ಸುಗಮ ವ್ಯವಹಾರಕ್ಕೆ ಸಂಪೂರ್ಣ ಸಹಕಾರ

ಕಲಬುರಗಿ: ಹೋಟೆಲ್​ ಉದ್ಯಮಿಗಳು ಕಾನೂನು ಚೌಕಟ್ಟಿನಲ್ಲಿ ಸುಗಮವಾಗಿ ವ್ಯಾಪಾರ ವಹಿವಾಟು ನಡೆಸಲು ಪೊಲೀಸ್​ ಇಲಾಖೆ ಸಂಪೂರ್ಣ ಸಹಕಾರ ನೀಡಲಿದೆ ಎಂದು ಪೊಲೀಸ್​ ಉಪ ಆಯುಕ್ತೆ (ಕಾನೂನು ಮತ್ತು ಭದ್ರತೆ) ಶಾಲೂ ಹೇಳಿದರು.

ಸಾರ್ವಜನಿಕ ಉದ್ಯಾನವನದ ಯಾತ್ರಿಕ ನಿವಾಸ ಸಭಾಂಗಣದಲ್ಲಿ ಬುಧವಾರ ಏರ್ಪಡಿಸಿದ್ದ ಜಿಲ್ಲಾ ಹೋಟೆಲ್​, ಬೇಕರಿ ಮತ್ತು ವಸತಿಗೃಹ ಮಾಲೀಕರ ಜತೆಗಿನ ಸಂವಾದದಲ್ಲಿ ಮಾತನಾಡಿದ ಅವರು, ಪ್ರತಿಯೊಂದು ವಸತಿಗೃಹದಲ್ಲಿ ಸಿಸಿ ಕ್ಯಾಮರಾ, ನೋಂದಣಿ ಪುಸ್ತಕ ಮತ್ತು ಗ್ರಾಹಕರ ಆಧಾರ್​ ಕಾರ್ಡ್​ ಕಡ್ಡಾಯ ಹೊಂದಿರಬೇಕು. ಜೂಜಾಟ, ವೇಶ್ಯಾವಾಟಿಕೆ ಸೇರಿ ಅಕ್ರಮ ಚಟುವಟಿಕೆಗಳಿಗೆ ವಸತಿಗೃಹ ನೀಡಿದರೆ ಕಠಿಣ ಕಾನೂನು ಕ್ರಮ ಜರುಗಿಸಲಾಗುವುದು ಎಂದು ಎಚ್ಚರಿಸಿದರು.

ಹೋಟೆಲ್​ ಅಸೋಸಿಯೇಷನ್​ ಉಪಾಧ್ಯಕ್ಷ ಸತ್ಯನಾಥ ಶೆಟ್ಟಿ ಅವರು ಹೋಟೆಲ್​ಗಳಲ್ಲಿನ ಸಮಸ್ಯೆಗಳತ್ತ ಗಮನ ಸೆಳೆದರು. ಉದ್ಯಮಿಗಳಿಗೆ ಯಾವುದೇ ರೀತಿಯಲ್ಲಿ ಕಿರುಕುಳ ನೀಡದಂತೆ ಪೊಲೀಸರಿಗೆ ಸಲಹೆ ನೀಡಲಾಗುವುದು. ಆಧಾರ್​ ಕಾರ್ಡ್​, ಸಿಸಿ ಕ್ಯಾಮರಾ ಸೇರಿ ಸೂಕ್ತ ದಾಖಲೆಪತ್ರ ಇಟ್ಟುಕೊಳ್ಳುವಂತೆ ಶಾಲೂ ಸಲಹೆ ನೀಡಿದರು.

ಅಧ್ಯತೆ ವಹಿಸಿದ್ದ ಅಸೋಸಿಯೇಷನ್​ ಜಿಲ್ಲಾಧ್ಯ ನರಸಿಂಹ ಮೆಂಡನ್​ ಮಾತನಾಡಿ, ಉದ್ಯಮಿಗಳು ಮತ್ತು ಪೊಲೀಸ್​ ಇಲಾಖೆ ಮಧ್ಯೆ ಸಹಕಾರ ನಿರಂತರವಾಗಿರಲಿ ಎಂದು ಹೇಳಿದರು.

ಸಂಘದ ವಸತಿ ವಿಭಾಗದ ಉಪಾಧ್ಯಕ್ಷ ಗಿರಿಧರ ಭಟ್​, ಬೇಕರಿ ವಿಭಾಗದ ಉಪಾಧ್ಯ ಮೊಯಿನುದ್ದೀನ್​, ಹೋಟೆಲ್​ ವಿಭಾಗದ ಉಪಾಧ್ಯಕ್ಷ ಶರಣು ಪಾಟೀಲ್​ ಸೇರಿ 50ಕ್ಕೂ ಹೆಚ್ಚು ಉದ್ಯಮಿಗಳು ಪಾಲ್ಗೊಂಡಿದ್ದರು. ಅಸೋಸಿಯೇಷನ್​ ಕಾರ್ಯದರ್ಶಿ ಮಹಾಕೀರ್ತಿ ಶೆಟ್ಟಿ ಸ್ವಾಗತಿಸಿ ನಿರೂಪಣೆ ಮಾಡಿದರು. ಕೋಶಾಧಿಕಾರಿ ಸುನೀಲ್​ ಶೆಟ್ಟಿ ವಂದಿಸಿದರು. ಹೋಟೆಲ್​ ಅಸೋಸಿಯೇಷನ್​ಗೆ ಮೊದಲ ಬಾರಿಗೆ ಆಗಮಿಸಿದ ಡಿಸಿಪಿಯವರಿಗೆ ಸ್ಮರಣಿಕೆ ಹಾಗೂ ಹೂಗುಚ್ಛ ನೀಡಿ ಸನ್ಮಾನ ಮಾಡಲಾಯಿತು.

"