- ಪರೋಪಕಾರ, ಸೇವಾ ಧರ್ಮ ಭಾರತದ ಜೀವಾಳ
- ಆರ್ಟ್ ಆಫ್ ಲಿವಿಂಗ್ನ ನೂತನ ಧ್ಯಾನ ಮಂದಿರ ಲೋಕಾರ್ಪಣೆ
ಬೆಂಗಳೂರು: ಭಾಷೆ, ಸಂಸ್ಕೃತಿ, ಆರಾಧನಾ ಪದ್ಧತಿ ಸೇರಿ ಅನೇಕ ವಿಷಯಗಳಲ್ಲಿ ವೈವಿಧ್ಯತೆಯಿದ್ದರೂ, ಪರೋಪಕಾರವೇ ಪುಣ್ಯ, ಪರಪೀಡನೆಯೇ ಪಾಪ ಮತ್ತು ಸೇವೆಯೇ ಪರಮ ಧರ್ಮ ಎಂಬ ತತ್ವದ ಪಾಲನೆಯ ಕಾರಣ ಭಾರತ ಇಂದು ಒಟ್ಟಾಗಿ ಉಳಿದಿದೆ ಎಂದು ಪ್ರಧಾನಮಂತ್ರಿ ನರೇಂದ್ರ ಮೋದಿ ಅಭಿಪ್ರಾಯಪಟ್ಟರು.
ಬೆಂಗಳೂರಿನ ದಿ ಆರ್ಟ್ ಆಫ್ ಲಿವಿಂಗ್ ಅಂತಾರಾಷ್ಟ್ರೀಯ ಕೇಂದ್ರದಲ್ಲಿ ಭಾನುವಾರ ಹಮ್ಮಿಕೊಂಡಿದ್ದ ಸಂಸ್ಥೆಯ 45ನೇ ವಾರ್ಷಿಕೋತ್ಸವ ಮತ್ತು ಸ್ಥಾಪಕ ಶ್ರೀ ರವಿ ಶಂಕರ್ ಗುರೂಜಿಯ 70ನೇ ಜನ್ಮದಿನೋತ್ಸವದಲ್ಲಿ ಭಾಗವಹಿಸಿ ಮಾತನಾಡಿದರು. ಈ ಸಂದರ್ಭದಲ್ಲಿ ನೂತನವಾಗಿ ನಿರ್ಮಿಸಲಾಗಿರುವ ಧ್ಯಾನ ಕೇಂದ್ರವನ್ನು ಲೋಕಾರ್ಪಣೆಗೊಳಿಸಲಾಯಿತು. ಕಾರ್ಯಕ್ರಮದಲ್ಲಿ ಮಾತನಾಡುವ ವೇಳೆ ಭವಿಷ್ಯದ ದಿನಗಳ ಒಳಿತಿಗಾಗಿ ಪಂಚಸೂತ್ರಗಳನ್ನು ಪ್ರಧಾನಿ ಮೋದಿ ಪ್ರಸ್ತಾಪಿಸಿದರು.
ಭವಿಷ್ಯಕ್ಕಾಗಿ ಮೋದಿ ಪಂಚ ಸೂತ್ರ:
1.ಸಾವಯವ ಕೃಷಿಗೆ ಆದ್ಯತೆ: ರೈತರನ್ನು ರಾಸಾಯನಿಕ ಮುಕ್ತ ಸಾವಯವ ಕೃಷಿಯೊಂದಿಗೆ ಮರುಜೋಡಿಸುವುದು ಇಂದಿನ ತುರ್ತು ಅಗತ್ಯವಾಗಿದೆ. ಭೂಮಿ ತಾಯಿಯನ್ನು ಅಪಾಯಕಾರಿ ರಾಸಾಯನಿಕಗಳಿಂದ ರಸುವುದು ಕೂಡ ಒಂದು ರೀತಿಯಲ್ಲಿ ಜೀವನ ಕಲೆಯೇ (ಆರ್ಟ್ ಆಫ್ ಲಿವಿಂಗ್) ಆಗಿದೆ ಎಂದು ಬಣ್ಣಿಸಿದರು.
2. ಏಕ್ ಪೇಡ್ ಮಾ ಕೆ ನಾಮ್: ಪರಿಸರ ಸಂರಕ್ಷಣೆಯು ಜೀವನದ ಅವಿಭಾಜ್ಯ ಅಂಗವಾಗಬೇಕು ಎಂದ ಮೋದಿ, ತಾಯಿಯ ಹೆಸರಿನಲ್ಲಿ ಗಿಡ ನೆಡುವ ಅಭಿಯಾನವನ್ನು ಮತ್ತಷ್ಟು ವಿಸ್ತರಿಸಲು ಕರೆ ನೀಡಿದರು.
3. ಜಲ ಸಂರಕ್ಷಣೆ: ನೀರಿನ ಒಂದೊಂದು ಹನಿಯನ್ನು ಉಳಿಸುವುದು ನಮ್ಮ ಜೀವಮಂತ್ರವಾಗಬೇಕು. ಮುಂಬರುವ ಮುಂಗಾರಿನಲ್ಲಿ ಒಂದೊಂದು ಹನಿಗೂ ಹೆಚ್ಚು ಬೆಳೆ (ಪರ್ ಡ್ರಾಪ್, ಮೋರ್ ಕ್ರಾಪ್) ಎಂಬ ಧ್ಯೇಯವಾಕ್ಯವನ್ನು ಜನಪ್ರಿಯಗೊಳಿಸಬೇಕು. ನೀರು ಮತ್ತು ವಿದ್ಯುತ್ ಉಳಿಸುವುದು ಕೂಡ ಆರ್ಟ್ ಆರ್ಪ ಲಿವಿಂಗ್ ಆಗಿದೆ.
4. ಸ್ಥಳಿಯ ಉತ್ಪನ್ನಕ್ಕೆ ಪ್ರೋತ್ಸಾಹ: ಏಕಬಳಕೆಯ ಪ್ಲಾಸ್ಟಿಕ್ಗಳ ಬಳಕೆ ಕಡಿಮೆ ಮಾಡಬೇಕು. ಸ್ಥಳಿಯವಾಗಿ ತಯಾರಿಸಿದ ವಸ್ತುಗಳನ್ನು ಖರೀದಿಸುವ ಮೂಲಕ ಸ್ವಾವಲಂಬಿ ಭಾರತಕ್ಕೆ ಕೊಡುಗೆ ನೀಡಬೇಕು.
5. ಮಿಷನ್ ಲೈಫ್: ಪ್ರಕೃತಿಗೆ ಹೊರೆ ಉಂಟು ಮಾಡದೆ ಸಮತೋಲನ ಸಾಧಿಸಿ ಬದುಕುವುದನ್ನು ಕಲಿಯಬೇಕಿದೆ. #Modi
✅ ಯುವಶಕ್ತಿಯೇ ದೇಶದ ಚಾಲಕ ಶಕ್ತಿ
ವಿಶ್ವವು ಇಂದು ತಂತ್ರಜ್ಞಾನ ಮತ್ತು ಆವಿಷ್ಕಾರಗಳ ಮೂಲಕ ವೇಗದ ಬದಲಾವಣೆಗೆ ಸಾಕ್ಷಿಯಾಗುತ್ತಿದೆ. ಭಾರತವು ಈ ಬದಲಾವಣೆಗಳಲ್ಲಿ ಕೇವಲ ಭಾಗಿದಾರ ಮಾತ್ರವಲ್ಲದೆ ನಾಯಕತ್ವವನ್ನು ವಹಿಸಿಕೊಳ್ಳುತ್ತಿದೆ. ಡಿಜಿಟಲ್ ಕ್ಷೇತ್ರದಲ್ಲಿ ಆಗಿರುವ ಕ್ರಾಂತಿಯು ನಮ್ಮನ್ನು ಡಿಜಿಟಲ್ ಪೇಮೆಂಟ್ ಕ್ಷೇತ್ರದ ನಾಯಕನ್ನಾಗಿ ಮಾಡಿದೆ. ಸ್ಟಾರ್ಟಪ್ ಮತ್ತು ಮೂಲಸೌಕರ್ಯ ಕ್ಷೇತ್ರದಲ್ಲೂ ವೇಗದ ಬದಲಾವಣೆಗಳು ನಡೆಯುತ್ತಿವೆ. ಬಾಹ್ಯಾಕಾಶ ಕ್ಷೇತ್ರದಲ್ಲೂ ನಮ್ಮ ಯುವಜನರು ಹೊಸ ಇತಿಹಾಸ ಬರೆಯುತ್ತಿದ್ದು, ದೇಶದ ಚಾಲಕಶಕ್ತಿಯಾಗಿದ್ದಾರೆ ಎಂದು ಪ್ರಧಾನಿ ಮೋದಿ ಹೇಳಿದರು.