ಹುತಾತ್ಮ ಸೇನಾನಿಗಳ ಸ್ಮರಣಾರ್ಥ ಏರ್ಪಡಿಸಲಾಗಿದ್ದ 3 ಕಿ.ಮೀ ವಾಕಥಾನ್​ಗೆ ಶಾಸಕ ಜಿ.ಬಿ.ಜ್ಯೋತಿಗಣೇಶ್​ ಬಲೂನ್​ ಹಾರಿಸುವ ಮೂಲಕ ಚಾಲನೆ ನೀಡಿದರು. ಕೈಯಲ್ಲಿ ರಾಷ್ಟ್ರಧ್ವಜ ಹಿಡಿದು 6 ಸಾವಿರಕ್ಕೂ ಅಧಿಕ ವಿದ್ಯಾರ್ಥಿಗಳು "ಭಾರತ್​ ಮಾತಾ ಕಿ ಜೈ", "ವಂದೇ ಮಾತರಂ" ಮತ್ತು "ಜೈ ಹಿಂದ್​" ಘೋಷಣೆಗಳನ್ನು ಮೊಳಗಿಸಿದರು.

ದೇಶಭಕ್ತಿ ಗೀತೆಯೊಂದಿಗೆ ವಿದ್ಯಾರ್ಥಿಗಳು ಮತ್ತು ಎನ್​ಸಿಸಿ ಕೆಡೆಟ್​ಗಳು 250 ಅಡಿ ಉದ್ದದ ತಿರಂಗಾ ಹಿಡಿದು ಹೆಜ್ಜೆ ಹಾಕಿದರು. ಈ ಮೂಲಕ ಭಾರತೀಯ ಯೋಧರ ಶೌರ್ಯ, ತ್ಯಾಗ ಹಾಗೂ ಬಲಿದಾನಕ್ಕೆ ಗೌರವ ನಮನ ಸಲ್ಲಿಸಲಾಯಿತು. ಬಳಿಕ, "ಕಾರ್ಗಿಲ್​ ವಿಜಯ್​ ದಿವಸ್​" ಸಭಾ ಕಾರ್ಯಕ್ರಮಕ್ಕೆ ಸಸಿಗೆ ನೀರೆರೆಯುವ ಮೂಲಕ ಸಂಸದ ಡಾ.ಸಿ.ಎನ್​. ಮಂಜುನಾಥ್ ಚಾಲನೆ ನೀಡಿದರು. ಇದೇ ವೇಳೆ ಸೈನಿಕರನ್ನು ಸನ್ಮಾನಿಸಲಾಯಿತು. ಸಪ್ತಗಿರಿ ಎನ್​ಪಿಎಸ್​ ಯೂನಿವರ್ಸಿಟಿ ಡೆಪ್ಯುಟಿ ರಿಜಿಸ್ಟ್ರಾರ್​ ಮತ್ತು ಸಪ್ತಗಿರಿ ತಾಂತ್ರಿಕ ವಿಶ್ವವಿದ್ಯಾಲಯದ ಪ್ರಾಚಾರ್ಯ ಡಾ.ತುಳಸೀದಾಸ್​, ಶ್ರೀದೇವಿ ಶಿಕ್ಷಣ ಸಮೂಹ ಸಂಸ್ಥೆ ಚೇರ್ಮನ್​ ಡಾ.ಎಂ.ಆರ್​.ಹುಲಿನಾಯ್ಕರ್​, ಸಿದ್ದಿಬಯೋ ಎಂಡಿ ಎನ್​.ಆರ್​.ಅಕ್ಷಯ್​, ವಿಆರ್​ಎಲ್​ ಮೀಡಿಯಾ ಪೆ.ಲಿ.ಉಪಾಧ್ಯಕ್ಷ ಕೆ.ಆರ್​.ಅರುಣ್​, ವಿಜಯವಾಣಿ ಸಂಪಾದಕ ಕೆ.ಎನ್​.ಚನ್ನೇಗೌಡ ಮತ್ತಿತರರಿದ್ದರು.

ರಕ್ಷಣಾ ಕ್ಷೇತ್ರದಲ್ಲಿ ನಮ್ಮ ದೇಶವು ಹಲವು ಸುಧಾರಣೆ ಕಂಡಿದೆ. ಕಳೆದ ಬಜೆಟ್​ನಲ್ಲಿ ಕೇಂದ್ರ ಸರ್ಕಾರವು, ರಕ್ಷಣಾ ಕ್ಷೇತ್ರದ ಬಲವರ್ಧನೆಗೆ ಮತ್ತು ಆಧುನೀಕರಣಕ್ಕೆ ಬರೋಬ್ಬರಿ 8 ಲಕ್ಷ ಕೋಟಿ ರೂ. ಅನುದಾನ ಕೊಟ್ಟಿದೆ. "ಆತ್ಮನಿರ್ಭರ ಭಾರತ" ಹಾಗೂ "ಮೇಕ್​ ಇನ್​ ಇಂಡಿಯಾ" ಪರಿಕಲ್ಪನೆಯಡಿ ಭಾರತವು ಶೇಕಡ 30 ಯುದ್ಧೋಪಕರಣಗಳು, ಯುದ್ಧವಿಮಾನಗಳು, ನೌಕೆಗಳು, ಹೆಲಿಕಾಪ್ಟರ್​ಗಳು, ಯುದ್ಧನೌಕೆಗಳು ಮತ್ತು ಬ್ರಹ್ಮೋಸ್​ ಮಿಸೈಲ್​ ಸೇರಿ ಅನೇಕ ಯುದ್ಧ ಸಾಮಗ್ರಿ ತಯಾರಿಸುತ್ತಿದೆ. ಕೆಲವು ಮಿಸೈಲ್​ಗಳನ್ನು ಉತ್ಪಾದಿಸಿ ಬೇರೆ ದೇಶಕ್ಕೆ ರಫ್ತು ಮಾಡುವ ಹಂತಕ್ಕೆ ನಾವು ಬೆಳೆದಿದ್ದೇವೆ ಎಂದು ದೇಶದ ರಕ್ಷಣಾ ಸಾಮರ್ಥ್ಯದ ಬಗ್ಗೆ ಮಂಜುನಾಥ್​ ಮೆಚ್ಚುಗೆ ವ್ಯಕ್ತಪಡಿಸಿದರು. ಬೆಂಗಳೂರಿನ ಹಿಂದೂಸ್ತಾನ್​ ಏರೋನಾಟಿಕ್ಸ್​ ಲಿಮಿಟಿಡ್​ಗೆ (ಎಚ್​ಎಎಲ್​) 97 ಯುದ್ಧವಿಮಾನ ತಯಾರಿಸಲು ಕೇಂದ್ರವು 63 ಸಾವಿರ ಕೋಟಿ ರೂ. ಅನುದಾನ ಬಿಡುಗಡೆ ಮಾಡಿದೆ. ದೇಶದ ಸುತ್ತಮುತ್ತ ಪಾಕಿಸ್ತಾನ, ಚೀನಾ ಮತ್ತು ಬಾಂಗ್ಲಾದೇಶದಂತಹ ಶತ್ರುರಾಷ್ಟ್ರಗಳಿವೆ. ಇಂತಹ ರಾಷ್ಟ್ರಗಳ ವಿರುದ್ಧ ಹೋರಾಟ ನಡೆಸಲು ನಮ್ಮ ದೇಶವು ಬಲಿಷ್ಠವಾಗಿದೆ ಎಂದರು.

ಕೊಪ್ಪಳ: "ಬಾಯಲ್ಲಿ ಭಾಯಿ, ಭಾಯಿ... ಎಂದು ಹೇಳಿ ಹಿಂದಿನಿಂದ ಯುದ್ಧ ಸಾರಿದ್ದ ಚೀನಾಕ್ಕೆ ಬುದ್ಧನಂಥವನನ್ನು ನೀಡಿದ್ದು ಭಾರತ. ನಾವು ಯುದ್ಧಪ್ರಿಯರಲ್ಲ. ಶಾಂತಿಪ್ರಿಯರು" ಎಂದು ಗವಿಮಠದ ಗವಿಸಿದ್ಧೇಶ್ವರ ಸ್ವಾಮೀಜಿ ಹೇಳಿದರು.

ವಿಜಯವಾಣಿಯಿಂದ ಸಿವಿಸಿ ಫೌಂಡೇಷನ್​ ಸಹಯೋಗದಲ್ಲಿ ನಗರದ ಪಾನಂಟಿ ಕಲ್ಯಾಣ ಮಂಟಪದಲ್ಲಿ ಹಮ್ಮಿಕೊಂಡಿದ್ದ 27ನೇ ಕಾರ್ಗಿಲ್​ ವಿಜಯ ದಿವಸ್​ ಹಾಗೂ ನಿವೃತ್ತ ಸೈನಿಕರಿಗೆ ಸನ್ಮಾನ ಕಾರ್ಯಕ್ರಮದಲ್ಲಿ ಆಶೀರ್ವಚನ ನೀಡಿದರು.

ಗಮನ ಸೆಳೆದ ವಾಕಥಾನ್​: ಕಾರ್ಗಿಲ್​ ವಿಜಯ ದಿವಸ್​ ಅಂಗವಾಗಿ ಕೊಪ್ಪಳದ ಸಾರ್ವಜನಿಕ ಮೈದಾನದಿಂದ ಪಾನಂಟಿ ಕಲ್ಯಾಣ ಮಂಟಪವರೆಗೆ ಎರಡು ಕಿ.ಮೀ ವಾಕಥಾನ್​ ನಡೆಯಿತು. 100 ಅಡಿ ತ್ರಿವರ್ಣ ಧ್ವಜ ಹಿಡಿದ ವಿವಿಧ ಶಾಲಾ ಮತ್ತು ಕಾಲೇಜುಗಳ 600ಕ್ಕೂ ಹೆಚ್ಚು ಮಕ್ಕಳು ರಾಷ್ಟ್ರಭಕ್ತಿ ಘೋಷಣೆ ಕೂಗಿ ಜಾಗೃತಿ ಮೂಡಿಸಿದರು. ಸಾವಿರಾರು ಮಕ್ಕಳು ಭಾಗಿಯಾದರು. ಕಾರ್ಗಿಲ್​ ಯುದ್ಧದಲ್ಲಿ ಭಾಗಿಯಾದ 11 ನಿವೃತ್ತ ಸೈನಿಕರನ್ನು ಸನ್ಮಾನಿಸಿ, ಗೌರವಿಸಲಾಯಿತು.

ಕೊಪ್ಪಳದಲ್ಲಿ ವಿಜಯವಾಣಿಯಿಂದ ಶನಿವಾರ ಆಯೋಜಿಸಿದ್ದ ಕಾರ್ಗಿಲ್​ ವಿಜಯ ದಿವಸ್​ ಕಾರ್ಯಕ್ರಮದಲ್ಲಿ ಗವಿಸಿದ್ಧೇಶ್ವರ ಸ್ವಾಮೀಜಿ ಆಶೀರ್ವಚನ ನೀಡಿದರು. ಸಿವಿಸಿ ಫೌಂಡೇಷನ್​ ಅಧ್ಯಕ್ಷ ಸಿ.ವಿ.ಚಂದ್ರಶೇಖರ, ಡಿವೈಎಸ್​ಪಿ ಮುತ್ತಣ್ಣ ಸರವಗೋಳ, ಕ್ರೀಡಾಧಿಕಾರಿ ವಿಠ್ಠಲ ಜಾಬಗೌಡರ, ಹಿರಿಯ ವಕೀಲ ರಾಘವೇಂದ್ರ ಪಾನಂಟಿ ಇದ್ದರು.