ಬೆಂಗಳೂರು: ಮಲ್ಲೇಶ್ವರ ಬಿಬಿಎಂಪಿ ಆಟದ ಮೈದಾನದಲ್ಲಿ ಭಾನುವಾರ ಕಬ್ಬಿಣದ ಗೇಟ್ ಮುರಿದು ಬಿದ್ದು ಹನ್ನೊಂದು ವರ್ಷದ ಬಾಲಕ ಮೃತಪಟ್ಟಿದ್ದಾನೆ.
ಬಾಲಕನ ಸಾವಿಗೆ ಪಾಲಿಕೆ ನಿರ್ಲಕ್ಷ್ಯವೇ ಕಾರಣ ಎಂದು ಪಾಲಕರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
ವೈಯಾಲಿಕಾವಲ್ನ ಪೈಪ್ಲೈನ್ ರಸ್ತೆ ನಿವಾಸಿಗಳಾದ ವಿಜಯ್ ಮತ್ತು ಪ್ರಿಯಾ ದಂಪತಿಯ ಮಗ ನಿರಂಜನ್(೧೧) ಮೃತಪಟ್ಟವನು. ಬಿಬಿಎಂಪಿ ಶಾಲೆಯಲ್ಲಿ ೪ನೇ ತರಗತಿ ಓದುತ್ತಿದ್ದ ಆತ ಸ್ನೇಹಿತನೊಂದಿಗೆ ಆಟವಾಡಲು ಸೈಕಲ್ನಲ್ಲಿ ಮಲ್ಲೇಶ್ವರದ ಚಿತ್ರನಟ ದಿ.ರಾಜಾಶಂಕರ್ ಆಟದ ಮೈದಾನಕ್ಕೆ ಬಂದಿದ್ದಾಗ ಈ ದುರ್ಘಟನೆ ನಡೆದಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ನಿರಂಜನ್, ಆಟದ ಮೈದಾನದ ಪ್ರವೇಶ ಭಾಗದಲ್ಲಿನ ಗೇಟ್ ತೆಗೆದು ಒಳ ಹೋಗಲು ಮುಂದಾಗಿದ್ದಾನೆ. ಈ ವೇಳೆ ಗೇಟ್ ಏಕಾಏಕಿ ಕಳಚಿ ಆತನ ಮೇಲೆ ಬಿದ್ದಿದೆ. ಘಟನೆಯಲ್ಲಿ ಆತನ ತಲೆಗೆ ಪೆಟ್ಟು ಬಿದ್ದು ತೀವ್ರ ರಕ್ತಸ್ರಾವವಾಗಿದೆ. ಆಗ ಮೈದಾನದಲ್ಲೇ ಇದ್ದ ಸಾರ್ವಜನಿಕರು ಬಾಲಕನನ್ನು ಸಮೀಪದ ಕೆ.ಸಿ.ಜನರಲ್ ಆಸ್ಪತ್ರೆಗೆ ದಾಖಲಿಸಿದ್ದಾರೆ. ಆದರೆ, ಚಿಕಿತ್ಸೆಗೆ ಸ್ಪಂದಿಸದ ನಿರಂಜನ್ ಸ್ವಲ್ಪ ಸಮಯದಲ್ಲೇ ಮೃತಪಟ್ಟಿದ್ದಾನೆ.
೪ ವರ್ಷದ ಹಿಂದೆ ಅಳವಡಿಸಿದ್ದ ಆ ಗೇಟ್ ತುಂಬಾ ಹಳೆಯದಾಗಿತ್ತು. ಸುಮಾರು ೮ ಅಡಿ ಎತ್ತರದ ಆ ಗೇಟ್ ಒಂದು ಬದಿಯಲ್ಲಿ ತುಕು ಹಿಡಿದಿತ್ತು. ಆ ಭಾಗದಲ್ಲೇ ಗೇಟ್ ತುಂಡಾಗಿ ನಿರಂಜನ್ ಮೇಲೆ ಬಿದ್ದಿದೆ. ಈ ಸಂದರ್ಭದಲ್ಲಿ ನಿರಂಜನ್ನ ಸ್ನೇಹಿತ ಪಕ್ಕದಲ್ಲೇ ಇದ್ದ. ಅದೃಷ್ಟವಶಾತ್ ಆತ ಸ್ವಲ್ಪದರಲ್ಲೇ ಪ್ರಾಣಾಪಾಯದಿಂದ ಪಾರಾಗಿದ್ದಾನೆ. ಮೂಲತಃ ಗದಗ ಜಿಲ್ಲೆಯ ವಿಜಯ್ಕುಮಾರ್ ದಂಪತಿಗೆ ಇಬ್ಬರು ಮಕ್ಕಳು. ಈ ಪೈಕಿ ನಿರಂಜನ್ ಹಿರಿಯ ಮಗ. ಪ್ರಿಯಾ ಅವರು ಮನೆಗೆಲಸ ಮಾಡುತ್ತಾರೆ ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ.
ಬಿಬಿಎಂಪಿ ನಿರ್ಲಕ್ಷ್ಯವೇ ಕಾರಣ:
ಸೈಕಲ್ ಚೈನ್ ತುಂಡಾಗಿದ್ದರಿಂದ ಅದನ್ನು ಹಾಕಿಸಿಕೊಂಡು ಬರಲು ಮಗ, ಪಕ್ಕದ ಮನೆಯ ಸ್ನೇಹಿತನ ಜತೆ ಸೈಕಲ್ ಶಾಪ್ಗೆ ಹೋಗಿದ್ದ. ನಂತರ ಅಲ್ಲಿಂದ ಆಟದ ಮೈದಾನಕ್ಕೆ ಹೋಗಿದ್ದಾನೆ. ಆತ ಆಗಾಗ್ಗೆ ಅದೇ ಮೈದಾನಕ್ಕೆ ಹೋಗಿ ಆಟವಾಡುತ್ತಿದ್ದ. ಬಿಬಿಎಂಪಿ ನಿರ್ಲಕ್ಷ್ಯವೇ ಮಗನ ಸಾವಿಗೆ ಕಾರಣ ಎಂದು ಮೃತ ನಿರಂಜನ್ ತಾಯಿ ಪ್ರಿಯಾ ಕಣ್ಣೀರಿಟ್ಟರು. ಘಟನೆ ಸಂಬಂಧ ಮಲ್ಲೇಶ್ವರ ಠಾಣೆ ಪೊಲೀಸರು, ಬಿಬಿಎಂಪಿ ಅಧಿಕಾರಿಗಳ ವಿರುದ್ಧ ನಿರ್ಲಕ್ಷ್ಯ ಪ್ರಕರಣ ದಾಖಲಿಸಿಕೊಂಡು ತನಿಖೆ ನಡೆಸುತ್ತಿದ್ದಾರೆ.
ದಿನೇಶ್ ಗುಂಡೂರಾವ್ ಭೇಟಿ:
ಘಟನಾ ಸ್ಥಳಕ್ಕೆ ಆರೋಗ್ಯ ಸಚಿವ ದಿನೇಶ್ ಗುಂಡೂರಾವ್ ಭೇಟಿ ಕೊಟ್ಟು ಪರಿಶೀಲನೆ ನಡೆಸಿದ್ದಾರೆ. ಗೇಟ್ ಕುಸಿದು ಬೀಳಲು ಕಾರಣ ಏನೆಂದು ಬಿಬಿಎಂಪಿ ಅಧಿಕಾರಿಗಳಿಂದ ಮಾಹಿತಿ ಪಡೆದರು. ಈ ಬಗ್ಗೆ ತನಿಖೆ ನಡೆಸಲು ಸೂಚಿಸಿದ್ದೇನೆ ಎಂದರು. ನಂತರ ಕೆ.ಸಿ.ಜನರಲ್ ಆಸ್ಪತ್ರೆಯಲ್ಲಿ ಬಾಲಕ ನಿರಂಜನ್ನ ಪಾಲಕರನ್ನು ಭೇಟಿಯಾಗಿ ಸಾಂತ್ವನ ಹೇಳಿದರು.
ಬಳಿಕ ಸುದ್ದಿಗಾರರೊಂದಿಗೆ ಮಾತನಾಡಿದ ಸಚಿವರು, ‘‘ಮೈದಾನಕ್ಕೆ ೪ ವರ್ಷದ ಹಿಂದೆ ಗೇಟ್ ಅಳವಡಿಸಲಾಗಿತ್ತು. ಗೇಟ್ ಹಾಳಾಗಿದ್ದ ಸಂಗತಿ ಈವರೆಗೆ ಗಮನಕ್ಕೆ ಬಂದಿರಲಿಲ್ಲ. ಗೇಟ್ ಹಾಳಾಗಿದ್ದ ಬಗ್ಗೆ ಯಾರೂ ದೂರು ಕೊಟ್ಟಿರಲಿಲ್ಲ. ಬಾಲಕನ ಸಾವಿನ ಘಟನೆಯಿಂದ ಬಹಳ ನೋವಾಗಿದೆ. ಈ ದುರಂತದ ಬಗ್ಗೆ ತನಿಖೆ ಮಾಡಿಸಿ, ತಪ್ಪಿತಸ್ಥ ಅಕಾರಿಗಳ ವಿರುದ್ಧ ಶಿಸ್ತುಕ್ರಮ ಜರುಗಿಸುತ್ತೇವೆ.’ ಎಂದು ಹೇಳಿದರು.