ಮಕ್ಕಳ ಆತಂಕ ಕೇಂದ್ರವಾದ ಶಾಲೆ School

ಶ್ರೀನಿವಾಸಪುರ ತಾಲೂಕು ವೀರತಿಮ್ಮನಹಳ್ಳಿ ಸರ್ಕಾರಿ ಕನ್ನಡ ಕಿರಿಯ ಪ್ರಾಥಮಿಕ ಪಾಠಶಾಲೆಯಲ್ಲಿನ ಅಡುಗೆ ಕೋಣೆ ಶಿಥಿಲಾವ್ಯವಸ್ಥೆಗೆ ತಲುಪಿದ್ದು, ಮಳೆ ಬಂದರೆ ಕೊಠಡಿ ಸೋರುತ್ತಿದೆ. 8 ಮಂದಿ ವಿದ್ಯಾರ್ಥಿಗಳಿಗೆ ಒಬ್ಬರೇ ಶಿಕ್ಷಕ ಇದ್ದಾರೆ. ಮೂಲ ಸೌಲಭ್ಯ ಕಲ್ಪಿಸುವಂತೆ ಸಂಬಂಧಿಸಿದ ಅಧಿಕಾರಿಗಳಿಗೆ ಅರ್ಜಿ ಸಲ್ಲಿಸಿದರೂ ಪ್ರಯೋಜನವಾಗಿಲ್ಲ. ಮುಂದಿನ ದಿನಗಳಲ್ಲಿ ಶಾಲೆ ಮುಚ್ಚುವ ಸ್ಥಿತಿ ನಿಮಾರ್ಣವಾಗಿದೆ ಎಂದು ಪಾಲಕರು ಮತ್ತು ಸಾರ್ವಜನಿಕರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ತಾಲೂಕಿನ ಹೊದಲಿ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ವೀರತಿಮ್ಮನಹಳ್ಳಿ ಸರ್ಕಾರಿ ಶಾಲೆಯ ದುಸ್ಥಿತಿ ಶೋಚನೀಯವಾಗಿದ್ದು, ಅನ್ನಪೂರ್ಣೇಶ್ವರಿ ದಾಸ್ತಾನು ಅಡುಗೆ ಕೋಣೆ ಶಿಥಿಲಗೊಂಡಿರುವ ಕಾರಣ ಬೀಗ ಜಡಿಯಲಾಗಿದೆ. ಶಾಲಾ ಕಟ್ಟಡದ ಪಕ್ಕದಲ್ಲಿರುವ ಮತ್ತೊಂದು ಕೊಠಡಿಯಲ್ಲಿ ದಾಸೋಹ ಇಲಾಖೆಯಿಂದ ಸರಬರಾಜಾಗುವ ಅಕ್ಕಿ, ಬೇಳೆ, ತರಕಾರಿ ಇತರೆ ಆಹಾರ ಪದಾರ್ಥಗಳನ್ನು ಶೇಖರಣೆ ಮಾಡಲಾಗುತ್ತಿದೆ. ಮಳೆ ಬಂದರೆ ಕಟ್ಟಡದ ಮೇಲ್ಭಾಗ ಸೋರುತ್ತದೆ. ಅಡುಗೆ ಕೋಣೆ ನಿಮಾರ್ಣ, ಶೌಚಗೃಹ, ಕಾಂಪೌಂಡ್​ ನಿಮಾರ್ಣಕ್ಕೆ ಸಂಬಂಧಿಸಿ ಗ್ರಾಮ ಪಂಚಾಯಿತಿಗೆ, ಶಿಕ್ಷಣ ಇಲಾಖೆಗೆ ಪ್ರತಿವರ್ಷ ಅರ್ಜಿ ನೀಡಿದ್ದರೂ ಯಾರೂ ಕೂಡ ತಿರುಗಿ ನೋಡದಿರುವುದು ವಿಪರ್ಯಾಸವೇ ಸರಿ.

ಗ್ರಾಮದಲ್ಲಿ ಪರಿಶಿಷ್ಟ ಜಾತಿ, ಪರಿಶಿಷ್ಟ ಪಂಗಡ ಸಮುದಾಯದವರು ವಾಸವಾಗಿದ್ದು, School ಸುಮಾರು 5,0-60 ಕುಟುಂಬಗಳು ವಾಸವಿವೆ. ಶಾಲೆಯಲ್ಲಿ 1ರಿಂದ 5ನೇ ತರಗತಿಯವರೆಗೂ ದಾಖಲಾತಿಗೆ ಅವಕಾಶವಿದ್ದು, ಈ ವರ್ಷ 1ನೇ ತರಗತಿಗೆ ದಾಖಲಾತಿಯೇ ಇಲ್ಲ. 2ನೇ ತರಗತಿಗೆ ಇಬ್ಬರು, ಮೂರನೇ ತರಗತಿಗೆ ದಾಖಲಾತಿ ಇಲ್ಲ, ನಾಲ್ಕನೇ ತರಗತಿಗೆ 5 ಮಂದಿ, 5ನೇ ತರಗತಿಗೆ ಒಬ್ಬರು ಸೇರಿ ಒಟ್ಟು 8 ವಿದ್ಯಾರ್ಥಿಗಳು ದಾಖಲಾಗಿದ್ದಾರೆ. ಮುಂದಿನ ವರ್ಷದಲ್ಲಿ 4 ವಿದ್ಯಾರ್ಥಿಗಳು 5ನೇ ತರಗತಿ ಮುಗಿಸಿ 6ನೇ ತರಗತಿಗೆ ಮತ್ತೊಂದು ಶಾಲೆಗೆ ಹೋದಾಗ ಶಾಲೆ ಮುಚ್ಚುವುದು ಗ್ಯಾರಂಟಿಯಾಗಿದೆ. ಸರ್ಕಾರಿ ಶಾಲೆಗಳು ಮುಚ್ಚುವ ಹಂತಕ್ಕೆ ತಾಲೂಕಿನಲ್ಲಿ ಬಹುತೇಕ ಶಾಲೆಗಳು ಸಿದ್ಧವಾಗುತ್ತಿವೆ.