ನವದೆಹಲಿ: ಉಚ್ಛಾಟಿತ ಸೈರಸ್ ಮಿಸ್ತ್ರಿಯನ್ನು ದೇಶದ ಅತಿದೊಡ್ಡ ಉದ್ಯಮ ಸಮೂಹ ಸಂಸ್ಥೆ ಟಾಟಾ ಸನ್ಸ್ ಕಾರ್ಯನಿರ್ವಾಹಕ ಅಧ್ಯಕ್ಷರನ್ನಾಗಿ ಮರುನೇಮಕ ಮಾಡಿರುವ ನ್ಯಾಷನಲ್ ಲಾ ಅಪೀಲ್ ಟ್ರಿಬ್ಯುನಲ್(ಎನ್ಸಿಎಲ್ಎಟಿ) ಕ್ರಮವನ್ನು ಪ್ರಶ್ನಿಸಿ ಟಾಟಾ ಸನ್ಸ್ ಗುರುವಾರ ಸುಪ್ರೀಂಕೋರ್ಟ್ ಮೆಟ್ಟಿಲೇರಿದೆ.
ಎನ್ಸಿಎಲ್ಎಟಿ ನೀಡಿರುವ ಆದೇಶಕ್ಕೆ ತಕ್ಷಣೆ ತಡೆನೀಡುವಂತೆ ಟಾಟಾ ಸನ್ಸ್ ಸುಪ್ರೀಂಕೋರ್ಟ್ಗೆ ಸಲ್ಲಿಸಿರುವ ಅರ್ಜಿಯಲ್ಲಿ ಕೋರಿದೆ.
ಟಾಟಾ ಸನ್ಸ್ ಅಧ್ಯಕ್ಷ ಸ್ಥಾನದಿಂದ 2012 ರಲ್ಲಿ ರತನ್ ಟಾಟಾ ನಿವೃತ್ತಿಯಾದಾಗ, ಟಾಟಾ ಸನ್ಸ್ ಅಧ್ಯಕ್ಷರಾಗಿ ಸೈರಸ್ ಮಿಸ್ತ್ರಿ ನೇಮಕವಾಗಿದ್ದರು. 2016 ರಲ್ಲಿ ರತನ್ ಟಾಟಾ ಮತ್ತು ಇತರ ನಿರ್ದೇಶಕರು ಮಿಸ್ತ್ರಿಯನ್ನು ಏಕಾಏಕಿ ಟಾಟಾ ಸನ್ಸ್ ಅಧ್ಯಕ್ಷ ಸ್ಥಾನದಿಂದ ಉಚ್ಚಾಟಿಸಿದ್ದರು.
ಬಳಿಕ ಈ ಕ್ರಮವನ್ನು ಸೈರಸ್ ಮಿಸ್ತ್ರಿ ಎನ್ಸಿಎಲ್ಎಟಿಯಲ್ಲಿ ಪ್ರಶ್ನಿಸಿದ್ದರು. ವಿಚಾರಣೆ ನಡೆಸಿದ ಇಬ್ಬರು ನ್ಯಾಯಮೂರ್ತಿಗಳನ್ನೊಳಗೊಂಡ ಪೀಠವು ಡಿಸೆಂಬರ್ 18ರಂದು ಸೈರಸ್ ಮಿಸ್ತ್ರಿಯನ್ನು ಮರು ನೇಮಕಗೊಳಿಸಿತ್ತು. ಅಲ್ಲದೆ, ಸೈರಸ್ ಮಿಸ್ತ್ರಿ ಅವರ ಜಾಗಕ್ಕೆ ಎನ್ ಚಂದ್ರಶೇಖರ್ ಅವರ ಆಯ್ಕೆ ಕಾನೂನು ಬಾಹಿರ ಎಂದು ಹೇಳಿತ್ತು. (ಏಜೆನ್ಸೀಸ್)