ಬೆಂಗಳೂರು: ಕರ್ನಾಟಕ ರಾಜ್ಯೋತ್ಸವದ ದಿನವೇ ಹಾಲು ಮತ್ತು ಮೊಸರಿನ ದರ ಏರಿಸುವ ಮೂಲಕ ರಾಜ್ಯದ ಜನರಿಗೆ ಶಾಕ್ ನೀಡಿದ್ದ ರಾಜ್ಯ ಸರ್ಕಾರ ಈಗ, ಬಸ್ ಟಿಕೆಟ್ ದರವನ್ನು ಏರಿಕೆ ಮಾಡುವ ಮೂಲಕ ಇನ್ನೊಂದು ಚಾಟಿ ಏಟನ್ನು ನೀಡಲು ಮುಂದಾಗಿದೆ.
ಮಾಹಿತಿ ಪ್ರಕಾರ, ನವೆಂಬರ್ 5 ರಿಂದ ಬಸ್ ಟಿಕೆಟ್ ದರ ಏರಿಕೆ ಕಾಣಲಿದೆ ಎಂದು ಹೇಳಲಾಗುತ್ತಿದ್ದು, ಸಾರಿಗೆ ಇಲಾಖೆ ಸುಮಾರು 2,000 ಕೋಟಿ ನಷ್ಟದಲ್ಲಿದೆ, ಹೀಗಾಗಿ ಟಿಕೆಟ್ ಬೆಲೆ ಏರಿಕೆ ಅನಿವಾರ್ಯವೆಂದು ಸಾರಿಗೆ ಸಚಿವ ಭೈರತಿ ಸುರೇಶ್ ತಿಳಿಸಿದ್ದಾರೆ.
ಇನ್ನು ಮಹಿಳೆಯರಿಗೆ ಬಸ್ ಟಿಕೆಟ್ ಅನ್ನು ಉಚಿತ ಮಾಡಿರುವ ಸರ್ಕಾರ ಗಂಡಸರ ಜೇಬಿಗೆ ಕತ್ತರಿ ಹಾಕಲು ಮುಂದಾಗಿದೆ ಎಂದು ಜನಾಕ್ರೋಶ ವ್ಯಕ್ತವಾಗುತ್ತಿದೆ. ಟಿಕೆಟ್ ದರ ಏರಿಕೆ ಸಂಬಂಧ ನವೆಂಬರ್ 4 ರಂದು ಮಹತ್ವದ ಸಭೆಯೊಂದನ್ನು ನಡೆಸಲಿದ್ದು, ನವೆಂಬರ್ 5 ರಿಂದ ಕೆಎಸ್ಆರ್ಟಿಸಿ, ಬಿಂಎಂಟಿಸಿ ಸೇರಿದಂತೆ ಎಲ್ಲಾ ನಿಗಮದ ಬಸ್ ಟಿಕೆಟ್ ದರ ಏರಿಕೆ ಕಾಣುವುದು ಬಹುತೇಕ ನಿಶ್ಚಿತವಾಗಿದೆ.
ಇನ್ನು ಬಸ್ ಟಿಕೆಟ್ ದರ ಏರಿಕೆ ಕುರಿತು ಮಾಧ್ಯಮದವರೊಂದಿಗೆ ಮಾತನಾಡಿದ ಸಾರಿಗೆ ಸಚಿವ ಭೈರತಿ ಸುರೇಶ್, ಸಾರಿಗೆ ಈಗಾಗಲೇ ಸುಮಾರು 9,000 ಕೋಟಿ ನಷ್ಟದಲ್ಲಿದೆ. ವಾರ್ಷಿಕ 2,000 ಕೋಟಿ ನಷ್ಟವಾಗುತ್ತಿದೆ. ಈ ಲಾಸ್ ಅನ್ನು ಸರಿದೂಗಿಸಲು ಟಿಕೆಟ್ ಬೆಲೆ ಏರಿಕೆ ಅನಿವಾರ್ಯವಾಗಿದೆ ಎಂದು ಸಾರಿಗೆ ಸಚಿವರು ಸಮಜಾಯಿಷಿ ನೀಡಿದ್ದಾರೆ.
ಲಭ್ಯ ಮಾಹಿತಿ ಪ್ರಕಾರ, ಬಿಎಂಟಿಸಿ ನಿಗಮದಲ್ಲಿ, ಪ್ರತಿ ಸ್ಟೇಜ್ಗೆ ಕನಿಷ್ಟ 6 ರೂ. ಪಡೆಯಲಾಗುತ್ತದೆ. ಇದನ್ನು ಈಗ 10 ರೂ. ಗೆ ಏರಿಕೆ ಮಾಡಬಹುದು ಅಂದರೆ 4 ರೂ. ಏರಿಕೆ ಮಾಡಲಾಗುವ ಬಗ್ಗೆ ಚರ್ಚೆ ನಡೆಯುತ್ತಿದೆ ಎನ್ನಲಾಗಿದೆ. ಇದರರ್ಥ ಒಮ್ಮೆ ಬಸ್ ಏರಿದ ಮೇಲೆ ಪ್ರತಿ ಸ್ಟಾಪ್ಗೆ 10 ರೂ. ಕನಿಷ್ಟವಾಗಲಿದೆ ಎನ್ನಬಹುದಾಗಿದೆ. 'ಟಿಕೆಟ್ ದರವನ್ನು ರೌಂಡ್ ಫಿಗರ್ ಮಾಡಿರುವ ಕಾರಣ ಇನ್ಮುಂದೆ ಕಂಡೆಕ್ಟರ್ ಜತೆ ಚೇಂಜ್ಗೆ ಜಗಳ ಇರಲ್ಲ' ಇದೇ ಸರ್ಕಾರದ ನೈಜ ಉದ್ದೇಶ ಎಂದು ಸೋಷಿಯಲ್ ಮೀಡಿಯಾದಲ್ಲಿ ಟ್ರೋಲ್ ಮಾಡಲಾಗುತ್ತಿದೆ.
ಇನ್ನೂ ರಾಜ್ಯ ಸರ್ಕಾರ ಬಸ್ ಟಿಕೆಟ್ ಬೆಲೆ ಏರಿಕೆ ಮಾಡುವುದಕ್ಕೆ ರಾಜ್ಯ ಬಿಜೆಪಿ ನಾಯಕರು ಕಿಡಿಕಾರಿದ್ದಾರೆ. ಮೊನ್ನೆ ಹಾಲು ಮತ್ತು ಮೊಸರಿನ ಬೆಲೆ ಹೆಚ್ಚು ಮಾಡಿದರು. ಈಗ ಬಸ್ ಟಿಕೆಟ್ ಹೆಚ್ಚಳ. ಹೀಗೆ ಮುಂದುವರಿದರೆ ನಾಳೆ ಉಸಿರಾಡುವ ಗಾಳಿಗೂ ಹಣ ಕೀಳುತ್ತಾರೆ. ರಾಜ್ಯ ಸರ್ಕಾರದ ಖಜಾನೆ ಖಾಲಿಯಾಗಿದೆ ಎಂದು ಬಿಜೆಪಿ ನಾಯಕರು ಆಕ್ರೋಶ ಹೊರಹಾಕಿದ್ದಾರೆ.
ಇದಕ್ಕೆ, ತಿರುಗೇಟು ನೀಡಿರುವ ಸಾರಿಗೆ ಸಚಿವರು, ಕೇಂದ್ರ ಸರ್ಕಾರ 2025 ರಿಂದ ಇಲ್ಲಿವರೆಗೆ ಸುಮಾರು 4 ರಿಂದ 5 ಬಾರಿ ಪೆಟ್ರೋಲ್ ಬೆಲೆಯನ್ನು ಏರಿಕೆ ಮಾಡಿದೆ. ಅದನ್ನು ಯಾವ ಬಿಜೆಪಿ ನಾಯಕರೂ ವಿರೋಧ ಮಾಡಲ್ಲ. ನಾವು ಸಾರಿಗೆ ಸಂಸ್ಥೆ ನಷ್ಟದಲ್ಲಿದೆ ಎಂಬ ಉದ್ದೇಶದಿಂದ ಮಾತ್ರ ಟಿಕೆಟ್ ಬೆಲೆ ಏರಿಕೆ ಮಾಡಿದ್ದೆವೆಂದು ಭೈರತಿ ಸುರೇಶ್ ಪ್ರತ್ಯುತ್ತರ ನೀಡಿದ್ದಾರೆ.