ಮುಳಬಾಗಿಲು: ಇತ್ತೀಚೆಗೆ ತಾಲೂಕಿನ ವಿ.ಹೊಸಹಳ್ಳಿಯ ಮನೆಯೊಂದರಲ್ಲಿ ನಡೆದ ಕಳವು ಪ್ರಕರಣಕ್ಕೆ ಸಂಬಂಧಿಸಿದಂತೆ ಮುಳಬಾಗಿಲು ಗ್ರಾಮಾಂತರ ಪೊಲೀಸರು ಆರೋಪಿಯನ್ನು ಬಂಧಿಸಿ, 67 ಗ್ರಾಂ ಬಂಗಾರದ ಒಡವೆ ವಶಕ್ಕೆ ಪಡೆದಿದ್ದಾರೆ.
ತಾಲೂಕಿನ ಎಚ್.ಗೊಲ್ಲಹಳ್ಳಿ ಗ್ರಾಪಂ ವ್ಯಾಪ್ತಿಯ ವಿ.ಹೊಸಹಳ್ಳಿಯ ವೇಣುಗೋಪಾಲ (35) ಬಂಧಿತ. ಕಳೆದ 15 ದಿನದ ಹಿಂದೆ ಮನೆಯಲ್ಲಿ ಕಳವು ಆಗಿತ್ತು, ಈ ಬಗ್ಗೆ ಗ್ರಾಮಾಂತರ ಠಾಣೆಯಲ್ಲಿ ಮಾಲೀಕರು ದೂರು ಸಲ್ಲಿಸಿದ್ದರು.
ದೂರು ಆಧರಿಸಿ ಆರೋಪಿ ಪತ್ತೆಗಾಗಿ ಪೊಲೀಸ್ ಅಧೀಕ್ಷಕ ಬಿ. ನಿಖಿಲ್, ಹೆಚ್ಚುವರಿ ಪೊಲೀಸ್ ಅಧೀಕ್ಷಕರಾದ ರವಿಶಂಕರ್, ಜಗದೀಶ್, ಮುಳಬಾಗಿಲು ಉಪವಿಭಾಗದ ಪೊಲೀಸ್ ಉಪಾಧೀಕ್ಷಕ ಡಿ. ಸಿ. ನಂದಕುಮಾರ್ ಅವರ ಮಾರ್ಗದರ್ಶನದಲ್ಲಿ ಗ್ರಾಮಾಂತರ ವೃತ್ತ ನಿರೀಕ್ಷಕ ಕೆ.ಜಿ.ಸತೀಶ್, ಪಿಎಸ್ಐ ಅರುಣ್ ಗೌಡ ಪಾಟೀಲ್, ಠಾಣೆಯ ಅಪರಾಧ ಸಿಬ್ಬಂದಿ ಎಚ್.ಸಿ ಸುರೇಶ್, ಪಿ.ಸಿ ಲಕ್ಷ್ಮೀನಾರಾಯಣ, ಚಾಲಕ ನಾಗಾರ್ಜುನ ಅವರು ಬಾತ್ಮಿದಾರರ ಮಾಹಿತಿ ಮೇರೆಗೆ ಕಳವು ಮಾಡಿದ್ದ ಆರೋಪಿಯನ್ನು ಮಾಲು ಸುಮೇತ ಪತ್ತೆ ಹಚ್ಚಿದ್ದಾರೆ.