ತಿಂಗಳಿಗೆ 2 ಲಕ್ಷ ರೂ. ಸಂಬಳ, ನಯಾಪೈಸೆ ಸಾಲ ಇಲ್ಲದಿದ್ರೂ ತಾನಿನ್ನೂ ಬಡವ ಎಂದ ಟೆಕ್ಕಿ: ಕಾರಣ ಕೇಳಿದ್ರೆ ನಿಮ್ಮ ಹುಬ್ಬೇರುತ್ತೆ! Bengaluru Techie

Bengaluru Techie : ತಿಂಗಳಿಗೆ ಬರೋಬ್ಬರಿ 2 ಲಕ್ಷ ರೂಪಾಯಿ ಸಂಬಳ, ತಲೆ ಮೇಲೆ ನಯಾಪೈಸೆಯ ಸಾಲದ ಹೊರೆಯೂ ಇಲ್ಲ... ಜೀವನದಲ್ಲಿ ಇಷ್ಟಿದ್ದರೆ ಸಾಕು ಆತನೇ ರಾಜ ಎನ್ನುವುದರಲ್ಲಿ ಎರಡು ಮಾತೇ ಇಲ್ಲ. ಸಾಧಾರಣವಾಗಿ ಯಾವುದೇ ಮಧ್ಯಮ ವರ್ಗದ ವ್ಯಕ್ತಿಗೆ ಇದು ಅತ್ಯಂತ ಆರಾಮದಾಯಕ ಹಾಗೂ ನೆಮ್ಮದಿಯ ಜೀವನ ಎಂದರೂ ಅತಿಶಯೋಕ್ತಿಯಲ್ಲ, ಆದರೆ ಸಿಲಿಕಾನ್​ ಸಿಟಿ ಬೆಂಗಳೂರಿನ ಟೆಕ್ಕಿಯೊಬ್ಬರಿಗೆ ಇಷ್ಟೆಲ್ಲಾ ಇದ್ದರೂ ತಾನಿನ್ನೂ 'ಬಡವ' ಅನಿಸುತ್ತಿದೆಯಂತೆ! ಸಾಮಾಜಿಕ ಜಾಲತಾಣ ರೆಡ್ಡಿಟ್​ನಲ್ಲಿ ಹಂಚಿಕೊಂಡಿರುವ ಈ ಬಿಸಿಬಿಸಿ ಪೋಸ್ಟ್ ಈಗ ಭಾರಿ ಚರ್ಚೆಗೆ ಗ್ರಾಸವಾಗಿದ್ದು, ಹಣಕಾಸಿನ ಭದ್ರತೆ ಇದ್ದರೂ ಮನಸ್ಸಿನ ಶಾಂತಿ ಮತ್ತು ತೃಪ್ತಿ ಇಲ್ಲದೆ ಒದ್ದಾಡುತ್ತಿರುವ ಇಂದಿನ ಕಾರ್ಪೊರೇಟ್ ಜೀವನದ ಕಟು ವಾಸ್ತವವನ್ನು ಜಗತ್ತಿನ ಮುಂದೆ ತೆರೆದಿಟ್ಟಿದೆ.

ಬಡತನದ ಬೇಗೆಯಲ್ಲೇ ಬೆಳೆದು ಬಂದ ಆ ಟೆಕ್ಕಿ, ತಮಗೆ 21 ವರ್ಷ ವಯಸ್ಸಾಗಿ ಮೊದಲ ಕೆಲಸ ಸಿಗುವವರೆಗೂ ಕುಟುಂಬದ ಮಾಸಿಕ ಆದಾಯ ಕೇವಲ 6000 ದಿಂದ 7 ಸಾವಿರ ರೂಪಾಯಿ ಮೀರುತ್ತಿರಲಿಲ್ಲ ಮತ್ತು 10x10 ಅಡಿಯ ಕೊಠಡಿಯಲ್ಲೇ ಜೀವನ ಸಾಗಿಸುತ್ತಿದ್ದೆವು ಎಂದು ಹಂಚಿಕೊಂಡಿದ್ದಾರೆ. ತಮ್ಮ ಕುಟುಂಬದ ಆರ್ಥಿಕ ಪರಿಸ್ಥಿತಿಯನ್ನು ಉತ್ತಮಪಡಿಸುವುದನ್ನೇ ತನ್ನ ಜೀವನದ ಮುಖ್ಯ ಗುರಿಯಾಗಿಸಿಕೊಂಡಿದ್ದ ಆ ಟೆಕ್ಕಿ 2021ರಲ್ಲಿ ಉದ್ಯೋಗ ಆರಂಭಿಸಿದಾಗಿನಿಂದಲೂ ತಮ್ಮ ತಂದೆ-ತಾಯಿ ಮತ್ತೆಂದೂ ಕೆಲಸ ಮಾಡದಂತೆ ಪೋಷಿಸಿ, ಅವರ ಜವಾಬ್ದಾರಿಯನ್ನು ಸಂಪೂರ್ಣವಾಗಿ ತಾವೇ ವಹಿಸಿಕೊಂಡಿದ್ದಾರೆ.

ತಮ್ಮ ಗಳಿಕೆ ಆರಂಭವಾದ ಬಳಿಕ ತಂದೆ-ತಾಯಿಯನ್ನು ಕೆಲಸದಿಂದ ನಿವೃತ್ತಿಗೊಳಿಸಿ ಸ್ವಗ್ರಾಮದಲ್ಲಿ 2ಬಿಹೆಚ್‌ಕೆ ಮನೆಗೆ ಸ್ಥಳಾಂತರಿಸಿದ ಟೆಕ್ಕಿ, ತಾವು ಬೆಂಗಳೂರಿನಲ್ಲಿ ಮತ್ತೊಂದು 2ಬಿಹೆಚ್‌ಕೆ ಮನೆಯಲ್ಲಿ ವಾಸ ಮಾಡುತ್ತಿದ್ದಾರೆ. ಪ್ರತಿ ತಿಂಗಳು ಮ್ಯೂಚುವಲ್ ಫಂಡ್‌ನಲ್ಲಿ 30 ಸಾವಿರ ಎಫ್​ಡಿ ಹಾಗೂ 10 ಸಾವಿರ ಆರ್​ಡಿ, ಚಿನ್ನದ ಉಳಿತಾಯಕ್ಕೆ 10 ಸಾವಿರ ಹಾಗೂ ಪೋಷಕರಿಗೆ 15 ರಿಂದ 20 ಸಾವಿರ ಕಳುಹಿಸುವುದರ ಜೊತೆಗೆ ಮನೆ ಬಾಡಿಗೆ ಮತ್ತು ಜೀವನ ವೆಚ್ಚಕ್ಕೆ 25 ಸಾವಿರ ಖರ್ಚು ಮಾಡುತ್ತಿದ್ದಾರೆ. 2021 ರಿಂದ ಕೆಲಸ ಮಾಡುತ್ತಿರುವ ಇವರು ಇದುವರೆಗೆ ಷೇರುಗಳಲ್ಲಿ 4 ಲಕ್ಷ, ಎಫ್‌ಡಿಯಲ್ಲಿ 2 ಲಕ್ಷ ಹಾಗೂ ಚಿನ್ನದಲ್ಲಿ 2 ರಿಂದ 2.5 ಲಕ್ಷ ಉಳಿತಾಯ ಮಾಡಿದ್ದು, ಇವುಗಳ ಜೊತೆಗೆ ತಮ್ಮ ಶೇ. ಸಂಬಳದ ಖಾತೆಯಲ್ಲೇ 6 ಲಕ್ಷ ಹಣವನ್ನು ಉಳಿತಾಯ ಮಾಡಿದ್ದಾರೆ.

ತಮ್ಮ ದಿನನಿತ್ಯದ ಓಡಾಟಕ್ಕೆ ಸ್ಕೂಟರ್ ಖರೀದಿಸಿ, ಪಾಲಕರ ಮನೆಗೆ ಅಗತ್ಯ ಪೀಠೋಪಕರಣಗಳನ್ನು ಕೊಡಿಸಿ, ಮ್ಯಾಕ್‌ಬುಕ್ ಹಾಗೂ ಸ್ಮಾರ್ಟ್‌ಫೋನ್ ಕೊಂಡುಕೊಂಡಿರುವ ಈ ಟೆಕ್ಕಿ, ಇತ್ತೀಚೆಗೆ ಪಾಲಕರಿಗೆ ಆರೋಗ್ಯ ವಿಮೆ ಹಾಗೂ ತಮಗೆ ಜೀವ ವಿಮೆಯನ್ನೂ ಮಾಡಿಸಿದ್ದಾರೆ. ಇಷ್ಟೆಲ್ಲಾ ಸಾಧನೆಗಳನ್ನು ಮಾಡಿರುವುದಕ್ಕೆ ಹೆಮ್ಮೆ ಇದೆಯಾದರೂ, ತಮಗೆಂದೂ ತಾನು ಶ್ರೀಮಂತ ಎನಿಸಿಯೇ ಇಲ್ಲ ಎಂದು ಹೇಳಿಕೊಂಡಿದ್ದಾರೆ. ಈ ವರ್ಷ ಮದುವೆಯಾಗುವ ಯೋಜನೆಯಿದ್ದು, ಅದಕ್ಕಾಗಿ ಕನಿಷ್ಠ 10 ಲಕ್ಷ ರೂ. ಖರ್ಚಾಗುವ ನಿರೀಕ್ಷೆಯಿದೆ. ಇದರ ಜೊತೆಗೆ ಸೆಕೆಂಡ್​ ಹ್ಯಾಂಡ್​ ಕಾರು, ಹುಟ್ಟೂರಿನಲ್ಲಿ ನಿವೇಶನ ಹಾಗೂ ಹೊಸ ಬೈಕ್ ಕೊಳ್ಳುವ ಆಸೆಯೂ ಅವರಿಗಿದೆ. ಆದರೆ ಹಣದ ಕೊರತೆಗಿಂತ ಹೆಚ್ಚಾಗಿ ಎಲ್ಲವನ್ನೂ ಒಮ್ಮೆಗೆ ಪಡೆಯಲು ಸಾಧ್ಯವಿಲ್ಲ ಎನ್ನುವ ಭಾವನೆ ಮತ್ತು ಒಂದರ ಖರೀದಿಯು ಮತ್ತೊಂದು ಕನಸನ್ನು ಕೈಬಿಡುವಂತೆ ಮಾಡುತ್ತಿದೆ ಎಂಬ ಆತಂಕ ಆ ಟೆಕ್ಕಿಯನ್ನು ಕಾಡುತ್ತಿದೆಯಂತೆ.

ಇವೆಲ್ಲದರ ನಡುವೆ ಅವರನ್ನು ಅತ್ಯಂತ ಹೆಚ್ಚಾಗಿ ಬಾಧಿಸುತ್ತಿರುವ ಮತ್ತೊಂದು ಅಚ್ಚರಿಯ ಸಂಗತಿ ಏನೆಂದರೆ, ಹುಟ್ಟೂರಿನಲ್ಲಿ ಮೈಬಗ್ಗಿಸಿ ದುಡಿಯುವ ಕೂಲಿ ಕಾರ್ಮಿಕರು ಅಥವಾ ಆಟೋ ಚಾಲಕರಾಗಿರುವ ತಮ್ಮ ಸ್ನೇಹಿತರು ತಮಗಿಂತ ತೀರಾ ಕಡಿಮೆ ಗಳಿಸಿದರೂ ಹೆಚ್ಚು ಸಂತೋಷದಿಂದಿರುವುದು. 26ನೇ ವಯಸ್ಸಿನಲ್ಲಿ ಇಷ್ಟೊಂದು ಸಂಪಾದಿಸಿದರೂ ಬಡವನೆಂಬ ಭಾವನೆ ಮೂಡುತ್ತಿರುವುದು ಅವರಿಗೆ ವಿಚಿತ್ರ ಎನಿಸುತ್ತಿದೆ. ವರ್ಷಗಳ ಹಿಂದೆ ಸಾಲ ಮಾಡಿ ಆಕರ್ಷಕ ಬೈಕ್‌ಗಳನ್ನು ಖರೀದಿಸಿ, ಸಾಲದಲ್ಲಿದ್ದರೂ ಹಣ ಖರ್ಚು ಮಾಡುತ್ತಾ ಜೀವನವನ್ನು ಪೂರ್ಣವಾಗಿ ಆನಂದಿಸುತ್ತಿದ್ದ ಸ್ನೇಹಿತರನ್ನು ಕಂಡಾಗ, ಕಾಗದದ ಮೇಲಿನ ಲೆಕ್ಕಾಚಾರದಲ್ಲಿ ಅವರಿಗಿಂತ ಬಹುದೂರ ಮುಂದಿದ್ದರೂ ತಾವು ಜೀವನದಲ್ಲಿ ಹಿಂದುಳಿದಿದ್ದೇವೆ ಎಂಬ ಭಾವನೆ ಅವರನ್ನು ಒತ್ತಡಕ್ಕೆ ಸಿಲುಕಿಸುತ್ತಿದೆ.

ಆರ್ಥಿಕ ಸಾಕ್ಷರತೆ ಮತ್ತು ಜಾಗರೂಕತೆಯಿಂದಾಗಿ ಸಾಲದ ಸುಳಿಗೆ ಸಿಲುಕದೆ ಹೋದರೂ, ಸ್ನೇಹಿತರಂತೆ ಹಣವನ್ನು ಮುಕ್ತವಾಗಿ ಖರ್ಚು ಮಾಡಲು ಅವರಿಗೆ ಸಾಧ್ಯವಾಗುತ್ತಿಲ್ಲ. ಸ್ನೇಹಿತರೊಂದಿಗೆ ಸುತ್ತಾಡುವುದು ಹಾಗೂ ರೆಸ್ಟೋರೆಂಟ್‌ಗಳಲ್ಲಿ ಊಟ ಮಾಡುವುದನ್ನು ಇಷ್ಟಪಡುವ ಇವರಿಗೆ, 750 ಕ್ಕಿಂತ ಹೆಚ್ಚಿನ ಬೆಲೆಯ ಒಂದು ಶರ್ಟ್ ಖರೀದಿಸಲು ಹೊರಟರೂ ತೀವ್ರ ಮಾನಸಿಕ ಆತಂಕ ಎದುರಾಗುತ್ತದೆ. ಸಣ್ಣಪುಟ್ಟ ವಿಷಯಗಳಿಗೂ ಯೋಚಿಸುವ ತಮ್ಮ ಈ ಮನಸ್ಥಿತಿಯಿಂದಾಗಿ ಅವರಿಗೆ ಹಣಕಾಸಿನ ಮುಕ್ತತೆ ಅನುಭವಿಸಲು ಸಾಧ್ಯವಾಗುತ್ತಿಲ್ಲ.

ಅನೇಕ ಜನರು ತಮ್ಮ ಈ ಪರಿಸ್ಥಿತಿ ಮತ್ತು ಆರ್ಥಿಕ ಸ್ಥಿರತೆಯನ್ನು ಕಂಡು ಹೊಟ್ಟೆಕಿಚ್ಚು ಪಟ್ಟುಕೊಳ್ಳಬಹುದು ಎಂಬುದನ್ನು ಒಪ್ಪಿಕೊಳ್ಳುವ ಅವರು, ತಮಗೆ ಮಾತ್ರ ನಿರಂತರ ಹಣಕಾಸಿನ ಚಿಂತೆಗಳು ಮಾನಸಿಕ ಭಾರವಾಗಿ ಪರಿಣಮಿಸಿವೆ ಎಂದಿದ್ದಾರೆ. ಈ ಮಾನಸಿಕ ಗೊಂದಲ ಮತ್ತು ಒತ್ತಡದಿಂದ ಹೊರಬರಲು ಸೂಕ್ತ ಆರ್ಥಿಕ ಹಾಗೂ ವೈಯಕ್ತಿಕ ಸಲಹೆಗಳನ್ನು ನೀಡುವಂತೆ ಅವರು ರೆಡ್ಡಿಟ್ (Reddit) ಬಳಕೆದಾರರಲ್ಲಿ ವಿನಂತಿಸಿಕೊಂಡಿದ್ದಾರೆ.

ಈ ಪೋಸ್ಟ್ ಸಾಮಾಜಿಕ ಜಾಲತಾಣಗಳಲ್ಲಿ ಶೀಘ್ರದಲ್ಲೇ ಭಾರಿ ಸದ್ದು ಮಾಡಿದ್ದು, ಹಲವು ಬಳಕೆದಾರರು ಇವರ ಭಾವನೆಗಳಿಗೆ ಧ್ವನಿಯಾಗಿದ್ದಾರೆ. ಈ ಮನಸ್ಥಿತಿಗೆ ಅವರ ಈಗಿನ ಆದಾಯ ಕಾರಣವಲ್ಲ, ಬದಲಿಗೆ ಬಾಲ್ಯದಲ್ಲಿ ಅನುಭವಿಸಿದ ಬಡತನದ ಆಳವಾದ ಮಾನಸಿಕ ಪ್ರಭಾವವೇ ಕಾರಣ ಎಂದು ಅನೇಕರು ಅಭಿಪ್ರಾಯಪಟ್ಟಿದ್ದಾರೆ. ಒಬ್ಬ ವ್ಯಕ್ತಿಯ ಆರ್ಥಿಕ ಪರಿಸ್ಥಿತಿ ಸುಧಾರಿಸಿದ ನಂತರವೂ ಹಳೆಯ ಅಭದ್ರತೆಯ ಭಾವನೆ ಜಂಟಿಯಾಗಿಯೇ ಉಳಿದುಕೊಳ್ಳುತ್ತದೆ ಎಂದಿರುವ ನೆಟ್ಟಿಗರು, ಸದ್ಯಕ್ಕೆ ತಾವೆಷ್ಟು ದೂರ ಸಾಗಿಬಂದಿದ್ದೇವೆ ಮತ್ತು ಎಷ್ಟು ಸಾಧಿಸಿದ್ದೇವೆ ಎಂಬುದನ್ನು ಗುರುತಿಸಿಕೊಳ್ಳುವಂತೆ ಅವರಿಗೆ ಪ್ರೋತ್ಸಾಹ ನೀಡಿದ್ದಾರೆ.

ಈ ಕುರಿತು ಕಾಮೆಂಟ್ ಮಾಡಿದ ಬಳಕೆದಾರರೊಬ್ಬರು, ಇದು ಶ್ರೀಮಂತ ಅನಿಸುವುದಕ್ಕಿಂತ ಹೆಚ್ಚಾಗಿ ಹಳೆಯ ಬಡತನದ ಮನಸ್ಥಿತಿಯಿಂದ ಹೊರಬರುವ ವಿಚಾರವಾಗಿದೆ. ಅನಗತ್ಯ ಖರ್ಚು ಮಾಡದೆ ನೀವು ಈಗಾಗಲೇ ಅನೇಕರಿಗಿಂತ ಅತ್ಯುತ್ತಮವಾಗಿ ಕಾರ್ಯನಿರ್ವಹಿಸುತ್ತಿದ್ದೀರಿ, ಅತಿಯಾದ ಆಲೋಚನೆಯಿಂದ ನಿಮ್ಮ ಸಂತೋಷವನ್ನು ಹಾಳುಮಾಡಿಕೊಳ್ಳಬೇಡಿ ಎಂದು ಸಲಹೆ ನೀಡಿದ್ದಾರೆ. ಮತ್ತೊಬ್ಬರು, ನಿಮ್ಮ ಬಗ್ಗೆ ನೀವೇ ಅತಿಯಾಗಿ ಕಟ್ಟುನಿಟ್ಟಾಗಿರಬೇಡಿ. ಯಾವುದೇ ಅಪರಾಧ ಪ್ರಜ್ಞೆಯಿಲ್ಲದೆ ನಿಮಗಾಗಿ ಸಮಯ ಮತ್ತು ಹಣವನ್ನು ಖರ್ಚು ಮಾಡಿ. ನಮಗೆ ಶ್ರೀಮಂತ ಎನಿಸಿಕೊಳ್ಳಲು ಹಣ ಎಂದಿಗೂ ಸಾಲುವುದಿಲ್ಲ. ಆಗಾಗ ಹಿಂದಿರುಗಿ ನೋಡಿ ನೀವು ಸಾಧಿಸಿರುವುದಕ್ಕೆ ಕೃತಜ್ಞತೆ ಸಲ್ಲಿಸಿ, ನಿಮ್ಮ ಬಗ್ಗೆ ಹೆಮ್ಮೆಯಿದೆ ಎಂದು ಧೈರ್ಯ ತುಂಬಿದ್ದಾರೆ.

ಇನ್ನೊಬ್ಬ ಬಳಕೆದಾರರು ಸ್ಯಾಂಡ್‌ವಿಚ್ ಪೀಳಿಗೆಯ ಉದಾಹರಣೆ ನೀಡುತ್ತಾ, ನಿಮಗೆ ಉತ್ತಮ ಆದಾಯವಿದ್ದರೂ ಕೈಯಲ್ಲಿ ಆಸ್ತಿಪಾಸ್ತಿಗಳಿಲ್ಲ, ಆ ಆಸ್ತಿಗಳನ್ನು ರೂಪಿಸಿಕೊಳ್ಳುವ ಹಾದಿಯಲ್ಲಿ ಮತ್ತಷ್ಟು ಬಡವನೆಂಬ ಭಾವನೆ ಮೂಡುವುದು ಸಹಜ. ನಿಮ್ಮ ಕುಟುಂಬಕ್ಕಾಗಿ ಈಗಾಗಲೇ ಸಾಕಷ್ಟು ಮಾಡಿದ್ದೀರಿ. ಆದರೆ ಆಸ್ತಿ ಮಾಡುವುದು ಸಮಯ ತರುತ್ತದೆ, ತುರ್ತಾಗಿ ನಿರ್ಧಾರಗಳನ್ನು ತೆಗೆದುಕೊಂಡು ಅಪಾಯಕಾರಿ ಹೂಡಿಕೆಗಳನ್ನು ಮಾಡಬೇಡಿ. ನಿಧಾನವಾಗಿ ಸರಿಯಾದ ಮಾರ್ಗದಲ್ಲಿ ಹೂಡಿಕೆ ಮಾಡಿ, ನಿಮ್ಮ ವೃತ್ತಿಜೀವನದತ್ತ ಗಮನಹರಿಸಿ, 35 ವರ್ಷದ ಹೊತ್ತಿಗೆ ನೀವು ಅತ್ಯಂತ ಸುಭದ್ರ ಆರ್ಥಿಕ ಹಂತ ತಲುಪುತ್ತೀರಿ ಎಂದು ದೀರ್ಘಾವಧಿಯ ಮಾರ್ಗದರ್ಶನ ನೀಡಿದ್ದಾರೆ, (ಏಜೆನ್ಸೀಸ್​).