ಬ್ಯಾಂಕಾಕ್: ವಿಶ್ವ ಆರೋಗ್ಯ ಸಂಸ್ಥೆ ಜಾಗತಿಕ ಸಾರ್ವಜನಿಕ ಆರೋಗ್ಯ ತುರ್ತು ಪರಿಸ್ಥಿತಿ ಘೋಷಿಸಿರುವ ಹೊಸ ಅಪಾಯಕಾರಿ ವೈರಸ್ mpoxನ ಮೊದಲ ಶಂಕಿತ ಪ್ರಕರಣವನ್ನು ಥೈಲ್ಯಾಂಡ್ ಬುಧವಾರ(ಆಗಸ್ಟ್ 21) ವರದಿ ಮಾಡಿದೆ.
ಇತ್ತೀಚೆಗೆ ಆಫ್ರಿಕಾದಿಂದ ಆಗಮಿಸಿದ ಪ್ರಯಾಣಿಕನಲ್ಲಿ ಹೊಸ ಎಂಪಾಕ್ಸ್ ಪ್ರಕರಣವನ್ನು ಗುರುತಿಸಲಾಗಿದೆ. ಖಚಿತಪಡಿಸಿಕೊಳ್ಳಲು ಸೋಂಕಿತರನ್ನು ಪರೀಕ್ಷೆಗಾಗಿ ಆಸ್ಪತ್ರೆಗೆ ಕಳಹಿಸಲಾಗಿದ್ದು ರಿಪೋರ್ಟ್ಗಾಗಿ ಕಾಯುತ್ತಿರುವುದಾಗಿ ರೋಗ ನಿಯಂತ್ರಣ ವಿಭಾಗದ ಮುಖ್ಯಸ್ಥ ಥಾಂಗ್ಚಾಯ್ತಿಳಿಸಿದರು.
ಸೋಂಕಿನ ವ್ಯಕ್ತಿ ಆಗಸ್ಟ್ 14ರಂದು ಬ್ಯಾಂಕಾಕ್ಗೆ ಬಂದಿಳಿದಿದ್ದಾರೆ. ಅವರನ್ನು ಮರುದಿನ ಆಸ್ಪತ್ರೆಗೆ ಸೇರಿಸಲಾಗಿದೆ. ಸದ್ಯ ಅವರನ್ನು ಕ್ವಾರಂಟೈನ್ ಮಾಡಲಾಗಿದೆ. ಅವರಲ್ಲಿ ಎಂಪಾಕ್ಸ್ ರೋಗಲಕ್ಷಣಗಳಿವೆ. ಸದ್ಯ ಪ್ರಯೋಗಾಲಯದಲ್ಲಿ ಪರೀಕ್ಷೆಗಳು ನಡೆಯುತ್ತಿವೆ. ಅಲ್ಲದೆ ಸೋಂಕಿತರ ನಿಕಟ ಸಂಪರ್ಕಕ್ಕೆ ಬಂದ 42 ಜನರನ್ನು ಆರೋಗ್ಯ ಅಧಿಕಾರಿಗಳು ಮೇಲ್ವಿಚಾರಣೆ ಮಾಡುತ್ತಿದ್ದಾರೆ ಎಂದು ಥಾಂಗ್ಚಾಯ್ ತಿಳಿಸಿದರು.
ಎಂಪಾಕ್ಸ್ ಎಂದು ಕರೆಯಲ್ಪಡುವ ಮಂಕಿಪಾಕ್ಸ್ ಪ್ರಕರಣಗಳು ಮತ್ತು ಸಾವುಗಳು ಆಫ್ರಿಕಾದಲ್ಲಿ ಹೆಚ್ಚುತ್ತಿವೆ. ಇತ್ತೀಚೆಗೆ ವಿಶ್ವಸಂಸ್ಥೆಯು ಈ ಸೋಂಕನ್ನು ಸಾರ್ವಜನಿಕ ಆರೋಗ್ಯ ತುರ್ತು ಪರಿಸ್ಥಿತಿ ಎಂದು ಘೋಷಿಸಿದೆ. ಇದು ಪ್ರಾಣಿಗಳಿಂದ ಹರಡುವ ವೈರಸ್ ಆಗಿದ್ದು, ನಿಕಟ ದೈಹಿಕ ಸಂಪರ್ಕದ ಮೂಲಕ ಮನುಷ್ಯರಲ್ಲಿ ಒಬ್ಬರಿದಂದ ಒಬ್ಬರಿಗೆ ಹರಡುತ್ತದೆ.
ಎಂಪಾಕ್ಸ್ ಸೋಂಕಿನ ಲಕ್ಷಣಗಳು: ಸೋಂಕು ಬಂದ 3 ರಿಂದ 17ದಿನಗಳ ನಂತರ ಪರಿಣಾಮಗಳು ಕಾಣಿಸಿಕೊಳ್ಳುತ್ತವೆ. ಜ್ವರ, ಚರ್ಮದ ದದ್ದುಗಳು, ಉಬ್ಬಿರುವ ರಕ್ತನಾಳಗಳು, ತಲೆನೋವು, ದೇಹದ ಸೆಳೆತ, ಬೆನ್ನು ನೋವು, ಶೀತ ಮತ್ತು ಆಯಾಸ ಇವು ಮಂಕಿಪಾಕ್ಸ್ನ ಲಕ್ಷಣಗಳಾಗಿವೆ. ಚರ್ಮದ ದದ್ದುಗಳ ಜತೆಗೆ ಮುಖ್ಯವಾಗಿ ಬಾಯಿ, ಕೈ ಮತ್ತು ಕಾಲುಗಳಲ್ಲಿಯೂ ದದ್ದುಗಳು ಸಂಭವಿಸುತ್ತವೆ.(ಏಜೆನ್ಸೀಸ್)