ಟೆಹ್ರಾನ್: ಚೀನಾದಲ್ಲಿ ಮಹಾಮಾರಿಯಾಗಿ ಕಾಡಿ ಈಗ ಕೊಂಚ ಸುಧಾರಿಸಿರುವ ಕೊರೊನಾ ವೈರಸ್ ಇದೀಗ ಇರಾನ್ನಲ್ಲಿ ತನ್ನ ಯಮರೂಪವನ್ನು ತೋರಿಸಲಾರಂಭಿಸಿದೆ. ಇರಾನ್ ಉಪಾಧ್ಯಕ್ಷರು ಸೇರಿ ದೇಶದಲ್ಲಿ ಒಟ್ಟು 245 ಜನರಿಗೆ ಕೊರೊನಾ ವೈರಸ್ ತಗುಲಿರುವುದು ಧೃಡವಾಗಿದೆ.
ಕೊರೊನಾ ವೈರಸ್ ಕುರಿತಾಗಿ ಸುದ್ದಿಗೋಷ್ಠಿ ನಡೆಸಿರುವ ಇರಾನ್ನ ಆರೋಗ್ಯ ಸಚಿವಾಲಯ, ಒಂದೇ ದಿನದಲ್ಲಿ 106 ಜನರಲ್ಲಿ ವೈರಸ್ ಪತ್ತೆಯಾಗಿದ್ದು, ಇದುವರೆಗೆ ಒಟ್ಟು 245 ಜನರಲ್ಲಿ ವೈರಸ್ ಇರುವುದು ಧೃಡವಾಗಿದೆ ಎಂದು ತಿಳಿಸಿದೆ. 26 ಜನರು ಈ ವೈರಸ್ನಿಂದಾಗಿ ಮೃತರಾಗಿರುವ ಮಾಹಿತಿಯನ್ನು ಸಚಿವಾಲಯ ಹಂಚಿಕೊಂಡಿದೆ.
ಇರಾನ್ನಲ್ಲಿ ಒಟ್ಟು ಏಳು ಉಪಾಧ್ಯಕ್ಷರುಗಳಿದ್ದು ಅದರಲ್ಲಿ ಮಹಿಳಾ ವ್ಯವಹಾರಗಳ ಮೇಲ್ವಿಚಾರಣೆಯ ಜವಾಬ್ದಾರಿಯನ್ನು ಹೊತ್ತಿರುವ ಮಸೌಮೆಹ್ ಎಬ್ಟೆಕರ್ಗೆ ವೈರಸ್ ಸೋಂಕಿದೆ. ಸದ್ಯ ಮಸೌಮೆಹ್ ಎಬ್ಟೆಕರ್ ಅವರಿಗೆ ಮನೆಯಲ್ಲಿಯೇ ಪ್ರತ್ಯೇಕವಾಗಿ ಚಿಕಿತ್ಸೆ ನೀಡಲಾಗುತ್ತಿದ್ದು, ಅವರೊಟ್ಟಿಗಿದ್ದ ಅಧಿಕಾರಿ ವರ್ಗದವರನ್ನು ತಪಾಸಣೆಗೆ ಒಳಪಡಿಸಲಾಗಿದೆ.
ಸಂಸತ್ತಿನ ರಾಷ್ಟ್ರೀಯ ಭದ್ರತೆ ಮತ್ತು ವಿದೇಶಾಂಗ ವ್ಯವಹಾರಗಳ ಸಮಿತಿಯ ಮುಖ್ಯಸ್ಥ ಮೊಜ್ತಾಬಾ ಜೊಲ್ನೋರ್ ಅವರಿಗೂ ಸಹ ಸೋಂಕು ತಗುಲಿರುವುದು ವರದಿಯಾಗಿದೆ. ಫೆಬ್ರವರಿ 19ರಂದು ದೇಶದಲ್ಲಿ ಮೊದಲ ಕೊರೊನಾ ವೈರಸ್ ಪತ್ತೆಯಾಗಿದ್ದು ಅಂದಿನಿಂದ ಇಂದಿನವರೆಗೆ ಸೋಂಕಿತರ ಸಂಖ್ಯೆ ಹೆಚ್ಚುತ್ತಲೇ ಸಾಗುತ್ತಿದೆ. (ಏಜೆನ್ಸೀಸ್)