ಬೆಂಗಳೂರು: ರಾಜ್ಯದಲ್ಲಿ ಕೊವಿಡ್ -19 ಸೋಂಕಿತರ ಸಂಖ್ಯೆ ಪ್ರತಿದಿನವೂ ಹೆಚ್ಚುತ್ತಲೇ ಇದೆ. ಇಂದು ಸಂಜೆ ಆರೋಗ್ಯ ಇಲಾಖೆ ನೀಡಿದ ವರದಿ ಪ್ರಕಾರ ಕರೊನಾ ಸೋಂಕಿತರ ಸಂಖ್ಯೆ 2089ಕ್ಕೆ ಏರಿದೆ.
ಕಳೆದ 24 ಗಂಟೆಯಲ್ಲಿ ( ಮೇ 23ರ ಸಂಜೆ 5ರಿಂದ ಮೇ 24ರ ಸಂಜೆ 5ರವರೆಗೆ) ಒಟ್ಟು 130 ಹೊಸ ಕೇಸ್ಗಳು ಪತ್ತೆಯಾಗಿವೆ. ನಿನ್ನೆ ಸಂಜೆಯಿಂದ ಇಂದು ಬೆಳಗ್ಗೆಯವರೆಗೆ 97 ಪ್ರಕರಣಗಳು ದಾಖಲಾಗಿದ್ದವು. ಸಂಜೆ ಹೊತ್ತಿಗೆ ಮತ್ತೆ 33 ಜನರಲ್ಲಿ ಸೋಂಕು ದೃಢಪಟ್ಟಿದೆ.
2089 ಪ್ರಕರಣದಲ್ಲಿ ಸಕ್ರಿಯ ಕೇಸ್ಗಳು 1391. ಆಸ್ಪತ್ರೆಯಿಂದ ಬಿಡುಗಡೆಯಾದವರು 654 ಮಂದಿ. ಕಳೆದ 24ಗಂಟೆಯಲ್ಲೇ 46 ಮಂದಿ ಗುಣಮುಖರಾಗಿ ಡಿಸ್ಚಾರ್ಜ್ ಆಗಿದ್ದಾರೆ. 17 ಜನರಿಗೆ ಐಸಿಯುವಿನಲ್ಲಿ ಚಿಕಿತ್ಸೆ ನೀಡಲಾಗುತ್ತಿದೆ. ಕೊವಿಡ್-19ನಿಂದಾಗಿ ಮೃತಪಟ್ಟವರು 42 ಮಂದಿ ಎಂದು ಆರೋಗ್ಯ ಇಲಾಖೆ ತಿಳಿಸಿದೆ.
ಕೊವಿಡ್-19 ಸೋಂಕಿತರಲ್ಲಿ ಬಹುಪಾಲು ಜನರು ಮುಂಬೈ, ಮಹಾರಾಷ್ಟ್ರದಿಂದ ಬಂದವರು. ಇಂದು ಬೆಂಗಳೂರು ನಗರದಲ್ಲಿ 1, ಮಂಡ್ಯದಲ್ಲಿ 15, ಕಲಬುರಗಿ-6, ಚಿಕ್ಕಬಳ್ಳಾಪುರ 27, ಯಾದಗಿರಿ 24, ಹಾಸನ 14, ಬೀದರ್ 6, ಉಡುಪಿ 23, ವಿಜಯಪುರ 1, ಉತ್ತರ ಕನ್ನಡ 2, ದಕ್ಷಿಣ ಕನ್ನಡ ಮತ್ತು ಧಾರವಾಡಗಳಲ್ಲಿ ತಲಾ 1, ಶಿವಮೊಗ್ಗ 2, ತುಮಕೂರು 2 ಹಾಗೂ ಕೊಡಗಲ್ಲಿ 1 ಕರೊನಾ ಪ್ರಕರಣ ಪತ್ತೆಯಾಗಿದೆ.
ಬೆಂಗಳೂರು ನಗರದಲ್ಲಿ ಒಟ್ಟು ಸೋಂಕಿತರ ಸಂಖ್ಯೆ 266ಕ್ಕೆ ಏರಿದ್ದು, ಎರಡನೇ ಸ್ಥಾನದಲ್ಲಿ ಮಂಡ್ಯ (252 ಸೋಂಕಿತರು) ಇದೆ. ಹಾಗೇ ಕಲಬುರಗಿ (141), ಬೆಳಗಾವಿ (127) ಚಿಕ್ಕಬಳ್ಳಾಪುರ (126), ದಾವಣಗೆರೆ (125) ಹಾಗೂ ಯಾದಗಿರಿ (111)ಯಲ್ಲಿ ಕೊವಿಡ್-19 ಸೋಂಕಿತರ ಸಂಖ್ಯೆ 100ರ ಗಡಿ ದಾಟಿದೆ.