ಉದ್ಯೋಗ ಭದ್ರತೆ vs ಸಂಪೂರ್ಣ ಸ್ವಾತಂತ್ರ್ಯ: ಸೋಶಿಯಲ್ ಮೀಡಿಯಾದಲ್ಲಿ ಹೊಸ ಸಂಚಲನ ಸೃಷ್ಟಿಸಿದ ಬೆಂಗಳೂರು ಯುವತಿಯರು! Corporate Vs Creator

ಅನೇಕ ಕಂಟೆಂಟ್ ಕ್ರಿಯೇಟರ್‌ಗಳಿಗೆ ಬ್ರ್ಯಾಂಡ್ ಒಪ್ಪಂದಗಳು, ಜಾಹೀರಾತು ಆದಾಯ ಹಾಗೂ ಡಿಜಿಟಲ್ ಉತ್ಪನ್ನಗಳ ಮಾರಾಟವು ಕಾರ್ಪೊರೇಟ್ ಉದ್ಯೋಗಗಳಲ್ಲಿ ಸಿಗುವ ವೇತನ ಮತ್ತು ಆರ್ಥಿಕ ಸ್ಥಿರತೆಗೆ ಸರಿಸಮಾನವಾಗಿ ನಿಲ್ಲುತ್ತಿವೆ.

ಇತ್ತೀಚೆಗೆ ಬೆಂಗಳೂರಿನ ಇಬ್ಬರು ಯುವತಿಯರು ಕಾರ್ಪೊರೇಟ್ ಕೆಲಸ ಮತ್ತು ಪೂರ್ಣ ಸಮಯದ ಕಂಟೆಂಟ್ ಕ್ರಿಯೇಷನ್ ನಡುವಿನ ನೈಜ ವ್ಯತ್ಯಾಸಗಳನ್ನು ಹೋಲಿಸಿ ಮಾಡಿದ ಇನ್‌ಸ್ಟಾಗ್ರಾಮ್ ವಿಡಿಯೋವೊಂದು ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಚರ್ಚೆಗೆ ನಾಂದಿ ಹಾಡಿದೆ. ಈ ವಿಡಿಯೋದಲ್ಲಿ 'EY' ಸಂಸ್ಥೆಯಲ್ಲಿ ವಿಶ್ಲೇಷಕಿಯಾಗಿ ಕಾರ್ಯನಿರ್ವಹಿಸುತ್ತಿರುವ ಅನನ್ಯಾ ಹಾಗೂ ಸ್ವತಂತ್ರ ಕಂಟೆಂಟ್ ಕ್ರಿಯೇಟರ್ ಆಗಿರುವ ಮಾನ್ಸೂನ್ ಭಾಗವಹಿಸಿದ್ದಾರೆ. ಕುತೂಹಲಕಾರಿ ವಿಷಯವೆಂದರೆ, ಇಬ್ಬರೂ ಕ್ರೈಸ್ಟ್ ವಿಶ್ವವಿದ್ಯಾಲಯದಲ್ಲಿ ಒಟ್ಟಿಗೆ BBA ವ್ಯಾಸಂಗ ಮಾಡಿದ್ದರೂ, ಅಂತಿಮವಾಗಿ ಸಂಪೂರ್ಣ ವಿಭಿನ್ನ ವೃತ್ತಿಮಾರ್ಗಗಳನ್ನು ಆಯ್ಕೆ ಮಾಡಿಕೊಂಡಿದ್ದಾರೆ.

ಇಬ್ಬರೂ ಎತ್ತಿ ತೋರಿಸಿದ ಅತಿ ದೊಡ್ಡ ವ್ಯತ್ಯಾಸವೆಂದರೆ ಆರ್ಥಿಕ ಸ್ಥಿರತೆ. ಅನನ್ಯಾ ಅವರು ಪ್ರತಿ ತಿಂಗಳು ನಿಗದಿತ ದಿನಾಂಕದಂದು ಸಂಬಳ ಪಡೆಯುವುದರಿಂದ ಭವಿಷ್ಯದ ಭದ್ರತೆ ಮತ್ತು ಮನಸ್ಸಿನ ಶಾಂತಿ ಸಿಗುತ್ತದೆ ಎಂದಿದ್ದಾರೆ. ಆದರೆ ಮಾನ್ಸೂನ್ ಹೇಳಿದ ಪ್ರಕಾರ, ಕಂಟೆಂಟ್ ಕ್ರಿಯೇಟರ್‌ಗಳ ಆದಾಯದಲ್ಲಿ ಸ್ಥಿರತೆ ಇರುವುದಿಲ್ಲ; ಗ್ರಾಹಕರಿಂದ ಪಾವತಿ ಪಡೆಯಲು ಹಲವು ಬಾರಿ ಇನ್‌ವಾಯ್ಸ್‌ಗಳನ್ನು ನೀಡಿ, ನಿರಂತರವಾಗಿ ಫಾಲೋ-ಅಪ್ ಮಾಡಬೇಕಾಗುತ್ತದೆ ಎಂದು ವಿವರಿಸಿದ್ದಾರೆ.

ಇಬ್ಬರೂ ತಮ್ಮ ದೈನಂದಿನ ಜೀವನಶೈಲಿಯನ್ನು ಹೋಲಿಸಿ ಮಾತನಾಡಿದ್ದಾರೆ. ಅನನ್ಯಾ ತಮ್ಮ ಕಾರ್ಪೊರೇಟ್ ವೇಳಾಪಟ್ಟಿಯು ಅತ್ಯಂತ ನಿಗದಿತ ಹಾಗೂ ಯೋಜನಾಬದ್ಧವಾಗಿರುತ್ತದೆ. ಇದರಲ್ಲಿ ಸಭೆಗಳು, ಕೆಲಸದ ಗಡುವು, ಊಟದ ವಿರಾಮಗಳು ಹಾಗೂ ಮುಂಚಿತವಾಗಿಯೃ ರಜೆ ಯೋಜಿಸಬೇಕಾದ ನಿಯಮಗಳಿರುತ್ತವೆ. ಜೊತೆಗೆ ಕೆಲಸದ ಒತ್ತಡ ಹಾಗೂ ಪ್ರತಿದಿನ ಕಚೇರಿಗೆ ಪ್ರಯಾಣಿಸುವುದು ದೈಹಿಕವಾಗಿ ಆಯಾಸ ತರುತ್ತದೆ ಎಂದು ಒಪ್ಪಿಕೊಂಡಿದ್ದಾರೆ.

ಆದಾಗ್ಯೂ, ಕಾರ್ಪೊರೇಟ್ ಜೀವನದಲ್ಲಿ ಕಂಪನಿ ನೀಡುವ ಲ್ಯಾಪ್‌ಟಾಪ್, ವೈದ್ಯಕೀಯ ವಿಮೆ, ವೇತನ ಸಹಿತ ರಜೆಗಳು ಹಾಗೂ ಜಿಮ್ ಸದಸ್ಯತ್ವದಂತಹ ಸೌಲಭ್ಯಗಳು ಸಿಗುತ್ತವೆ ಎಂದು ಅವರು ತಿಳಿಸಿದ್ದಾರೆ.

ಮತ್ತೊಂದೆಡೆ, ಕಂಟೆಂಟ್ ಕ್ರಿಯೇಟರ್ ಆಗಿ ಮಾನ್ಸೂನ್ ಸ್ವತಂತ್ರ ಜೀವನದ ಚಿತ್ರಣವನ್ನು ನೀಡಿದ್ದಾರೆ. ತಮಗೆ ನಿಗದಿತ ಸಂಬಳವಿಲ್ಲದಿದ್ದರೂ, ಸ್ವಂತ ವೇಳಾಪಟ್ಟಿಯನ್ನು ರೂಪಿಸಿಕೊಳ್ಳುವ, ಬಯಸಿದಾಗ ವಿರಾಮ ತೆಗೆದುಕೊಳ್ಳುವ ಹಾಗೂ ಯಾರ ಅನುಮತಿಯೂ ಇಲ್ಲದೆ ಎಲ್ಲಿಂದ ಬೇಕಾದರೂ ಕೆಲಸ ಮಾಡುವ ಸಂಪೂರ್ಣ ಸ್ವಾತಂತ್ರ್ಯ ಮತ್ತು ನಮ್ಯತೆ ತಮಗಿದೆ ಎಂದು ಹೇಳಿದ್ದಾರೆ.

ಒಟ್ಟಾರೆಯಾಗಿ, ನಿಗದಿತ ಸೌಲಭ್ಯ ಮತ್ತು ಭದ್ರತೆ ಬಯಸುವವರಿಗೆ ಕಾರ್ಪೊರೇಟ್ ಕೆಲಸ ಸೂಕ್ತವಾದರೆ, ಸ್ವತಂತ್ರ ನಿರ್ಧಾರ ಹಾಗೂ ಸೃಜನಶೀಲತೆಗೆ ಆದ್ಯತೆ ನೀಡುವವರಿಗೆ ಕಂಟೆಂಟ್ ಕ್ರಿಯೇಷನ್ ಉತ್ತಮ ಪರ್ಯಾಯವಾಗಿದೆ ಎಂಬುದನ್ನು ಈ ವಿಡಿಯೋ ಸಾರುತ್ತದೆ (ಏಜೆನ್ಸೀಸ್​).