ಮದ್ದೂರು: ತಾಲೂಕಿನ ತೈಲೂರು ಅಮ್ಮನವರ ವೀರಹಬ್ಬದ (ಈರಬ್ಬ) ಶುಕ್ರವಾರ ಸಡಗರ ಸಂಭ್ರಮದಿಂದ ಆರಂಭಗೊಂಡಿತು.
ಶುಕ್ರವಾರ ಮತ್ತು ಶನಿವಾರ ಎರಡು ದಿನಗಳು ನಡೆಯುವ ಹಬ್ಬಕ್ಕೆ ಈಗಾಗಲೇ ಸಕಲ ಸಿದ್ಧತೆಗಳನ್ನು ಮಾಡಿಕೊಳ್ಳಲಾಗಿದ್ದು, ಸುತ್ತಮುತ್ತಲ ಗ್ರಾಮಗಳ ಸಾವಿರಾರು ಭಕ್ತಾದಿಗಳು ಹಬ್ಬಕ್ಕೆ ಆಗಮಿಸಲಿದ್ದಾರೆ.
ಶುಕ್ರವಾರ ಈರಬ್ಬ ಅಂಗವಾಗಿ ಬೆಳಗ್ಗೆ 9 ಗಂಟೆಗೆ ಅಭಿಷೇಕ, ಅರ್ಚನೆ, ಮಹಾಮಂಗಳಾರತಿ, ತೀರ್ಥಪ್ರಸಾದ ವಿನಿಯೋಗ ಮಾಡಲಾಯಿತು. ಮಧ್ಯಾಹ್ನ 2 ಗಂಟೆಗೆ ತೈಲೂರು ಮತ್ತು ಸುತ್ತಮುತ್ತಲಿನ ಗ್ರಾಮದವರಿಂದ ಮೀಸಲು, ತಂಬಿಟ್ಟಿನ ಆರತಿ ಶ್ರೀ ತೈಲೂರಮ್ಮ, ಅವೇರಹಳ್ಳಿ, ಶ್ರೀ ಪಟ್ಟಲದಮ್ಮ, ಹುಣಸೇಮರದದೊಡ್ಡಿ ಶ್ರೀ ಮಾರಮ್ಮನವರಿಗೆ ಹೂ ಹೊಂಬಾಳೆ ಕಾರ್ಯಕ್ರಮ ಯಶಸ್ವಿಯಾಗಿ ಜರುಗಿತು.
ಶನಿವಾರ ಅರ್ಚನೆ, ನೈವೇದ್ಯ, ಮಹಾಮಂಗಳಾರತಿ, ತೀರ್ಥ ಪ್ರಸಾದ ವಿನಿಯೋಗ, ಮಧ್ಯಾಹ್ನ 1 ಗಂಟೆಗೆ ಸಹಸ್ರಾರು ಭಕ್ತಾದಿಗಳಿಗೆ ಅನ್ನ ಸಂತರ್ಪಣೆ ಹಮ್ಮಿಕೊಳ್ಳಲಾಗಿದೆ. ಸಾಯಂಕಾಲ ಶ್ರೀ ತೈಲೂರಮ್ಮ, ಅವೇರಹಳ್ಳಿ ಶ್ರೀ ಪಟ್ಟಲದಮ್ಮ, ಹುಣಸೇಮರದದೊಡ್ಡಿ ಶ್ರೀ ಮಾರಮ್ಮನವರ ಉತ್ಸವ ತೈಲೂರು ಗ್ರಾಮದಲ್ಲಿ ಅದ್ದೂರಿಯಾಗಿ ನಡೆಯಲಿದೆ ಎಂದು ಶ್ರೀ ತೈಲೂರಮ್ಮ (ಪಟ್ಟಲದಮ್ಮ) ಸೇವಾ ಟ್ರಸ್ಟ್ ಅಧ್ಯಕ್ಷ ಡಾ.ಟಿ.ಚಂದ್ರು ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.