಿಸಲಸಾಧ್ಯವಾದ್ದರಿಂದ ಅದು ಹೊರಗೆ ಬಂದಿತು. ನಿಮಗೆ ಬಾಧೆಯಾಗಿ ನಿಮ್ಮದೇ ಕೋಪದಿಂದ ಹಾಗಾಯಿತು.
ಎರಡನೆಯ ಸಾಧ್ಯತೆಯಲ್ಲಿಯಾರೋ ಕೋಪದಿಂದಿರುವವರು ನಿಮ್ಮ ಬಳಿಗೆ ಬರುತ್ತಾರೆ ಮತ್ತು ನೀವು ಕೋಪದ ಆ ಕಂಪನಗಳನ್ನು ಹೀರಿಕೊಂಡು ಕಿರುಚಾಡುತ್ತೀರಿ. ನೀವು ಸಂತೋಷದಿಂದಿದ್ದರೂ ಇತರರ ಕಂಪನಗಳನ್ನು ನೀವು ಹೀರಿಕೊಂಡಿದ್ದರಿಂದ ಹಾಗೆ ಪ್ರತಿಕ್ರಿಯಿಸಿದಿರಿ. ಮೂರನೆಯ ಸಾಧ್ಯತೆಯಲ್ಲಿ ನೀವಾಗಲಿ, ಇತರ ವ್ಯಕ್ತಿಯಾಗಲಿ ಅದನ್ನು ಎದುರು ನೋಡಲಿಲ್ಲವಾದರೂ ಏನೋ ಒಂದು ನಡೆಯಿತು. ಇದು ಕಾಲದ ಪ್ರಭಾವದಿಂದಾಗಿ ಮತ್ತು ಯಾವುದೋ ಒಂದು ಕರ್ಮದ ಪ್ರಭಾವದಿಂದಾಗಿ ನಡೆಯಿತು. ನಾಲ್ಕನೆಯ ಸಾಧ್ಯತೆಯಲ್ಲಿ ನೀವಿಬ್ಬರೂ ಬಯಸಿದ್ದಕ್ಕಾಗಿ ನಡೆಯಿತು. ಆದ್ದರಿಂದ, ಕೃತ್ಯಗಳು ಅಥವಾ ತಪ್ಪುಗಳು ಈ ನಾಲ್ಕು ಸಾಧ್ಯತೆಗಳನ್ನು ಹೊಂದಿವೆ. ಗತದ ಬಗ್ಗೆ ಕುಳಿತು ಚಿಂತಿಸುವುದು ವ್ಯರ್ಥ. ಸುಮ್ಮನೆ ಮುನ್ನಡೆಯಿರಿ! ಪ್ರತಿ ಕ್ಷಣವೂ ನಿಮ್ಮೊಳಗೆ ಹೊಳೆಯುವ, ಆಕರ್ಷಣೀಯವಾದ ಶಕ್ತಿಯೊಂದಿದೆ. ಅದರೊಡನೆ ಮುನ್ನಡೆಯಿರಿ. ತಪ್ಪುಗಳಿಂದ ನಿಮಗೆ ನೋವುಂಟಾಗಿದೆ ಮತ್ತು ಆ ನೋವು ನಿಮ್ಮ ಬೆಳವಣಿಗೆಗಾಗಿ ಅವಶ್ಯಕ. ನೋವು ನಿಮಗೊಂದು ಆಳವನ್ನು ತಂದಿದೆ ಮತ್ತು ಅದರಿಂದ ಒಳ್ಳೆಯದೇ ಆಗಿದೆ.
ನಿಮ್ಮ ತಪ್ಪುಗಳಿಂದ ಕಲಿತಿದ್ದೀರಿ ಮತ್ತು ಅದೇ ತಪ್ಪನ್ನು ನೀವು ಪದೇ ಪದೇ ಮಾಡಲು ಹೋಗುವುದಿಲ್ಲ. ಇದುವೂ ಒಳ್ಳೆಯದೆ. ನಿಮ್ಮಲ್ಲಿ ಕೋಪವುಕ್ಕುತ್ತಿದ್ದಾಗ ನಿಮ್ಮ ದೇಹದಲ್ಲಿ, ತಲೆಯ ಮೇಲ್ಭಾಗದಲ್ಲಿ ಒಂದು ಸಂವೇದನೆಯನ್ನು ಅನುಭವಿಸಬಹುದು ಅಥವಾ ನಿಮ್ಮ ಹಣೆಯಲ್ಲಿ, ತಲೆಯ ಹಿಂಭಾಗದಲ್ಲಿ ಸಂವೇದನೆಯನ್ನು ಅನುಭವಿಸಬಹುದು. ಕತ್ತಿನಲ್ಲಿ, ಭುಜದ ಭಾಗದಲ್ಲಿ ಸ್ವಲ್ಪ ಬಿಗಿತನವನ್ನು ಅನುಭವಿಸಬಹುದು. ಆ ಕ್ಷಣದಲ್ಲಿ ಈ ಸಂವೇದನೆಗಳನ್ನು ಅನುಭವಿಸುವುದು ಒಂದು ಕುಶಲತೆಯೇ ಸರಿ. ಈ ಸಂವೇದನೆಗಳನ್ನು ಅನುಭವಿಸುವ ಅಭ್ಯಾಸವಾಗಿಬಿಟ್ಟರೆ ಕೋಪವನ್ನು ಸುಲಭವಾಗಿ ಗೆಲ್ಲಬಹುದು. ಆದ್ದರಿಂದಲೇ ಧ್ಯಾನವು ಬಹಳ ಮುಖ್ಯ. ಧ್ಯಾನವಲ್ಲದೆ ಬೇರೆ ಯಾವ ರೀತಿಯಲ್ಲೂ ಕೋಪವನ್ನು ಹತೋಟಿಗೆ ತರಲು ಸಾಧ್ಯವಿಲ್ಲ.
( ಪ್ರತಿಕ್ರಿಯಿಸಿ: instagram@srisriravishankar.kannada)