ಸರ್ಕಾರದಿಂದಲೇ ಮತದಾರರ ಆಯ್ಕೆ

ಆಳಂದ: ಮತದಾರರು ಮತಹಾಕಿ ಸರ್ಕಾರ ರಚನೆ ಮಾಡುವುದು ಸಾಮಾನ್ಯ. ಇದೀಗ ಸರ್ಕಾರವೇ ಚುನಾವಣೆ ಆಯೋಗದ ಮೂಲಕ ಮತದಾರರನ್ನು ಆಯ್ಕೆ ಮಾಡುತ್ತಿದೆ ಎಂದು ಕೆಪಿಸಿಸಿ ಎಸ್​ಐಆರ್​ ಜಿಲ್ಲಾ ಉಸ್ತುವಾರಿ ಹಾಗೂ ವಿಧಾನ ಪರಿಷತ್​ ಸದಸ್ಯೆ ಉಮಾಶ್ರೀ ದೂರಿದರು.

ವೀರಶೈವ ಸಭಾಂಗಣದಲ್ಲಿ ಕಾಂಗ್ರೆಸ್​ನಿಂದ ಹಮ್ಮಿಕೊಂಡಿದ್ದ ವಿಧಾನಸಭಾ ಕ್ಷೇತ್ರದಲ್ಲಿ ನಡೆಯುತ್ತಿರುವ ಮತದಾರ ವಿಶೇಷ ತೀವ್ರ ಪರಿಷ್ಕರಣೆ (ಎಸ್​ಐಆರ್​) ಕಾರ್ಯದ ಪ್ರಗತಿ ಪರಿಶೀಲನೆ ಸಭೆಯಲ್ಲಿ ಮಾತನಾಡಿ, ಬಿಎಲ್​ಒಗಳು ಪ್ರತಿ ಮತದಾರರಿಗೆ ಎರಡು ಎನ್ಯುಮರೇಷನ್​ ಫಾಮ್​ರ್ ಕೊಡಬೇಕು. ಆದರೆ ಒಂದನ್ನು ಮಾತ್ರ ಕೊಡುತ್ತಿದ್ದಾರೆ. ಕಾಂಗ್ರೆಸ್​ ಪಕ್ಷದ ಬಿಎಲ್​ಎಗಳು ಇದರ ಬಗ್ಗೆ ಗಮನಹರಿಸಿ, ಎರಡರಲ್ಲಿ ಒಂದಕ್ಕೆ ಬಿಎಲ್​ಒ ಅವರಿಂದ ಸಹಿ ಹಾಕಿಸಿಕೊಂಡು ಹಿಂಪಡೆಯಬೇಕು. ಈಗಾಗಲೇ ಕ್ಷೇತ್ರದಲ್ಲಿ 10 ರಿಂದ 20 ಮತಗಟ್ಟೆಗಳಲ್ಲಿ ಶೇ.35, 30-40 ಮತಗಟ್ಟೆಗಳಲ್ಲಿ ಶೇ.50 ಪರಿಷ್ಕರಣೆ ಆಗಿದೆ. ಉಳಿದ ಮತಗಟ್ಟೆಗಳಲ್ಲಿ ಶೇ.70-75 ಕಾರ್ಯ ಮುಗಿದಿದೆ. ಇನ್ನಷ್ಟು ಪರಿಣಾಮಕಾರಿಯಾಗಿ ಕೆಲಸ ಆಗಬೇಕು ಎಂದು ಹೇಳಿದರು.

ಶಾಸಕ ಬಿ.ಆರ್​.ಪಾಟೀಲ್​ ಮಾತನಾಡಿ, ವಿಶೇಷ ಪರಿಷ್ಕರಣೆಯಲ್ಲಿ ದುರುದ್ದೇಶವಿದೆ. ಎಸ್​ಐಆರ್​ ಪ್ರಕ್ರಿಯೆಯಲ್ಲಿ ಕಾಂಗ್ರೆಸ್​ ಪರವಾಗಿ ಇರುವ ಮತದಾರರನ್ನು ಉದ್ದೇಶಪೂರ್ವಕವಾಗಿ ಕೈಬಿಡುವ ಹುನ್ನಾರ ನಡೆದಿದೆ. ಹೀಗಾಗಿ ಪಕ್ಷದ ಕಾರ್ಯಕರ್ತರು ಎಚ್ಚರಿಕೆ ವಹಿಸಬೇಕು. ವಿಶೇಷವಾಗಿ ಮುಸ್ಲಿಂ ಮತದಾರರು ಹಾಗೂ ಹೊರ ರಾಜ್ಯದಲ್ಲಿ ವಲಸೆ ಹೋದವರು ಎಸ್​ಐಆರ್​ ಪ್ರಕ್ರಿಯೆಯಿಂದ ಹೊರಗುಳಿಯದಂತೆ ನೋಡಿಕೊಳ್ಳಬೇಕು ಎಂದು ಸಲಹೆ ನೀಡಿದರು.

ಎಸ್​ಐಆರ್​ ಪ್ರಕ್ರಿಯೆ ಮುಗಿದ ನಂತರ ಜಿಪಂ, ತಾಪಂ, ಪುರಸಭೆ, ಗ್ರಾಪಂ ಚುನಾವಣೆ ನಡೆಸಲು ಸರ್ಕಾರ ಸಿದ್ಧವಾಗಿದೆ. ಅರ್ಹ ಮತದಾರರು ತಮ್ಮ ಮತದಾನ ಹಕ್ಕನ್ನು ಕಳೆದುಕೊಳ್ಳಬಾರದು. ವೋಟಿಂಗ್​ ಹಕ್ಕು ಇಲ್ಲದಿದ್ದರೆ ಸರ್ಕಾರ ವಿವಿಧ ಯೋಜನೆಗಳ ಲಾಭ ಪಡೆದುಕೊಳ್ಳಲು ಆಗಲ್ಲ. ಪಕ್ಷದ ಬಿಎಲ್​ಎ ಹಾಗೂ ಕಾರ್ಯಕರ್ತರು ಈ ಬಗ್ಗೆ ಜಾಗೃತಿ ಮೂಡಿಸಬೇಕು ಎಂದು ಕರೆ ನೀಡಿದರು.

ಜಿಪಂ ಮಾಜಿ ಸದಸ್ಯ ಸುಭಾಷ ರಾಠೋಡ್​ ಮಾತನಾಡಿದರು.

ವಿಧಾನ ಪರಿಷತ್​ ಸದಸ್ಯ ಹಾಗೂ ಕಾಂಗ್ರೆಸ್​ ಜಿಲ್ಲಾಧ್ಯಕ್ಷ ಜಗದೇವ ಗುತ್ತೇದಾರ್​, ಗ್ಯಾರಂಟಿ ಅನುಷ್ಠಾನ ಸಮಿತಿ ಜಿಲ್ಲಾ ಉಪಾಧ್ಯಕ್ಷ ಸೋಮಶೇಖರ ಹಿರೇಮಠ, ತಾಲೂಕು ಅಧ್ಯಕ್ಷ ಶಿವಪುತ್ರಪ್ಪ ಪಾಟೀಲ್​ ಮುನ್ನಹಳ್ಳಿ, ಪ್ರಮುಖರಾದ ಗುರುಲಿಂಗ ಪಾಟೀಲ್​, ಸುಭಾಷ ಮುರುಡ, ಕವಿತಾ ನಾಯಕ, ಗುರುಶರಣ ಪಾಟೀಲ್​, ಸಿದ್ದರಾಮ ಪ್ಯಾಟಿ, ಸಲಾಂ ಸಗರಿ ಇತರರಿದ್ದರು.

ಬಸವರಾಜ ಪವಾಡಶೆಟ್ಟಿ ಸ್ವಾಗತಿಸಿದರು. ರಾಜಶೇಖರ ಪಾಟೀಲ್​ ಹೆಬಳಿ ನಿರೂಪಣೆ ಮಾಡಿದರು.