ದುಬಾರೆಯಲ್ಲಿ ಚೆನ್ನೈ ಪ್ರವಾಸಿ ದುರ್ಮರಣ! ಕಂಜನ್​ ಜೊತೆಗಿನ ಕಾದಾಟದಲ್ಲಿ ಗಾಯಗೊಂಡಿದ್ದ ಮಾರ್ತಾಂಡ ಆನೆ ಸಾವು

ಕುಶಾಲನಗರ: ನಿನ್ನೆ (ಮಾ.18) ದುಬಾರೆ ಆನೆ ಶಿಬಿರದಲ್ಲಿ ಚೆನ್ನೈ ಮೂಲದ ಮಹಿಳಾ ಪ್ರವಾಸಿಯೊಬ್ಬರು ಆನೆಗಳ ಕಾದಾಟಕ್ಕೆ ಸಿಲುಕಿ ದಾರುಣವಾಗಿ ಸಾವನ್ನಪ್ಪಿದರು. ಇದೇ ಸಂದರ್ಭದಲ್ಲಿ, ಕಂಜನ್​ ಆನೆಯ ದಾಳಿಗೆ ಗಂಭೀರವಾಗಿ ಗಾಯಗೊಂಡಿದ್ದ ಮಾರ್ತಾಂಡ ಇದೀಗ ಚಿಕಿತ್ಸೆ ಫಲಕಾರಿಯಾಗದೆ ಉಸಿರು ಚೆಲ್ಲಿದೆ.

ಎಲಿಫೆಂಟ್​ ಬಾತಿಂಗ್ ವೀಕ್ಷಿಸಲು ಹೋದಾಗ ಸಾಕಾನೆ ಮೈಮೇಲೆ ಬಿದ್ದು ಚೆನ್ನೈ ಮೂಲದ ಮಹಿಳೆ ಜಿನ್ಶಾ ದುರಂತವಾಗಿ ಸಾವನ್ನಪ್ಪಿದರು. ಈ ದುರಂತ ದೊಡ್ಡ ಮಟ್ಟದಲ್ಲಿ ಸುದ್ದಿಯಾಗಿದ್ದು, ಆನೆಗಳ ಕಾಳಗಕ್ಕೆ ಪ್ರವಾಸಿಯೊಬ್ಬರು ಉಸಿರು ಚೆಲ್ಲುವಂತಾಯಿತು ಎಂದು ಅನೇಕರು ಕಳವಳ ವ್ಯಕ್ತಪಡಿಸಿದರು. ಮತ್ತೊಂದೆಡೆ, ಕಂಜನ್​ ಆನೆಯ ಹುಚ್ಚು ವರ್ತನೆಗೆ ಗಾಯಗೊಂಡ ಮಾರ್ತಾಂಡ ಎಂಬ ಸಾಕಾನೆ, ಇಂದು ಚಿಕಿತ್ಸೆಗೆ ಸ್ಪಂದಿಸದೆ ಕೊನೆಯುಸಿರೆಳೆದಿದೆ.

ದುಬಾರೆ ಆನೆ ಶಿಬಿರದಲ್ಲಿ ಆನೆಗಳನ್ನು ಬಹಳ ಹತ್ತಿರದಿಂದ ನೋಡಲು ಎಂದಿನಂತೆ ಹೆಚ್ಚಿನ ಸಂಖ್ಯೆಯಲ್ಲಿ ಪ್ರವಾಸಿಗರು ಆಗಮಿಸಿದ್ದರು. ಈ ಸಂದರ್ಭದಲ್ಲಿ, ಎಲಿಫೆಂಟ್​ ಬಾತಿಂಗ್​ ನೋಡಲು ಮುಂದಾದ ಚೆನ್ನೈ ಮೂಲದ ದಂಪತಿ ಮೇಲೆ ಕಂಜನ್ ಜೊತೆಗೆ ಕಾದಾಟಕ್ಕೆ ಬಿದ್ದ ಮಾರ್ತಾಂಡ ಆನೆ ದಿಢೀರ್​ ಕೆಳಗೆ ಬಿದ್ದಿತು. ಆನೆ ಮಧ್ಯೆ ಸಿಲುಕಿದ ಮಹಿಳೆ ಉಸಿರು ಚೆಲ್ಲಿದರೆ, ಪತಿ ಗಂಭೀರ ಗಾಯಗಳಿಂದ ಬದುಕುಳಿದಿದ್ದಾರೆ.

ತಾನು ಮತ್ತು ಮಗುವಿನ ಪ್ರಾಣವನ್ನು ಉಳಿಸಿಕೊಂಡ ಮೃತ ಮಹಿಳೆಯ ಪತಿ, ಸತ್ತ ಮೇಲೂ ನನ್ನ ಹೆಂಡತಿ ಈ ಪ್ರಪಂಚವನ್ನು ಇನ್ನೊಬ್ಬರ ಮೂಲಕ ನೋಡುವಂತಾಗಲಿ ಎಂದು ಆಕೆಯ ಕಣ್ಣುಗಳನ್ನು ದಾನ ಮಾಡಿದ್ದಾರೆ. ಜಿನ್ಶಾ ಅವರ ಸಾವಿನ ದುಃಖದ ನಡುವೆಯೂ ಸಾರ್ಥಕತೆ ತೋರುವ ಮೂಲಕ ಸಾರ್ವಜನಿಕರ ಮೆಚ್ಚುಗೆ ಪಾತ್ರರಾಗಿದ್ದಾರೆ ಮತ್ತು ಹಲವರಿಗೆ ಸ್ಪೂರ್ತಿಯಾಗಿದ್ದಾರೆ.