ನವದೆಹಲಿ: ಕರೊನಾ ವೈರಸ್ ಸೋಂಕಿತರ ತಪಾಸಣೆಗೆಂದು ಒದಗಿಸಲಾಗಿರುವ ಚೀನಿ ನಿರ್ವಿುತ ಕ್ಷಿಪ್ರ ಪರೀಕ್ಷಾ ಕಿಟ್ಗಳು (ರ್ಯಾಪಿಡ್ ಟೆಸ್ಟ್ ಕಿಟ್) ದೋಷಪೂರಿತವಾಗಿವೆ ಎಂದು ದೂರಿರುವ ಹಲವು ರಾಜ್ಯಗಳು ಅವುಗಳ ಬಳಕೆಗೆ ನಿರಾಕರಿಸಿವೆ. ಈ ಬಗ್ಗೆ ಪರಿಶೀಲನೆ ನಡೆಸುವುದಾಗಿ ಹೇಳಿರುವ ಭಾರತೀಯ ವೈದ್ಯಕೀಯ ಸಂಶೋಧನಾ ಮಂಡಳಿ (ಐಸಿಎಂಆರ್), ಮುಂದಿನ ಎರಡು ದಿನ ಈ ಕಿಟ್ಗಳನ್ನು ಬಳಸದಂತೆ ರಾಜ್ಯಗಳಿಗೆ ಸೂಚಿಸಿದೆ.
ಈ ತಿಂಗಳ ಆರಂಭದಲ್ಲಿ ಭಾರತ ಸರ್ಕಾರ ಚೀನಾದಿಂದ 6.5 ಲಕ್ಷ ರ್ಯಾಪಿಡ್ ಟೆಸ್ಟ್ ಕಿಟ್ ತರಿಸಿಕೊಂಡಿತ್ತು. ದೇಶದಾದ್ಯಂತ ಕರೊನಾ ಹಾಟ್ಸ್ಪಾಟ್ಗಳಲ್ಲಿ ತಪಾಸಣೆಗಾಗಿ ವಿತರಿಸುವಂತೆ ಐಸಿಎಂಆರ್ ಸೂಚಿಸಿದ ಮೇರೆಗೆ ರಾಜ್ಯಗಳಿಗೆ ನೀಡಲಾಗಿತ್ತು. ಈ ಕಿಟ್ಗಳು ಚೀನಾದಿಂದ ಬಂದ ಕೂಡಲೇ ಅವುಗಳ ಗುಣಮಟ್ಟದ ಕುರಿತು ಕೆಲವು ಮಾಧ್ಯಮಗಳು ಅನುಮಾನ ವ್ಯಕ್ತಪಡಿಸಿದ್ದರಿಂದ ವಿವಾದ ಹುಟ್ಟಿಕೊಂಡಿತ್ತು.
ಒಂದು ವೇಳೆ ಇಡೀ ಬ್ಯಾಚ್ನ ಕಿಟ್ಗಳು ಕಳಪೆಯಾಗಿದ್ದರೆ ಎಲ್ಲ ಕಿಟ್ಗಳಿಗೆ ಬದಲಿ ನೀಡುವಂತೆ ಸಂಬಂಧಿತ ಕಂಪನಿಗೆ ಕೇಳಲಾಗುವುದು ಎಂದು ಅಧಿಕಾರಿಗಳು ಹೇಳಿದ್ದಾರೆ. ಮಾಧ್ಯಮ ವರದಿಗಳನ್ನು ಪ್ರಸ್ತಾಪಿಸಿದ ಚೀನಿ ಅಧಿಕಾರಿಗಳು, ಕಿಟ್ಗಳು ಕಳಪೆ ಎನ್ನುವುದನ್ನು ನಿರಾಕರಿಸಿ, ‘ವೈದ್ಯಕೀಯ ಉತ್ಪನ್ನಗಳ ರಫ್ತಿಗೆ ನಮ್ಮ ದೇಶ ತುಂಬಾ ಮಹತ್ವ ನೀಡುತ್ತದೆ’ ಎಂದಿದ್ದರು. ಭಾರತ ಸೇರಿದಂತೆ ಹಲವು ದೇಶಗಳು ರಾಜತಾಂತ್ರಿಕ ಮಾರ್ಗದ ಮೂಲಕ ಕಿಟ್ಗಳಿಗೆ ಬೇಡಿಕೆ ಮಂಡಿಸಿದ್ದವು.
ರಾಜಸ್ಥಾನದಲ್ಲಿ ಪರೀಕ್ಷೆ ಸ್ಥಗಿತ
ಚೀನಿ ಕಿಟ್ಗಳಿಂದ ತಪಾಸಣೆ ನಡೆಸುವುದನ್ನು ರಾಜಸ್ಥಾನ ಮಂಗಳವಾರ ಸ್ಥಗಿತಗೊಳಿಸಿದೆ. ಈ ಕಿಟ್ಗಳು ಕೇವಲ ಶೇಕಡಾ 5.4 ಪರಿಣಾಮಕಾರಿಯಾಗಿವೆ ಎಂದು ಆರೋಗ್ಯ ಇಲಾಖೆಯ ಅಧಿಕಾರಿಗಳು ಹೇಳಿದ್ದಾರೆ. ಕಿಟ್ಗಳ ಪರಿಣಾಮವನ್ನು ಪರಿಶೀಲಿಸಲು ಸವಾಯ್ ಮಾನ್ ಸಿಂಗ್ ಆಸ್ಪತ್ರೆಯ ವೈದ್ಯಕೀಯ ಹಾಗೂ ಸೂಕ್ಷ್ಮ ಜೀವ ವಿಜ್ಞಾನ ವಿಭಾಗದ ಮುಖ್ಯಸ್ಥರ ಸಮಿತಿ ರಚಿಸಲಾಗಿತ್ತು.
ಆಂಟಿ ಬಾಡಿ ಪರೀಕ್ಷೆ ಬೇಡ
ರ್ಯಾಪಿಡ್ ಟೆಸ್ಟ್ ಕಿಟ್ಗಳಲ್ಲಿ ದೋಷವಿರುವ ದೂರುಗಳು ಬಂದಿರುವ ಹಿನ್ನೆಲೆಯಲ್ಲಿ ಕೊವಿಡ್-19 ರೋಗಿಗಳಿಗೆ ಎರಡು ದಿನದ ಮಟ್ಟಿಗೆ ಹೊಸ ಆಂಟಿ ಬಾಡಿ ಪರೀಕ್ಷೆ ನಡೆಸದಿರಲು ಐಸಿಎಂಆರ್ ಎಲ್ಲ ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳಿಗೆ ಸೂಚಿಸಿದೆ.