ಬರ ಪಟ್ಟಿಯಲ್ಲಿ ಸೇರಿಸದಿದ್ರೆ ವಿಧಾನಸಭೆ ಎದುರು ಹೋರಾಟ

ಯಾದಗಿರಿ :

ಜಿಲ್ಲೆಯಲ್ಲಿ ತೀವ್ರ ಮಳೆ ಕೊರತೆ, ಬೆಳೆ ನಷ್ಟದ ನಡುವೆಯೂ ಯಾದಗಿರಿ ಮತ್ತು ಗುರುಮಠಕಲ್ ತಾಲೂಕುಗಳನ್ನು ಬರಪೀಡಿತ ಪಟ್ಟಿಯಿಂದ ಕೈಬಿಟ್ಟಿರುವುದಕ್ಕೆ ಶನಿವಾರ ಸುದ್ದಿಗಾರರ ಎದುರು ತೀವ್ರ ಆಕ್ರೋಶ ವ್ಯಕ್ತಪಡಿಸಿದ ಅವರು, ಜಿಲ್ಲಾಡಳಿತ ಹಾಗೂ ಕೃಷಿ ಇಲಾಖೆ ವರದಿಗಳಲ್ಲೇ ಯಾದಗಿರಿ ಮತ್ತು ಗುರುಮಠಕಲ್ ನಲ್ಲಿ ಮಳೆ ಕೊರತೆ ಹೆಚ್ಚಿರುವುದಾಗಿ ಉಲ್ಲೆಖಿಸಲಾಗಿದೆ. ಆದರೂ ಕೇವಲ ಒಂದು ತಾಲೂಕು ಬರಪೀಡಿತ ಘೋಷಿಸಿರುವುದು ಯಾವ ಮಾನದಂಡ ಆಧರಿಸಿ ಎಂಬುದನ್ನು ಸರ್ಕಾರ ಸ್ಪಷ್ಟಪಡಿಸಬೇಕು ಎಂದು ಆಗ್ರಹಿಸಿದರು.

ಜೂ.೧ರಿಂದ ಜುಲೈವರೆಗೆ ಸರ್ಕಾರದ ವರದಿ ಪ್ರಕಾರ ಗುರುಮಠಕಲ್‌ನಲ್ಲಿ ಶೇ.೫೮ ಹಾಗೂ ಯಾದಗಿರಿಯಲ್ಲಿ ಶೇ.೫೯ ಮಳೆ ಕೊರತೆಯಾಗಿದೆ. ಆ.೨೮ರವರೆಗಿನ ವರದಿಯಲ್ಲೂ ಗುರುಮಠಕಲ್‌ನಲ್ಲಿ ಶೇ.೪೪, ಯಾದಗಿರಿ ಶೇ.೫೪, ಶಹಾಪುರ ಶೇ.೫೦ ಹಾಗೂ ಸುರಪುರದಲ್ಲಿ ಶೇ.೩೫ ಮಳೆ ಕೊರತೆ ಇದೆ. ಈ ಅಂಕಿ-ಅಂಶ ನಾನು ಹೇಳುವುದಲ್ಲ. ಸರ್ಕಾರದ ಇಲಾಖೆಗಳೇ ನೀಡಿರುವ ವರದಿ. ಹಾಗಿದ್ದರೂ ಯಾದಗಿರಿ ಮತ್ತು ಗುರುಮಠಕಲ್ ಬರ ಪಟ್ಟಿಗೆ ಸೇರಿಸದಿರಲು ಕಾರಣವೇನು ಎಂದು ಪ್ರಶ್ನಿಸಿದರು.

ಬರ ಘೋಷಣೆ ವಿಚಾರದಲ್ಲಿ ಸರ್ಕಾರದ ಕ್ರಮವನ್ನು ಟೀಕಿಸಿದ ಕಂದಕೂರ, ಜ್ವರ ಬಂದದ್ದು ಎಮ್ಮೆಗೆ, ಬರೆ ಹಾಕಿದ್ದು ಎತ್ತಿಗೆ ಎಂಬಂತಾಗಿದೆ. ಸಂಕಷ್ಟದಲ್ಲಿರುವ ತಾಲೂಕುಗಳನ್ನು ಬಿಟ್ಟಿರುವುದು ಸರಿಯಲ್ಲ. ಅಧಿಕಾರಿಗಳು ಸ್ಥಳಕ್ಕೆ ತೆರಳಿ ಪರಿಸ್ಥಿತಿ ಪರಿಶೀಲಿಸಿ ಬೆಳೆ ನಷ್ಟ, ಮಳೆ ಕೊರತೆ ಬಗ್ಗೆ ವರದಿ ನೀಡಿದ್ದಾರೆ. ಆದರೂ ಆ ವರದಿಗಳನ್ನು ಪರಿಗಣಿಸದೆ ರೈತರಿಗೆ ಅನ್ಯಾಯ ಮಾಡಲಾಗಿದೆ ಎಂದು ಶಾಸಕ ಶರಣಗೌಡ ಕಂದಕೂರ ಕಿಡಿಕಾರಿದರು. ಆಗಷ್ಟ್ ಮೊದಲ ವಾರ ನಾಲ್ಕೈದು ದಿನ ಮಳೆಯಾಗಿದೆ. ಅದನ್ನೇ ಪರಿಗಣಿಸಿ ಬರ ಪರಿಸ್ಥಿತಿ ಇಲ್ಲ ಎಂದು ತೀರ್ಮಾನಿಸಿದರೆ ರೈತರಿಗೆ ಮರಣಶಾಸನ ಬರೆದಂತಾಗುತ್ತದೆ. ನಾಲ್ಕೈದು ದಿನದ ಮಳೆಯಿಂದ ಇಡೀ ಹಂಗಾಮಿನಲ್ಲಿ ಆಗಿರುವ ನಷ್ಟ ಸರಿಯಾಗುವುದಿಲ್ಲ ಎಂದರು. ಒಂದು ಹಂತದಲ್ಲಿ ಶೇ.೫೮-೫೯ ಮಳೆ ಕೊರತೆ ಇದೆ ಎಂದು ಹೇಳಿ, ನಂತರದ ವರದಿಯಲ್ಲಿ ಬೇರೆ ಅಂಕಿ-ಅಂಶ ತೋರಿಸುವುದಾದರೆ ಸರ್ಕಾರ ಸ್ಪಷ್ಟನೆ ನೀಡಬೇಕು. ಯಾವ ಆಧಾರದ ಮೇಲೆ ಕೆಲ ತಾಲೂಕುಗಳನ್ನು ಬರ ಪಟ್ಟಿಯಿಂದ ಕೈಬಿಡಲಾಗಿದೆ ಎಂಬುದನ್ನು ಬಹಿರಂಗಪಡಿಸಬೇಕು ಎಂದು ಒತ್ತಾಯಿಸಿದರು.

"