ಇಂಗ್ಲೀಷ್ ಸೇರಿ ಬೇರೆ ಭಾಷೆಗಳ ಪದಗಳನ್ನು ಶೀರ್ಷಿಕೆಯಲ್ಲಿ ಬಳಸುವುದು ಸಾಮಾನ್ಯ. ಕೆಲವೊಮ್ಮೆ ಪಾತ್ರಗಳ ನೇಟಿವಿಟಿಗೆ ಅನುಗುಣವಾಗಿ ಬೇರೆ ಭಾಷೆಗಳಲ್ಲೇ ಡೈಲಾಗ್ಸ್ ಕೂಡ ಇರುತ್ತವೆ. ಆದರೆ, ಹಾಡುಗಳಲ್ಲಿ ಕೆಲವೊಮ್ಮೆ ಬೇರೆ ಭಾಷೆಯ ಪದಗಳನ್ನು ಅಲ್ಲಲ್ಲಿ ಬಳಸಿರುವುದು ಬಿಟ್ಟರೆ, ಪರಭಾಷೆಯನ್ನು ಬಳಸಿರುವುದು ತೀರಾ ಅಪರೂಪ. ಅಂಥದ್ದೇ ಒಂದು ಪ್ರಯೋಗ ಪ್ರಾಣ್ ಸುವರ್ಣ ಚೊಚ್ಚಲ ಬಾರಿಗೆ ಆ್ಯಕ್ಷನ್-ಕಟ್ ಹೇಳುತ್ತಿರುವ "ರುಕ್ಮಿಣಿ ರಾಧಾಕೃಷ್ಣ' ಚಿತ್ರದಲ್ಲಿ ನಡೆದಿದೆ. ಸುನಾದ್ ಗೌತಮ್ ಸಂಗೀತದಲ್ಲಿ, ಕೆ.ಕಲ್ಯಾಣ್ ಈ ಪ್ರಯೋಗ ಮಾಡಿದ್ದು, ನಿನಾದ ನಾಯಕ್, ಸಂಜನಾ ಪೈ ಧ್ವನಿಯಾಗಿದ್ದಾರೆ. "ರಾಧೇಕ್ಕುಮ್ ಕಣ್ಣನುಕ್ಕುಂ' ಎಂದು ಸಾಗುವ ಈ ಹಾಡಿನಲ್ಲಿ ಕನ್ನಡ ಮತ್ತು ತಮಿಳು ಭಾಷೆಗಳನ್ನು ಸಮನಾಗಿ ಬಳಸಲಾಗಿದೆ. "ಮೆಜೆಸ್ಟಿಕ್ 2' ನಟ ಭರತ್ ಕುಮಾರ್, ಮೋಕ್ಷಿತಾ ಪೈ ಮತ್ತು ರಿಯಾ ಸಚ್ದೇವ್ ಮುಖ್ಯ ಭೂಮಿಕೆಯಲ್ಲಿ ನಟಿಸಿರುವ ತ್ರಿಕೋನ ಪ್ರೇಮಕಥೆಯಾಗಿದ್ದು, ಇತ್ತೀಚೆಗಷ್ಟೆ ಈ ರೊಮ್ಯಾಂಟಿಕ್ ಹಾಡನ್ನು ಬಿಡುಗಡೆ ಮಾಡಲಾಯಿತು. ಸಾಹಿತಿ ಕೆ. ಕಲ್ಯಾಣ್, "ಈ ಹಿಂದೆ ತಮಿಳು ಚಿತ್ರವೊಂದರ ಹಾಡಿಗೆ ಕನ್ನಡದಲ್ಲಿ ಕೆಲ ಸಾಲುಗಳನ್ನು ಬರೆದಿದ್ದೆ. ಈ ಚಿತ್ರದ ನಾಯಕಿಗೆ ತಮಿಳು ಹಿನ್ನೆಲೆಯಿರುವ ಕಾರಣ, ಇದೇ ಮೊದಲ ಬಾರಿಗೆ ತಮಿಳಿನಲ್ಲಿ ಸಾಲು ಬರೆದಿದ್ದೇನೆ' ಎಂದರು. ನಾಯಕ ಭರತ್ ಕುಮಾರ್, "ರುಕ್ಮಿಣಿಗೂ ಕೃಷ್ಣನಿಗೂ ಮಧ್ಯೆ ಇರುವ ಆತ್ಮವೇ ರಾಧಾ. ಕುಂಭಕೋಣಂನಲ್ಲಿ ಈ ಹಾಡನ್ನು ಚಿತ್ರೀಕರಿಸಿದ್ದೇವೆ' ಎಂದರು. ಈಗಾಗಲೇ ಚಿತ್ರದ ಶೇಕಡಾ 90ರಷ್ಟು ಚಿತ್ರೀಕರಣ ಪೂರ್ಣಗೊಂಡಿದ್ದು, ಜತೆಗೆ ಇನ್ನೊಂದು ಹಾಡು ಮಾತ್ರ ಬಾಕಿಯಿದೆ.