ಪ್ರೇಯಸಿಗೆ ಚಾಕು ಚುಚ್ಚಿ ಪೆಟ್ರೋಲ್​ ಬಾಂಬ್​ ಸ್ಫೋಟಿಸಿಕೊಂಡ ಪ್ರೇಮಿ! ಕಾರಿನಲ್ಲಿ ಏನಾಯ್ತು? ಚಾಲಕ ಬಿಚ್ಚಿಟ್ಟ ಭೀಕರ ಸಂಗತಿಗಳಿವು...

ತುಮಕೂರು: ಬೆಂಗಳೂರು-ಪುಣೆ ರಾಷ್ಟ್ರೀಯ ಹೆದ್ದಾರಿಯಲ್ಲಿ ನಡೆದ ಅತ್ಯಂತ ಭೀಕರ ಘಟನೆಯೊಂದು ಸದ್ಯ ರಾಜ್ಯದ ಜನತೆಯನ್ನು ಅಕ್ಷರಶಃ ನಡುಗಿಸಿದೆ.

ಪ್ರೀತಿಸಿದ ಹುಡುಗಿ ಜೊತೆಗೆ ಕಾರಿನೊಳಗೆ ಗಲಾಟೆ ಮಾಡಿಕೊಂಡ ಪಾಗಲ್​ ಪ್ರೇಮಿ, ತುಮಕೂರಿನ ಸಮೀಪ ಯುವತಿಗೆ ಚಾಕುವಿನಿಂದ ಇರಿದಿದ್ದಲ್ಲದೇ, ಆಕೆ ಕಾರಿನಿಂದ ಹೊರಗಿಳಿದ ಬೆನ್ನಲ್ಲೇ ತಾನು ಮೊದಲೇ ಪ್ಲ್ಯಾನ್​ ಮಾಡಿಕೊಂಡು ತಂದಿದ್ದ ಪೆಟ್ರೋಲ್​ ಬಾಂಬ್​ ಸ್ಪೋಟಿಸಿಕೊಂಡು ಸಜೀವ ದಹನವಾದ ಘಟನೆ ತುಮಕೂರಿನ ಶಿರಾ ತಾಲೂಕಿನ ಜೋಗಿಹಳ್ಳಿ ಬಳಿ ನಡೆದಿದೆ.

ಬೆಳಗ್ಗೆ 11 ಗಂಟೆ ಸುಮಾರಿಗೆ ಜಯನಗರದಿಂದ ಪಿಕ್​ಅಪ್​ ಮಾಡಿದೆ. ಅದು ಅಂಕೋಲಾ ಕಡೆಗೆ ಹೋಗಬೇಕು ಎಂದು ಹೇಳಿದ್ರು. ಪೆಟ್ರೋಲ್​ ಹಾಕಿಸುವಾಗ ಬಂಕ್​ನಲ್ಲಿ ಇಳಿದು ಇಬ್ಬರೂ ವಾಶ್​ರೂಂಗೆ ಹೋಗಿದ್ರು. ಆಮೇಲೆ ಅಂಕೋಲಾ ಪೊಲೀಸ್​ ಠಾಣೆಯಿಂದ ನನಗೆ ಫೋನ್​ ಬಂತು. ಇದೊಂದು ಕಿಡ್ನ್ಯಾಪ್​ ಕೇಸ್​ ಅಂತ ನಮ್ಮ ಸಹೋದರ ಹೇಳಿದರು. ಅದು ಅವನಿಗೆ ಗೊತ್ತಾಯ್ತು. ಆ ಕ್ಷಣದಿಂದಲೇ ಚಾಕುವಿನಿಂದ ಆ ಹುಡುಗಿಗೆ ಚುಚ್ಚುತ್ತಿದ್ದ ಎಂದರು.

ಆಗ ನಾನೇ ಅವನಿಂದ ಚಾಕು ಕಿತ್ತು ಬಿಸಾಡಿದೆ. ಈ ವೇಳೆ ನನಗೂ ಆತನ ನಡುವೆ ಜಗಳ ನಡೆಯಿತು. ಇದೇ ಸಮಯದಲ್ಲಿ, ಹುಡುಗಿ ಡೋರ್ ತೆಗೆದು ಓಡಿ ಹೋದಳು. ಹೋಗುವಾಗ, ಅವನ ಬಳಿ ಬಾಂಬ್​ ಇದೆ ಅಣ್ಣ, ನೀವು ತಪ್ಪಿಸಿಕೊಳ್ಳಿ ಎಂದಳು. ತಕ್ಷಣವೇ ಬೆಂಕಿ ಹಚ್ಚಲು ಪ್ರಯತ್ನಿಸುತ್ತಿದ್ದ ಆತನಿಂದ ಪೆಟ್ರೋಲ್​ ಬಾಂಬ್​ ಕಿತ್ತೆಸೆದೆ. ಕಾರಿನ ಡಾಕ್ಯುಮೆಂಟ್ಸ್​ ತೆಗೆದು ಹೊರಬಂದ ಕೂಡಲೇ ಸ್ಫೋಟಿಸಿಕೊಂಡ. ಹೆಂಡತಿಯ ಒಡವೆಯನ್ನು ಅಡವಿಟ್ಟು ಕಾರಿ ಖರೀದಿಸಿದ್ದೆ ಎಂದು ಡ್ರೈವರ್​ ಅಳಲು ತೋಡಿಕೊಂಡಿದ್ದಾರೆ.

ಮೃತನನ್ನು ನಾಗೇಂದ್ರ (30) ಎಂದು ಗುರುತಿಸಲಾಗಿದ್ದು, ಯುವತಿಯನ್ನು ರಮ್ಯಾ ಉಲ್ಲಾಸ್ (23) ಎಂದು ಹೇಳಲಾಗಿದೆ. ಘಟನೆಯಲ್ಲಿ ರಮ್ಯಾಳಿಗೆ ತೀವ್ರ ಗಾಯಗಳಾಗಿದ್ದು, ತುಮಕೂರು ಜಿಲ್ಲಾಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾಳೆ. ಕಾರಿನಲ್ಲಿ ನಾಗೇಂದ್ರ ಮತ್ತು ರಮ್ಯಾ ಹಿಂಬದಿ ಸೀಟಿನಲ್ಲಿ ಕುಳಿತಿದ್ದರೆ, ಕ್ಯಾಬ್​ ಚಾಲಕ ಕಾರನ್ನು ಚಲಾಯಿಸುತ್ತಿದ್ದರು ಎಂದು ವಿವರಿಸಲಾಗಿದೆ.

ಮಾಹಿತಿಗಳ ಪ್ರಕಾರ, ಬೆಂಗಳೂರಿನ ಆಸ್ಪತ್ರೆಯಲ್ಲಿ ಲ್ಯಾಬ್​ ಟೆಕ್ನಿಷಿಯನ್ ಆಗಿ ಕೆಲಸ ಮಾಡುತ್ತಿದ್ದ ರಮ್ಯಾ ಉಲ್ಲಾಸ್, ಪ್ರೇಮಿ ನಾಗೇಂದ್ರ ಜೊತೆಗೆ ಬೆಂಗಳೂರಿನಿಂದ ಅಂಕೋಲಾಕ್ಕೆ ಖಾಸಗಿ ಕಾರಿನಲ್ಲಿ ಹೊರಟ್ಟಿದ್ದರು. ಮಾರ್ಗ ಮಧ್ಯೆ, ತುಮಕೂರು ಸಮೀಪಿಸುತ್ತಿದ್ದಂತೆ ನಾಗೇಂದ್ರ ಹಾಗೂ ರಮ್ಯಾ ನಡುವೆ ಯಾವುದೋ ವೈಯಕ್ತಿಕ ವಿಚಾರಕ್ಕೆ ವಾಗ್ವಾದ ನಡೆದಿದೆ ಎಂದು ಹೇಳಲಾಗಿದೆ.