ಪ್ರಮುಖ ಮುಖ್ಯಾಂಶಗಳು
ಕಲಾದಗಿ: ಹಿರೇಸಂಶಿ ಕ್ರಾಸ್ನಿಂದ ಗ್ರಾಮವನ್ನು ಪ್ರವೇಶಿಸುವ ಪ್ರಮುಖ ರಸ್ತೆ ಕಳೆದ ಅನೇಕ ವರ್ಷಗಳಿಂದ ಬಹುತೇಕ ಹಾಳಾಗಿದೆ. ಈ ರಸ್ತೆಯಲ್ಲಿ ತಗ್ಗುದಿನ್ನೆಗಳಿಂದ ಸರ್ಕಸ್ ಮಾಡುತ್ತ ತಗ್ಗುಗಳನ್ನು ತಪ್ಪಿಸಿಕೊಂಡು ಸಂಚಾರ ಮಾಡುವುದೇ ದೊಡ್ಡ ಸಾಹಸವಾಗಿದೆ.
ಈ ಕಾಮಗಾರಿಗೇಕೋ ಅದೆನೋ ಶಾಪ ಇದ್ದಂತಿದೆ. ಆರು ತಿಂಗಳಲ್ಲಿ ಸಂಪೂರ್ಣಗೊಳ್ಳಬೇಕು ಎಂಬ ಕರಾರಿನ ಸೇತುವೆ ಹಾಗೂ ರಸ್ತೆ ನಿರ್ಮಾಣದ ಕಾಮಗಾರಿಗೆ 2021 ಏಪ್ರಿಲ್ನಲ್ಲಿ ಅಂದು ಶಾಸಕರಾಗಿದ್ದ ಮುರುಗೇಶ ನಿರಾಣಿ ಅವರು ಭೂಮಿಪೂಜೆ ನೆರವೇರಿಸಿ ಜನರ ಬಹುದಿನದ ಆಸೆಗೆ ಇಂಬು ನೀಡಿದ್ದರಾದರೂ, ಆದರೆ ಅದೇಕೋ ಕಾಮಗಾರಿ ನಿರೀಕ್ಷೆಯಂತೆ ನಡೆಯಲೇ ಇಲ್ಲ.
ಶಾಸಕ ಜೆ.ಟಿ. ಪಾಟೀಲ ಅವರು ಶಾಸಕರಾಗಿ ಆಯ್ಕೆಯಾಗುತ್ತಿದ್ದಂತೆ ಮೊದಲು ಕೈ ಹಾಕಿದ್ದೇ ಈ ರಸ್ತೆ ಕಾಮಗಾರಿಗೆ ಸಂಬಂಧಿಸಿದ ಅಧಿಕಾರಿಗಳಿಗೆ, ಗುತ್ತಿಗೆದಾರರಿಗೆ ಮೇಲಿಂದ ಮೇಲೆ ಅವರು ಖಡಕ್ ಸೂಚನೆ ನೀಡಿ, ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ಮಾಡಿದ್ದರ ಹಿನ್ನೆಲೆ ಅಂತೂ ಇಂತೂ ಸೇತುವೆ ಕಾಮಗಾರಿ ಮುಕ್ತಾಯಗೊಂಡು ರಸ್ತೆ ಸಂಚಾರಕ್ಕೆ ಮುಕ್ತವಾಗಿ ಜನರ ಸಂತಸಕ್ಕೆ ಕಾರಣವಾಯಿತು ಎಂದು ವರ್ಷಗಳೇ ಕಳೆಯುತ್ತಿದ್ದರೂ ಇದಿನ್ನೂ ಡಾಂಬರೀಕರಣವಾಗದಿರುವುದು ವಿಪರ್ಯಾಸ.
ಕಲಾದಗಿ ಪ್ರವೇಶ ರಸ್ತೆಯಲ್ಲಿರುವ ತಗ್ಗುದಿನ್ನೆಗಳಿಂದ ಇದೊಂದು ಅಪಾಯಕಾರಿ ರಸ್ತೆಯಾಗಿದ್ದು, ವಾಹನ ಸವಾರರು ತುಸು ಮೈಮರೆತರು ಅಪಾಯ ಕಟ್ಟಿಟ್ಟಬುತ್ತಿ. ಭಾರಿ ಪ್ರಮಾಣದ ಅನಾಹುತಗಳಾಗುವ ಮೊದಲೇ ರಸ್ತೆ ಡಾಂಬರೀಕರಣ ಮಾಡುವ ಕೆಲಸ ಆಗಬೇಕು. ತುರ್ತಾಗಿ ಅಪಾಯಕಾರಿ ತಗ್ಗುಗಳನ್ನು ಮುಚ್ಚುವ ಕೆಲಸ ಆಗಬೇಕಾಗಿದೆ.
ಬಶೆಟ್ಟೆಪ್ಪ ಅಂಗಡಿ ಯುವ ಮುಖಂಡ ಕಲಾದಗಿ.