Bengaluru Auto Driver ಸಾಂದರ್ಭಿಕ ಚಿತ್ರ
- ಬೆಂಗಳೂರಿಗೆ ಹಳ್ಳಿಯಿಂದ ಬಂದಿದ್ದ ಇಬ್ಬರು ಹುಡುಗರಿಗೆ ಹೆದರಿಸಿ 2,400 ಸುಲಿಗೆ ಮಾಡಿದ ಆರೋಪ
- 100 ಬಾಡಿಗೆಗೆ ಡೀಲ್ ಕುದುರಿಸಿ, ಕೊನೆಗೆ 3,000 ಡಿಮ್ಯಾಂಡ್ ಮಾಡಿದ ಬೆಂಗಳೂರು ಆಟೋ ಚಾಲಕ
- ನಿರ್ಜನ ಪ್ರದೇಶಕ್ಕೆ ಕರೆದೊಯ್ದು ಯುವಕರಿಗೆ ಜೀವಭಯ ಹುಟ್ಟಿಸಿದ ಆಟೋ ಡ್ರೈವರ್ನ ಕರಾಳ ಮುಖ ಬಯಲು
ಬೆಂಗಳೂರು: ಸಿಲಿಕಾನ್ ಸಿಟಿ ಬೆಂಗಳೂರಿನಲ್ಲಿ ಆಟೋ ಚಾಲಕನೊಬ್ಬ ನಗರಕ್ಕೆ ಮೊದಲ ಬಾರಿಗೆ ಬಂದಿದ್ದ ಇಬ್ಬರು ಹದಿಹರೆಯದ ಹುಡುಗರನ್ನು ಬೆದರಿಸಿ, ಜನರಿಲ್ಲದ ನಿರ್ಜನ ಪ್ರದೇಶಕ್ಕೆ ಕರೆದೊಯ್ದು ಸುಲಿಗೆ (Bengaluru Auto Driver) ಮಾಡಿರುವ ಆಘಾತಕಾರಿ ಘಟನೆಯೊಂದು ಬೆಳಕಿಗೆ ಬಂದಿದೆ. ಆದಾಗ್ಯೂ, ಈ ಕುರಿತು ಬೆಂಗಳೂರಿನ ಟೆಕ್ಕಿಯೊಬ್ಬರು ತಮ್ಮ ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿರುವ ಪೋಸ್ಟ್ ಇದೀಗ ಸಾರ್ವಜನಿಕ ವಲಯದಲ್ಲಿ ತೀವ್ರ ಆಕ್ರೋಶಕ್ಕೆ ಕಾರಣವಾಗಿದೆ.
ಪೋಸ್ಟ್ನಲ್ಲೇನಿದೆ?
ಸಾನು ಅವರ ಪೋಸ್ಟ್ ಪ್ರಕಾರ, ಸುಮಾರು 16 ರಿಂದ 18 ವರ್ಷ ವಯಸ್ಸಿನ ಇಬ್ಬರು ಹದಿಹರೆಯದ ಹುಡುಗರು ಹೊಸೂರಿಗೆ ಹೋಗಲು ಬಸ್ ಹಿಡಿಯುವ ಉದ್ದೇಶದಿಂದ ಸರ್ ಎಂ. ವಿಶ್ವೇಶ್ವರಯ್ಯ ಟರ್ಮಿನಲ್ನಿಂದ ಆಟೋ ಹತ್ತಿದ್ದರು. ಆರಂಭದಲ್ಲಿ ಆಟೋ ಚಾಲಕ ಇಬ್ಬರು ಹುಡುಗರಿಂದ ತಲಾ 50 ರೂಪಾಯಿಯಂತೆ ಒಟ್ಟು 100 ರೂಪಾಯಿಗೆ ನಿಗದಿತ ಸ್ಥಳಕ್ಕೆ ಡ್ರಾಪ್ ಮಾಡಲು ಒಪ್ಪಿಕೊಂಡಿದ್ದರು.
ಆದರೆ, ಸವಾರಿ ಮುಗಿಯುತ್ತಿದ್ದಂತೆ ಆಟೋ ಚಾಲಕ ತನ್ನ ಅಸಲಿ ಬುದ್ಧಿ ತೋರಿಸಿದ್ದಾನೆ. ಕೇವಲ 100 ರೂಪಾಯಿಗೆ ಒಪ್ಪಿದ್ದ ಚಾಲಕ, ಪ್ರಯಾಣ ಮುಗಿದ ತಕ್ಷಣ 35 ಕಿಲೋಮೀಟರ್ ದೂರದ ಸವಾರಿಗೆ ಬರೋಬ್ಬರಿ 3,000 ರೂಪಾಯಿ ನೀಡಬೇಕು ಎಂದು ಬೇಡಿಕೆ ಇಟ್ಟಿದ್ದಾನೆ. ಚಾಲಕನ ಈ ದಿಢೀರ್ ವರ್ತನೆಯಿಂದ ಕಕ್ಕಾಬಿಕ್ಕಿಯಾದ ಆ ಯುವಕರು ತಕ್ಷಣವೇ ತಮಗೆ ಪರಿಚಿತರಾದ ಸಾನು ಅವರಿಗೆ ಕರೆ ಮಾಡಿ ತಮಗಾದ ಪರಿಸ್ಥಿತಿಯನ್ನು ವಿವರಿಸಲು ಯತ್ನಿಸಿದ್ದಾರೆ.
ಈ ವೇಳೆ ಮತ್ತಷ್ಟು ಉದ್ಧಟತನ ತೋರಿದ ಆಟೋ ಚಾಲಕ, ಆ ಯುವಕರ ಕೈಲಿದ್ದ ಮೊಬೈಲ್ ಫೋನ್ ಅನ್ನು ಬಲವಂತವಾಗಿ ಕಸಿದುಕೊಂಡಿದ್ದಾನೆ. ಅಷ್ಟೇ ಅಲ್ಲದೆ, ಸಾನು ಅವರು ಫೋನ್ನಲ್ಲಿ ಮಾತನಾಡಲು ಯತ್ನಿಸಿದರೂ ಚಾಲಕ ಉತ್ತರಿಸಲು ಸಂಪೂರ್ಣವಾಗಿ ನಿರಾಕರಿಸಿದ್ದಾನೆ ಎಂದು ಸಾನು ತಮ್ಮ ಪೋಸ್ಟ್ನಲ್ಲಿ ಹೇಳಿದ್ದಾರೆ.
ಆದಾಗ್ಯೂ, ಅಪರಿಚಿತ ಸ್ಥಳದಲ್ಲಿ ಮೊಬೈಲ್ ಕೂಡ ಇಲ್ಲದೆ ಅಸಹಾಯಕರಾದ ಆ ಹದಿಹರೆಯದ ಹುಡುಗರು ಆಟೋ ಚಾಲಕನ ಬಳಿ ಸಾಕಷ್ಟು ಬಾರಿ ಗೋಗರೆದ ನಂತರ ಚಾಲಕ ಮೊಬೈಲ್ ಹಿಂತಿರುಗಿಸಿದ್ದಾರೆ. ಅಂತಿಮವಾಗಿ ಬೇರೆ ದಾರಿಯಿಲ್ಲದೇ ಆ ಯುವಕರು ಚಾಲಕನಿಗೆ 2400 ರೂ ನೀಡಿ ಅಲ್ಲಿಂದ ಜಾಗ ಕಾಲಿ ಮಾಡಿದ್ದಾರೆ.
ಬೆಂಗಳೂರು ಪೊಲೀಸರನ್ನು ಟ್ಯಾಗ್ ಮಾಡಿದ ಸಾನು, ಆಟೋ ಚಾಲಕನಿಗೆ ಮಾಡಿದ ಯುಪಿಐ ಪಾವತಿಯ ಸ್ಕ್ರೀನ್ಶಾಟ್ ಅನ್ನು ಹಂಚಿಕೊಂಡಿದ್ದು, ಅಧಿಕಾರಿಗಳು ಆತನ ವಿರುದ್ಧ ಕ್ರಮಕೈಗೊಳ್ಳುವಂತೆ ಒತ್ತಾಯಿಸಿದ್ದಾರೆ.
ಈ ಪೋಸ್ಟ್ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗುತ್ತಿದ್ದಂತೆಯೇ ಅನೇಕ ಬಳಕೆದಾರರನ್ನು ಸೆಳೆಯಿತು. ಒಬ್ಬ ಬಳಕೆದಾರರು ಆಟೋ ಚಾಲಕನ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಬೇಕೆಂದು ಒತ್ತಾಯಿಸಿದರು. ಆದಾಗ್ಯೂ, ನಗರಕ್ಕೆ ಕೆಟ್ಟ ಹೆಸರು ತರುವ ಜನರ ಪಟ್ಟಿಯಲ್ಲಿ ಆಟೋ ಗೂಂಡಾಗಳು ಅಗ್ರಸ್ಥಾನದಲ್ಲಿದ್ದಾರೆ. ಅವರು ಒಂದು ವರ್ಗದ ದುಷ್ಕರ್ಮಿಗಳು" ಎಂದು ಆಕ್ರೋಶ ಹೊರಹಾಕಿದ್ದಾರೆ. ಮತ್ತೊಬ್ಬ ಬಳಕೆದಾರ "ಇದು ವಿವರಿಸಿದಂತೆ ಸಂಭವಿಸಿದಲ್ಲಿ, ಅದು ಸ್ವೀಕಾರಾರ್ಹವಲ್ಲ. ಮಿತಿಮೀರಿದ ಚಾರ್ಜ್ ಮಾಡುವುದು ಮತ್ತು ಯಾರೊಬ್ಬರ ಫೋನ್ ಕಸಿದುಕೊಳ್ಳುವುದು ತಕ್ಷಣದ ಪೊಲೀಸರ ಗಮನಕ್ಕೆ ಅರ್ಹವಾದ ಗಂಭೀರ ಆರೋಪಗಳಾಗಿವೆ ಎಂದು ಕಾಮೆಂಟ್ ಮಾಡಿದ್ದಾರೆ (ಏಜೆನ್ಸೀಸ್).