Animal digestive systems: ಹಸುಗಳು ಹುಲ್ಲು ತಿಂದ ಮೇಲೆ ನಿಧಾನವಾಗಿ ಕುಳಿತು ಮೆಲಕು ಹಾಕುವುದನ್ನು ನಾವೆಲ್ಲರೂ ನೋಡಿರುತ್ತೇವೆ. ಆದರೆ, ಅವು ಹೀಗೆ ಆಹಾರವನ್ನು ಎರಡು ಬಾರಿ ಅಗಿದು ತಿನ್ನುವುದರ ಹಿಂದೆ ಪ್ರಕೃತಿಯ ದೊಡ್ಡ ವಿಜ್ಞಾನವೇ ಅಡಗಿದೆ ಎಂಬುದು ಹಲವರಿಗೆ ತಿಳಿದಿಲ್ಲ. ಹಸುಗಳ ಈ ವಿಶಿಷ್ಟ ಜೀರ್ಣಾಂಗ ವ್ಯವಸ್ಥೆ ಮತ್ತು ಅದರ ಹಿಂದಿರುವ ಕುತೂಹಲಕಾರಿ ವೈಜ್ಞಾನಿಕ ಸಂಗತಿಗಳ ವಿವರ ಇಲ್ಲಿದೆ.
ಹಸುಗಳು ಹುಲ್ಲು ಅಥವಾ ಮೇವನ್ನು ತಿಂದ ತಕ್ಷಣ ಅದನ್ನು ಪೂರ್ತಿಯಾಗಿ ಅಗಿಯುವುದಿಲ್ಲ, ಬದಲಿಗೆ ನೇರವಾಗಿ ನುಂಗುತ್ತವೆ. ಈ ಅರ್ಧಂಬರ್ಧ ನುಂಗಿದ ಆಹಾರವು ಹೊಟ್ಟೆಯ ಮೊದಲ ಭಾಗವಾದ 'ರೂಮೆನ್' ತಲುಪುತ್ತದೆ.
ನಂತರ, ಹಸುಗಳು ವಿಶ್ರಾಂತಿ ಪಡೆಯುವಾಗ, ರೂಮೆನ್‌ನಲ್ಲಿರುವ ಆಹಾರವು ಮತ್ತೆ ಬಾಯಿಗೆ ಬರುತ್ತದೆ. ಇದನ್ನು ಹಸುಗಳು ನಿಧಾನವಾಗಿ ಚೆನ್ನಾಗಿ ಅಗಿಯುತ್ತವೆ. ಇದನ್ನೇ ನಾವು 'ಮೆಲಕು ಹಾಕುವುದು' ಎಂದು ಕರೆಯುತ್ತೇವೆ.
ಮನುಷ್ಯರಂತೆ ಹಸುಗಳಿಗೆ ಒಂದೇ ಹೊಟ್ಟೆ ಇರಲ್ಲ. ಅವುಗಳ ಜೀರ್ಣಾಂಗ ವ್ಯವಸ್ಥೆಯಲ್ಲಿ ನಾಲ್ಕು ವಿಭಿನ್ನ ಭಾಗಗಳಿವೆ
ರೂಮೆನ್: ಇದು ಹೊಟ್ಟೆಯ ಅತಿ ದೊಡ್ಡ ಭಾಗ. ಇಲ್ಲಿ ಆಹಾರ ಶೇಖರಣೆಯಾಗಿ, ಹುದುಗುವಿಕೆ (Fermentation) ಪ್ರಕ್ರಿಯೆಗೆ ಒಳಗಾಗುತ್ತದೆ.
ರೆಟಿಕ್ಯುಲಮ್: ಜೇನುಗೂಡಿನಂತಹ ರಚನೆ ಹೊಂದಿರುವ ಈ ಭಾಗವು, ಆಹಾರವನ್ನು ಮತ್ತೆ ಬಾಯಿಗೆ ಕಳುಹಿಸಲು ನೆರವಾಗುತ್ತದೆ
ಒಮಾಸಮ್: ಈ ಭಾಗವು ಆಹಾರದಲ್ಲಿರುವ ನೀರು ಹಾಗೂ ಪೋಷಕಾಂಶಗಳನ್ನು ಹೀರಿಕೊಳ್ಳುತ್ತದೆ.
ಅಬೊಮಾಸಮ್ : ಇದನ್ನು ಹಸುವಿನ 'ನಿಜವಾದ ಹೊಟ್ಟೆ' ಎನ್ನಲಾಗುತ್ತದೆ. ಇದು ಆಮ್ಲಗಳ ಸಹಾಯದಿಂದ ಆಹಾರವನ್ನು ಸಂಪೂರ್ಣವಾಗಿ ಜೀರ್ಣ ಮಾಡುತ್ತದೆ.
ಸೂಕ್ಷ್ಮಾಣುಜೀವಿಗಳ ಶಕ್ತಿ: ಹಸುಗಳಿಗೆ ಹುಲ್ಲಿನಲ್ಲಿರುವ ಕಠಿಣ ನಾರಿನಂಶವನ್ನು (ಸೆಲ್ಯುಲೋಸ್) ನೇರವಾಗಿ ಜೀರ್ಣಿಸಿಕೊಳ್ಳಲು ಸಾಧ್ಯವಿಲ್ಲ. ರೂಮೆನ್‌ನಲ್ಲಿರುವ ಕೋಟ್ಯಂತರ ಬ್ಯಾಕ್ಟೀರಿಯಾ ಮತ್ತು ಪ್ರೊಟೊಜೋವಾಗಳು ಈ ನಾರನ್ನು ಒಡೆದು ಹಸುಗಳಿಗೆ ಶಕ್ತಿಯನ್ನು ನೀಡುತ್ತವೆ.
ದಿನಕ್ಕೆ 8 ಗಂಟೆ ಮೆಲಕು: ಒಂದು ಹಸು ದಿನಕ್ಕೆ ಸುಮಾರು 6 ರಿಂದ 8 ಗಂಟೆಗಳ ಕಾಲ ಕೇವಲ ಮೆಲಕು ಹಾಕಲು ವಿನಿಯೋಗಿಸುತ್ತದೆ.
ಅಧಿಕ ಲಾಲಾರಸ ಉತ್ಪಾದನೆ: ಆಹಾರದ ಜೀರ್ಣಕ್ರಿಯೆಗೆ ಅನುಕೂಲವಾಗಲು ಹಸುಗಳು ದಿನಕ್ಕೆ ಬರೋಬ್ಬರಿ 100 ರಿಂದ 150 ಲೀಟರ್‌ಗಳಷ್ಟು ಲಾಲಾರಸವನ್ನು ಉತ್ಪಾದಿಸುತ್ತವೆ.
ಒಟ್ಟಿನಲ್ಲಿ, ಹೀಗೆ ಹಸುಗಳು ಆಹಾರವನ್ನು ಎರಡು ಬಾರಿ ಮೆಲಕು ಹಾಕಿ ಜೀರ್ಣ ಮಾಡಿಕೊಳ್ಳುತ್ತವೆ. ಹಸುವಿನ ಹೊಟ್ಟೆಯಲ್ಲಿರುವ ಆ ನಾಲ್ಕು ಕೋಣೆಗಳ ಜೀರ್ಣಾಂಗ ವ್ಯವಸ್ಥೆ ಕೆಲಸ ಮಾಡುವುದು ಒಂದು ಅಚ್ಚರಿ ಸಂಗತಿಯಾಗಿದೆ.