ಸಿಎಚ್​ಸಿ ಆಸ್ಪತ್ರೆ ಮುಚ್ಚುವ ನಿರ್ಧಾರ ಪರಿಶೀಲಿಸಿ

ಯಾದಗಿರಿ: ಗಿರಿ ಜಿಲ್ಲೆಯ ತಮ್ಮ ಮತೇತ್ರ ಗುರುಮಠಕಲ್​ ಸೇರಿ ವಿವಿಧೆಡೆ ಇರುವ ಐದು ಸಿಎಚ್​ಸಿ ಆಸ್ಪತ್ರೆ ಮುಚ್ಚುವ ನಿರ್ಧಾರ ಸರ್ಕಾರ ಮರು ಪರಿಶೀಲಿಸಬೇಕು ಎಂದು ಜೆಡಿಎಸ್​ ಶಾಸಕ ಶರಣಗೌಡ ಕಂದಕೂರ ಒತ್ತಾಯಿಸಿದರು.

ಅಧಿವೇಶನದಲ್ಲಿ ಮಂಗಳವಾರ ಆರೋಗ್ಯ, ಅಬಕಾರಿ ಮತ್ತು ಪೊಲೀಸ್​ ಇಲಾಖೆ ಜಿಲ್ಲೆಗೆ ಸಂಬಂಧಪಟ್ಟಂತೆಯೆ ಕೈಗೊಳ್ಳಬೇಕಾದ ಪ್ರಮುಖ ವಿಷಯಗಳನ್ನು ಸವಿಸ್ತಾರವಾಗಿ ಮಾತನಾಡುವ ಮೂಲಕ ಗಮನ ಸೆಳೆದರು.

ಮೊದಲೇ ನಮ್ಮ ಜಿಲ್ಲೆಯಲ್ಲಿ ಗುಳೆ ಹೋಗುವ ಜನರು ಹೆಚ್ಚು. ಅದರಲ್ಲೂ ಆರೋಗ್ಯ ಸಂಬಂಧಿತ ವಿವಿಧ ರೋಗಗಳಿಂದ ಬಳಲುವವರು ಹೆಚ್ಚು. ಹೀಗಿರಬೇಕಾದರೆ ಗ್ರಾಮೀಣ ಪ್ರದೇಶದಲ್ಲಿರುವ ಸಿಎಚ್​ಸಿ, ಪಿಎಚ್​ಸಿ ಆಸ್ಪತ್ರೆ ಬಂದ್​ ಮಾಡಲು ಮುಂದಾದರೆ ನಮ್ಮ ಜನರ ಆರೋಗ್ಯದ ಗತಿ ಏನಾಗಬೇಡ. ಹಳ್ಳಿ ಬಿಟ್ಟು ಗುರುಮಠಕಲ್​ ಬಂದು ಚಿಕಿತ್ಸೆ ಪಡೆಯರಿ ಎಂದರೆ ಜನರಿಗೆ ಆಗುವುದಿಲ್ಲ ಎಂದು ಸ್ಪಷ್ಟವಾಗಿ ಹೇಳಿದರು.

ಹಿಂದೆ ಡಾ.ಎ.ಬಿ.ಮಲಕರೆಡ್ಡಿ ಅವರು ಆರೋಗ್ಯ ಮಂತ್ರಿಗಳಿದ್ದಾಗ, ನಮ್ಮ ತಂದೆ ನಾಗನಗೌಡರು ಜಿಪಂ ಆರೋಗ್ಯ ಸ್ಥಾಯಿ ಸಮಿತಿ ಅಧ್ಯರಿದ್ದಾಗ ಕೆಲ ಊರುಗಳಿಗೆ ಸಿಎಚ್​ಸಿ ಮತ್ತು ಪಿಎಚ್​ಸಿ ಆಸ್ಪತ್ರೆಗಳು ಮಂಜೂರು ಮಾಡಿಸಿದ್ದರು. ಅವುಗಳನ್ನು ನೀವು ಬಂದ್​ ಮಾಡಿದರೆ ಜನರು ಸುಮ್ಮನ್ನೆ ಇರುವುದಿಲ್ಲ. ತಂದೆ ತಂದರು, ಮಗ ಬಂದ್​ ಮಾಡಿದರೆಂದು ನಮ್ಮ ಮೇಲೆ ತಪ್ಪು ತಿಳೀದುಕೊಳ್ಳುತ್ತಾರೆ. ಅದಕ್ಕೆ ಅದನ್ನು ಪರಿಶೀಲನೆ ಮಾಡಿ, ಇಲ್ಲವೆಂದರೆ ಬರುವ ಸೋಮವಾರ ಓಟಿಂಗ್​ಗೆ ಹಾಕಿ ಎಂದು ಶಾಸಕ ಕಂದಕೂರ ಸರ್ಕಾರದ ನಡೆಯನ್ನು ತರಾಟೆಗೆ ತೆಗೆದುಕೊಂಡರು.

ಮೂವತ್ತು ಹೆರಿಗೆ ಮಾಡಬೇಕೆಂಬ ಕಂಡಿಷನ್​ ಹಾಕಿದ್ದೀರಿ, ಅಷ್ಟು ಹೆರಿಗೆ ಮಾಡಿಸಲು ಸೌಲಭ್ಯಗಳೇ ನೀಡಿಲ್ಲ. ಮೊದಲು ಹೆರಿಗೆಗಾಗಿ ಬೇಕಾಗುವ ಸೌಲಭ್ಯ ನೀಡಿ ಎಂದು ಆರೋಗ್ಯ ಸಚಿವರಿಗೆ ಒತ್ತಾಯಿಸಿದರು. ಗುರುಮಠಕಲ್​ ಸೇರಿ ಜಿಲ್ಲೆಗೆ ಇಂದಿಗೂ ಔಷಧಿಗಳ ಸರಬರಾಜು ಆಗಿಲ್ಲ. ನೀವು ನೀಡಿದ ಮಾಹಿತಿ ಸುಳ್ಳು ಇದೆ ಎಂದು ಶಾಸಕ ಕಂದಕೂರ ತಿರುಗೆಟು ನೀಡಿದರು. ಈ ವೇಳೆ ಮಾತನಾಡಿದ ಆರೋಗ್ಯ ಸಚಿವ ದಿನೇಶ ಗುಂಡುರಾವ್​ ಅವರು ಈ ಎಲ್ಲ ಬೇಡಿಕೆ ಪರಿಶೀಲಿಸುವುದಾಗಿ ಭರವಸೆ ನೀಡಿದರು.

ಕಲ್ಯಾಣ ಕರ್ನಾಟಕ ಭಾಗದಲ್ಲಿ ಕೆಎಸ್​ಆರ್​ಪಿ ಬಟಾಲಿನ್​ ಸ್ಥಾಪನೆ ಮಾಡುವುದು ಬಹಳ ಅಗತ್ಯವಿದೆ. ಅದನ್ನು ರಾಯಚೂರಿನಲ್ಲಿ ಸ್ಥಾಪಿಸಲು ಈಗಾಗಲೇ 30 ಜನ ಶಾಸಕರು ಪತ್ರ ಕೊಟ್ಟಿದ್ದೇವೆ. 175 ಎಕರೆ ಜಾಗವೂ ನೀಡುವುದಾಗಿ ಹೇಳಿದ್ದೇವೆ. ಕಳೆದ ಅಧಿವೇಶನದಲ್ಲೂ ಈ ಬಗ್ಗೆ ಪ್ರಸ್ತಾವಿಸಿದ್ದೆ, ಗೃಹ ಸಚಿವರಿಗೂ ಭೇಟಿ ಮಾಡಿ ವಿಷಯ ಗಮನಕ್ಕೆ ತರಲಾಗಿದೆ. ಅನುದಾನ ಬೇಕಿದ್ದರೇ ಕೆಕೆಆರ್​ಡಿಬಿ ಮೈಕ್ರೋ ಯೋಜನೆಯಡಿ ನೀಡಲು ಸಿದ್ದರಿದ್ದೇವೆ ಎಂದು ಹೇಳಿದ ಶಾಸಕರಿಗೆ ಉತ್ತರಿಸಿದ ಗೃಹ ಸಚಿವ ಡಾ.ಪರಮೇಶ್ವರ, ಬೇಡಿಕೆಗೆ ಸರ್ಕಾರ ಸ್ಪಂದಿಸಿದೆ. ಆರ್ಥಿಕ ಇಲಾಖೆಯಿಂದ ಅನುಮೋದನೆ ಸಿಕ್ಕ ಕೂಡಲೇ ಅದನ್ನು ಕಾರ್ಯಗತ ಮಾಡುವುದಾಗಿ ಭರವಸೆ ನೀಡಿದರು.