'ನಾಚಿಕೆ, ಮಾನ ಮರ್ಯಾದೆ ಇದ್ಯಾ?, ಮೊದ್ಲು ಫುಟ್‌ಪಾತ್ ದುರಸ್ತಿ ಮಾಡಿ'; GBA ಹಾಕಿದ್ದ ವಾಕಿಂಗ್​ ಸವಾಲಿಗೆ ನೆಟ್ಟಿಗರಿಂದ ಫುಲ್​​ ಕ್ಲಾಸ್

ಬೆಂಗಳೂರು: ನಗರದ ಮಾಲಿನ್ಯ ಪ್ರಮಾಣ ಕಡಿಮೆ ಮಾಡಲು, ದೈಹಿಕವಾಗಿ ಸದೃಢವಾಗಿರಲು ನಾಗರಿಕರು ಆಟೋ ರಿಕ್ಷಾ, ಖಾಸಗಿ ವಾಹನ ಬಳಕೆ ಮಾಡುವ ಬದಲು, ಒಂದು ಕಿಲೋ ಮೀಟರ್​ ನಡೆದುಕೊಂಡೆ ಹೋಗಿ ಎಂದು ಎಕ್ಸ್​ನಲ್ಲಿ ಪೋಸ್ಟ್​ ಹಂಚಿಕೊಂಡಿದ್ದ ಗ್ರೇಟರ್​ ಬೆಂಗಳೂರು ಪ್ರಾಧಿಕಾರ (Greater Bengaluru Authority)ಸದ್ಯ ಪೇಚಿಗೆ ಸಿಲುಕಿದೆ.

ಹೌದು, ಒಂದು ಕಿಲೋ ಮೀಟರ್​ಗೆ ಆಟೋ, ಸ್ಕೂಟರ್​ ಬುಕ್​ ಮಾಡಿಕೊಂಡು ಹೋಗುವ ಬದಲಿಗೆ ನಡೆದು ಹೋಗಿ. ನಿಮ್ಮ ಸ್ನೇಹಿತರಿಗೆ ಈ ಜೂನ್​ ಮಾಸದಲ್ಲಿ ಒಂದು ಕಿಲೋ ಮೀಟರ್​ ನಡೆಯುವ ಸವಾಲು ಹಾಕಿ ಎಂದು Greater Bengaluru Authority (GBA) ಶನಿವಾರ ವಿಡಿಯೋ ಹಂಚಿಕೊಂಡಿದೆ. ಪೋಸ್ಟ್ ವೈರಲ್​ ಆಗುತ್ತಲೇ ನೆಟ್ಟಿಗರು ತೀವ್ರ ತರಾಟೆಗೆ ತೆಗೆದುಕೊಂಡಿದ್ದಾರೆ. ಮೊದಲು ರಸ್ತೆಗುಂಡಿ, ಫುಟ್​ಪಾತ್​ ಮುಚ್ಚಿ, ರಸ್ತೆ ಬದಿ ನಿಂತಿರುವ ವಾಹನವನ್ನು ಕ್ಲಿಯರ್​ ಮಾಡಿ ಎಂದು ಅಧಿಕಾರಿಗಳ ವಿರುದ್ಧ ಕೆಂಡಕಾರಿದ್ದಾರೆ.

ರಾಮಯ್ಯ ಕಾನೂನು ಕಾಲೇಜಿನ ಬಳಿ ವಿದ್ಯಾರ್ಥಿಗಳು ನಟಿಸಿರುವ ವಿಡಿಯೋವನ್ನು ಹಂಚಿಕೊಂಡಿರುವ ಜಿಬಿಎ, ಇದರಲ್ಲಿ ಸ್ನೇಹಿತೆ ತನ್ನ ಸ್ನೇಹಿತನಿಗೆ ಕೊಂಚ ದೂರ ನಡೆಯಲು ವಾಹನ ಯಾಕೆ ಬುಕ್​ ಮಾಡುತ್ತಿದ್ದೀಯಾ? ನಡೆದುಕೊಂಡೆ ಹೋಗೋಣ ಎಂದು ಹೇಳಿದ್ದಾರೆ. ಇದಕ್ಕೆ ಜಿಬಿಎ ಶೀರ್ಷಿಕೆ ಕೊಟ್ಟಿರುವುದು ಹೀಗೆ..

1 ಕಿ.ಮೀ.ಗಿಂತ ಕಡಿಮೆ ದೂರಕ್ಕೆ, ನಮ್ಮಲ್ಲಿ ಅನೇಕರು ಇನ್ನೂ ಆಟೋವನ್ನು ಆಯ್ಕೆ ಮಾಡುತ್ತಾರೆ. ಆದರೆ ಇದರಿಂದ ಟ್ರಾಫಿಕ್​, ದಟ್ಟಣೆ ಹೆಚ್ಚಾಗುತ್ತದೆ. ಹೀಗಾಗಿ ಅಂತವರಿಗೆ ಜೂನ್​ನಲ್ಲಿ ಒಂದು ಕಿಲೋ ಮೀಟರ್​ ನಡೆಯುವ ಚಾಲೆಂಜ್​ ಮಾಡಿ. ಆಟೋ ಬುಕ್ ಮಾಡುವ ಮೊದಲು, ಮಾಲಿನ್ಯ ಹೆಚ್ಚಾಗುವ ಬಗ್ಗೆ, ಗಾಡಿ ಬಿಟ್ಟು ನಡೆಯುವುದರಿಂದ ನಿಮ್ಮ ಆರೋಗ್ಯ ವೃದ್ಧಿಸುವ ಬಗ್ಗೆ ಚಿಂತಿಸಿ ಎಂದು ಪೋಸ್ಟ್​ ಹಂಚಿಕೊಂಡಿದೆ. ಇದಕ್ಕೆ ಡಿ.ಕೆ. ಶಿವಕುಮಾರ್ ಅವರನ್ನು ಟ್ಯಾಗ್ ಮಾಡಲಾಗಿತ್ತು.

ನಿಮಗೆ ನಾಚಿಕೆ, ಮಾನ ಮರ್ಯಾದೆ ಇದೆಯಾ? ಬೆಂಗಳೂರಿನಲ್ಲಿ 100 ಮೀಟರ್ ನಡೆಯಲು ಸರಿಯಾದ ಫುಟ್​ಪಾತ್​ ಇಲ್ಲ. ಒಂದೆಡೆ ಕಸ ತುಂಬಿದ್ದರೆ, ಮತ್ತೊಂದು ಕಡೆ ಗುಂಡಿ ಬಿದ್ದಿರುತ್ತದೆ. ಇನ್ನೊಂದು ಕಡೆ ವಾಹನಗಳು ನಿಂತಿರುತ್ತದೆ. ಮೊದಲು ದುರಸ್ತಿ ಮಾಡಿ ಎಂದು ಶ್ರೀ ಎನ್ನುವವರು ಟ್ವೀಟ್ ಮಾಡಿದ್ದಾರೆ.

ಏನ್​ ಜೋಕ್​ ಗುರು ಬೆಂಗಳೂರಿನಲ್ಲಿ ಎಲ್ಲಿಯಾದರೂ 1 ಕಿ.ಮೀ. ಪಾದಚಾರಿ ಮಾರ್ಗ ನೆಟ್ಟಿಗಿದ್ಯಾ?. ತುಂಬಾ ಸ್ವಚ್ಛತೆಯಿಂದ ಇರುವ ಫುಟ್​ಪಾತ್​ ಎಲ್ಲಾದರೂ ಇದ್ದರೆ ನನಗೆ ತೋರಿಸಿ ಎಂದು ಕಿಡಿಕಾರಿದ್ದಾರೆ