ಡಿವೈಎಸ್​ಪಿ ಬಡ್ತಿ ಕಲ್ಯಾಣಕ್ಕೆ ಅನ್ಯಾಯ

ಕಲಬುರಗಿ: ಮೇಲ್ದರ್ಜೆಗೇರಿಸಿರುವ ಡಿಸಿಆರ್​ಇ ಘಟಕದಲ್ಲಿ ಸೃಜನೆಯಾಗಿರುವ ಡಿವೈಎಸ್​ಪಿ ಹುದ್ದೆಗಳಿಗೆ ಪೊಲೀಸ್​ ಇನ್​ಸ್ಪೆಕ್ಟರ್​ಗಳಿಗೆ ಬಡ್ತಿ ನೀಡಲು ಗೃಹ ಇಲಾಖೆ ಅಧಿಕಾರಿಗಳು ಸಿದ್ಧಪಡಿಸಿದ ಜ್ಯೇಷ್ಠತಾ ಪಟ್ಟಿಯಲ್ಲಿ ಕಲ್ಯಾಣ ಕರ್ನಾಟಕ(ಹೈಕ) ಭಾಗದವರಿಗೆ ಮತ್ತೊಮ್ಮೆ ಅನ್ಯಾಯವಾಗಿದೆ. ಸಂವಿಧಾನ 371(ಜೆ) ವಿಧಿ ನಿಯಮ ಗಾಳಿಗೆ ತೂರಿ ಮರ್ಮಾಘಾತ ನೀಡಲು ವ್ಯವಸ್ಥಿತ ಹುನ್ನಾರ ನಡೆದಿದೆ.

ನಾಗರಿಕ ಹಕ್ಕು ಜಾರಿ ನಿರ್ದೇಶನಾಲಯ (ಡಿಸಿಆರ್​ಇ) ಘಟಕದಲ್ಲಿ ಹೊಸದಾಗಿ 22 ಡಿವೈಎಸ್​ಪಿ ಹುದ್ದೆ ಸೃಜನೆ ಮಾಡಿ ಸರ್ಕಾರ ಆದೇಶ ಹೊರಡಿಸಿದೆ. ಈ ಮುಂಚೆ ರಾಜ್ಯದಲ್ಲಿ 31 ಜಿಲ್ಲೆಗಳಿದ್ದು, ವಿಭಾಗಕ್ಕೆ ಒಂದು, ಕೆಲವೆಡೆ ವಲಯಕ್ಕೊಂದು ಡಿವೈಎಸ್​ಪಿ ಹುದ್ದೆಗಳಿದ್ದವು. ಕೆಲದಿನ ಹಿಂದೆ ಡಿಸಿಆರ್​ಇಗೆ ಬಲ ತುಂಬಲು ಮತ್ತು ದೌರ್ಜನ್ಯ ಪ್ರಕರಣಗಳ ತನಿಖೆ ಚುರುಕುಗೊಳಿಸಲು ಗೃಹ ಇಲಾಖೆ ಜಿಲ್ಲೆಗೊಂದು ಹುದ್ದೆ ಮಂಜೂರು ಮಾಡಿದೆ.

ಇಡೀ ಕಲ್ಯಾಣ ಕರ್ನಾಟಕಕ್ಕೆ ಒಂದು ಡಿವೈಎಸ್​ಪಿ ಹುದ್ದೆ ಇತ್ತು. ಇದೀಗ ಹೊಸದಾಗಿ ಆರು ಹುದ್ದೆಗಳು ಸೃಜನೆಯಾಗಿವೆ. ರಾಜ್ಯದ ಉಳಿದೆಡೆ ಹೊಸದು ಸೇರಿ ಜಿಲ್ಲೆಗೊಂದರಂತೆ 16 ಹುದ್ದೆಗಳಿವೆ. ಸಂವಿಧಾನದ 371(ಜೆ) ವಿಧಿಯನ್ವಯ ಶೇ.80 ಮೀಸಲಾತಿಯಂತೆ ಕಕದ 6 ಹುದ್ದೆಗಳಲ್ಲಿ 5 ಈ ಭಾಗದವರಿಗೆ ಹಾಗೂ ಬೆಂಗಳೂರು ಭಾಗದಲ್ಲಿ ಅಸಿತ್ವಕ್ಕೆ ಬರಲಿರುವ 16 ಹುದ್ದೆಗಳಲ್ಲಿ 2 ಕಕದ ಇನ್​ಸ್ಪೆಕ್ಟರ್​ಗಳಿಗೆ ಕೊಡಬೇಕು. ಆದರೆ, ಕೆಲ ಪಟ್ಟಭದ್ರ ಹಿತಾಸಕ್ತಿಯ ಪ್ರಭಾವಕ್ಕೆ ಒಳಗಾಗಿರುವ ಅಧಿಕಾರಿಗಳು ಸೇರಿ ಈ ಹುದ್ದೆಗಳನ್ನು ರಾಜ್ಯಕ್ಕೆ ಅನ್ವಯಿಸುವಂತೆ ಇಲ್ಲವೇ ಕೇವಲ ಕೇಂದ್ರ ಕಚೇರಿ ಬೆಂಗಳೂರಿಗೆ ಸೀಮಿತಗೊಳಿಸಿ ಬಡ್ತಿ ನೀಡಲು ಆದೇಶಿಸಲಾಗಿದೆ ಎಂದು ಉನ್ನತ ಮೂಲಗಳು ವಿಜಯವಾಣಿಗೆ ತಿಳಿಸಿವೆ.

ಡಿಸಿಆರ್​ಇ ಕೇಂದ್ರ ಸ್ಥಾನ ಎಂದು ಹುದ್ದೆಗಳನ್ನು ತೋರಿಸಿ ನಂತರ ಕಲ್ಯಾಣ ಕರ್ನಾಟಕ ಜಿಲ್ಲೆಗಳಲ್ಲಿ ಸೃಜನೆ ಮಾಡಿರುವ ಹುದ್ದೆಗಳಿಗೆ ನಿಯೋಜನೆ ಮಾಡುವುದು ಕೆಲವರ ವ್ಯವಸ್ಥಿತ ಹುನ್ನಾರವಾಗಿದೆ. ಅಂತಲೇ ಡಿವೈಎಸ್​ಪಿ ಹುದ್ದೆಗಳಿಗೆ ಬಡ್ತಿ ಪಡೆಯಲು ಅರ್ಹರಿರುವ ಕಕದ ಹಿರಿತನ ಹೊಂದಿದ ಇನ್​ಸ್ಪೆಕ್ಟರ್​ಗಳ ಹೆಸರು ಈಗ ಡಿಸಿಆರ್​ಇ ವಿಭಾಗದ ಜ್ಯೇಷ್ಠತಾ ಪಟ್ಟಿಯಲ್ಲಿ ಬಂದರೂ ಪಾಳಿ ಬರುವುದಿಲ್ಲ. ಸಹಜವೇ ಬಡ್ತಿಯಿಂದ ವಂಚಿತರಾಗುವಂತಾಗುವಂತಾಗಲಿದೆ.

ಸೇವಾ ಹಿರಿತನ ಪಟ್ಟಿಯನ್ನು ಕಲ್ಯಾಣ ಕರ್ನಾಟಕದವರನ್ನು ವ್ಯವಸ್ಥಿತವಾಗಿ ಹೊರಗುಳಿಯುವಂತೆ ಸಿದ್ಧಪಡಿಸುವುದರಿಂದ ಅರ್ಹತೆ ಪಡೆಯುವುದಿಲ್ಲ. ಸಲೀಸಾಗಿ ನಾನ್​ ಎಚ್​ಕೆ(ಹೈದರಾಬಾದ್​ ಕರ್ನಾಟಕ)ದವರು ಆ ಹುದ್ದೆಗಳಿಗೆ ಬಡ್ತಿ ಹೊಂದುವ ಮೂಲಕ ನಮ್ಮ ಭಾಗಕ್ಕೆ ಮತ್ತೊಂದು ಹೊಡೆತ ನೀಡಿದಂತಾಗಲಿದೆ.

ಹೊಸದಾಗಿ ಸೃಜನೆಯಾಗಿರುವ ಡಿಸಿಆರ್​ಇ ಡಿವೈಎಸ್​ಪಿ ಹುದ್ದೆಗಳಿಗೆ ಕಲ್ಯಾಣ ಕರ್ನಾಟದ ಆರು ಹುದ್ದೆ ನಿಯಮದಂತೆ ಈ ಭಾಗದ್ದು ಎಂದು ಪರಿಗಣಿಸುವ ಮೂಲಕ ಅರ್ಹರಿಗೆ ಬಡ್ತಿ ಸಿಗುವಂತೆ ಆಗಬೇಕು. ಅಲ್ಲದೆ ಬೆಂಗಳೂರಿನಲ್ಲಿ ನೀಡುವ 371(ಜೆ) ಮೀಸಲಾತಿಯಂತೆ 2 ಮತ್ತು ಕಕದ 5 ಸೇರಿದರೆ ಈ ಭಾಗದ ಅರ್ಹ ಇನ್​ಸ್ಪೆಕ್ಟರ್​ಗಳಿಗೆ ಡಿವೈಎಸ್​ಪಿಗಳಾಗುವ ಭಾಗ್ಯ ಲಭಿಸಲಿದೆ. ಇದರೊಂದಿಗೆ ಲೋಕಾಯುಕ್ತದಲ್ಲೂ ನಿರಂತರ ಹೊಡೆತ ಬೀಳುತ್ತಿದ್ದು, ತುರ್ತಾಗಿ ಸರಿಪಡಿಸುವ ಕೆಲಸ ಆಗಬೇಕಾಗಿದೆ.

"