ನಾಗಾವಿ ನಾಡಿನಲ್ಲಿ ಚಿತ್ತಾಷಾವಲಿ ಉರುಸ್​ ಸಂಭ್ರಮ

ಚಿತ್ತಾಪುರ: ಸೂಫಿ ಸಂತ ಹಜರತ್​ ಚಿತ್ತಾಷಾವಲಿ ದರ್ಗಾದ 799ನೇ ಉರುಸ್​ ನಿಮಿತ್ತ ಶನಿವಾರ ರಾತ್ರಿ ಅಸಂಖ್ಯಾತ ಭಕ್ತರ ಜೈೂಷದೊಂದಿಗೆ ಅದ್ದೂರಿಯಾಗಿ ಗಂಧದ (ಸಂದಲ್​) ಮೆರವಣಿಗೆ ಜರುಗಿತು.

ಬೆಳಗ್ಗೆ ನಾಗಣ್ಣ ಮಾಸ್ಟರ್​ ಬಳ್ಳಾ ಅವರ ಮನೆಯಲ್ಲಿ ಸಾಮೂಹಿಕ ಪ್ರಾರ್ಥನೆ (ಫಾತೆಹಾ) ಜರುಗಿತು. ವಿಶೇಷ ಪೂಜೆ ನಡೆದು ಪ್ರಸಾದ ವಿತರಿಸಲಾಯಿತು. ರಾತ್ರಿ 10ಕ್ಕೆ ಬಳ್ಳಾ ಮನೆಯಿಂದ ಗಲಾಫ್​ ಮೆರವಣಿಗೆಯು ಮುತ್ತುವಲ್ಲಿ ಸೈಯದ್​ ಮಿನಾಜುದ್ದೀನ್​ ಚಿಸ್ತಿ ಮನೆಗೆ ತಲುಪಿತು. ವಿಶೇಷ ಪ್ರಾರ್ಥನೆ ಬಳಿಕ ಮೌಲ್ವಿಗಳಿಂದ ಗಂಧಕ್ಕೆ ವಿಶೇಷ ಪೂಜೆ ಸಲ್ಲಿಸಲಾಯಿತು. ರಾತ್ರಿ 11ಕ್ಕೆ ಚಿಸ್ತಿ ಮನೆಯಿಂದ ಪ್ರಾರಂಭವಾದ ಗಂಧದ ಮೆರವಣಿಗೆಯೂ ತೆಳಗೇರಿ, ಭುವನೇಶ್ವರಿ ಚೌಕ್​, ಜನತಾ ಚೌಕ್​, ಕಿರಾಣಾ ಬಜಾರ್​, ಕಪಡಾ ಬಜಾರ್​, ಚಿತ್ತಾವಲಿ ಚೌಕ್​ ಮೂಲಕ ಬೆಳಗ್ಗೆ 5ಕ್ಕೆ ಚಿತ್ತಾಷಾವಲಿ ದರ್ಗಾಕ್ಕೆ ತಲುಪಿತು. ಗಂಧದ ಲೇಪನ ಕಾರ್ಯ ಜರುಗಿತು. ಮೆರವಣಿಗೆಯುದ್ದಕ್ಕೂ ಎರಡು ಒಂಟೆಗಳು, ಕುದುರೆ, ಯುವಕರ ಕಟ್ಟಿಗೆ ಆಟ, ಭಕ್ತಿ ಪ್ರಧಾನ ಹಾಡುಗಳು ಜನಮನ ಸೆಳೆದವು.

ರಾತ್ರಿ ನಡೆದ ಧಾರ್ಮಿಕ ಸಭೆಯಲ್ಲಿ ಸೈಯದ್​ ಸೇಟ್​ ಚಿಸ್ತಿ ಮಾತನಾಡಿ, ವೈರತ್ವಗಳು ಹೊಡೆದೊಡಿಸಲು ಹಾಗೂ ಪ್ರೀತಿಯಿಂದ ಬದುಕು ನಡೆಸಲು ಜಾತ್ರೆ, ಉರುಸ್​ ಸಹಕಾರಿಯಾಗಲಿವೆ. ಸಂದಲ್​ ಮೆರವಣಿಗೆಯಲ್ಲಿ ಹಿಂದೂ&ಮುಸ್ಲಿಮರು ಭಾವೈಕ್ಯತೆಯೊಂದಿಗೆ ಭಾಗವಹಿಸಿದ್ದಾರೆ. ಅಸಂಖ್ಯಾತ ಜನರು ದರ್ಗಾಕ್ಕೆ ನೈವೇದ್ಯ ಸಲ್ಲಿಸಿ ಭಕ್ತಿ ಮೆರೆದಿದ್ದಾರೆ ಎಂದರು.

ಪಿಎಲ್​ಡಿ ಬ್ಯಾಂಕ್​ ಅಧ್ಯಕ್ಷ ಭೀಮಣ್ಣ ಸಾಲಿ, ಪ್ರಮುಖರಾದ ಮಲ್ಲರೆಡ್ಡಿ ಗೋಪಸೇನ್​, ಮಿನಾಜುದ್ದಿನ್​ ಚಿಸ್ತಿ, ಸೈಯದ್​ ಸೇಟ್​ ಚಿಸ್ತಿ, ನಿಜಾಮೋದಿನ್​ ಚಿಸ್ತಿ, ರಾಜಶೇಖರ ಬಳ್ಳಾ, ಚಂದ್ರಶೇಖರ ಬಳ್ಳಾ, ನಾಗರೆಡ್ಡಿ ಗೋಪಸೇನ್​, ಸುರೇಶ ಅಳೊಳ್ಳಿ, ಮಹ್ಮದ್​ ಇಬ್ರಾಹಿಂ, ರಾಜಣ್ಣ ಕರದಾಳ, ಚಂದ್ರಶೇಖರ ಕಡೆಸೂರ ಇತರರಿದ್ದರು.

ಹೆಚ್ಚುವರಿ ಜಿಲ್ಲಾ ಪೊಲೀಸ್​ ವರಿಷ್ಠಾಧಿಕಾರಿ ಮಹೇಶ ಮೇಣ್ಣನವರ್​, ಡಿವೈಎಸ್ಪಿ ಶಂಕರಗೌಡ ಪಾಟೀಲ್​, ಸಿಪಿಐ ಸಿದ್ದಬಸವನಗೌಡ ಪಾಟೀಲ, ಪಿಎಸ್​ಐಗಳಾದ ಮಂಜುನಾಥರೆಡ್ಡಿ, ತಿರುಮಲೇಶ, ರೇಣುಕಾ, ಸಿದ್ದಲಿಂಗ ನೇತೃತ್ವದಲ್ಲಿ ಸೂಕ್ತ ಬಂದೋಬಸ್ತ್​ ಒದಗಿಸಲಾಗಿತ್ತು.