ಪೊಲೀಸ್​ ಠಾಣೆಯಲ್ಲಿ ಸಿಸಿ ಕ್ಯಾಮರಾ ಕಡ್ಡಾಯ| High court

ಬೆಂಗಳೂರು: 

ರಾಜ್ಯದ ಎಲ್ಲ ಪೊಲೀಸ್​ ಠಾಣೆಗಳಲ್ಲಿ 24 ಗಂಟೆಗಳ ಕಾಲ ಸಿಸಿ ಕ್ಯಾಮರಾ ಕಾರ್ಯನಿರ್ವಹಣೆಯಲ್ಲಿದೆಯೇ ಎಂಬ ಬಗ್ಗೆ ಸಮಗ್ರ ತನಿಖೆ ನಡೆಸಿ ವರದಿ ಸಲ್ಲಿಸಬೇಕು ಎಂದು  ಗೃಹ ಇಲಾಖೆ ಕಾರ್ಯದರ್ಶಿಗೆ ಹೈಕೋರ್ಟ್​ ನಿರ್ದೇಶನ ನೀಡಿದೆ.

ಆರ್​ಟಿಐ ಅಡಿ ಕೋರಿದ ಮಾಹಿತಿ ನಿರಾಕರಿಸಿದ್ದ ಮಾಹಿತಿ ಆಯೋಗದ ಆದೇಶ ಪ್ರಶ್ನಿಸಿ ಮಹಿಳೆಯೊಬ್ಬರು ಸಲ್ಲಿಸಿರುವ ಅರ್ಜಿ ವಿಚಾರಣೆ ನಡೆಸಿದ ನ್ಯಾಯಮೂರ್ತಿ ಸೂರಜ್​ ಗೋವಿಂದರಾಜ್​ ಅವರಿದ್ದ ಏಕಸದಸ್ಯ ನ್ಯಾಯಪೀಠ ಈ ಆದೇಶ ನೀಡಿದೆ.

ವೈಟ್​ಫೀಲ್ಡ್​ ಠಾಣೆಯ ಸಿಟಿ ಕ್ಯಾಮರಾ ದೃಶ್ಯಾವಳಿಗಳ ಲಭ್ಯತೆ ಬಗ್ಗೆ ಮಾಹಿತಿ ನೀಡುವಂತೆ ಪೊಲೀಸರಿಗೆ ನ್ಯಾಯಪೀಠ ಸೂಚಿಸಿತ್ತು. ವಿಡಿಯೋ ಕಾನ್ಪರೆನ್ಸ್​ ಮೂಲಕ ಹಾಜಾರಾಗಿದ್ದ ಎಸಿಪಿ ರೀನಾ ಸುವರ್ಣ, ವಿದ್ಯುತ್​ ಸಮಸ್ಯೆಯಿಂದಾಗಿ ದೃಶ್ಯಾವಳಿಗಳು ಲಭ್ಯವಿಲ್ಲ ಎಂದು ತಾಂತ್ರಿಕ ತಂಡ ತಿಳಿಸಿದೆ ಎಂದು ಹಿಂದಿನ ವಿಚಾರಣೆ ವೇಳೆ ಉತ್ತರಿಸಿದ್ದರು. 

ಆದ್ದರಿಂದ ವೈಟ್​ಫೀಲ್ಡ್​ ಠಾಣೆಗೆ ಸಂಬಂಧಿಸಿ ಯುಪಿಎಸ್​ ವ್ಯವಸ್ಥೆಯ ಬಗ್ಗೆ ಮಾಹಿತಿ ನೀಡಲು ಕಾಲಾವಕಾಶ ನೀಡಲಾಗಿತ್ತು. ಗುರುವಾರ ಮಾಹಿತಿ ಸಲ್ಲಿಸಿದ್ದ ಸರ್ಕಾರದ ಪರ ವಕೀಲರು, 11 ತಿಂಗಳ ಕಾಲ ವೈಟ್​ಫಿಲ್ಡ್​ ಠಾಣೆಯ ಯುಪಿಎಸ್​ ವ್ಯವಸ್ಥೆ ಸರಿಯಿರಲಿಲ್ಲ ಎಂದು ಉತ್ತರಿಸಿದ್ದರು. ಇದಕ್ಕೆ ಆಶ್ಚರ್ಯ ವ್ಯಕ್ತಪಡಿಸಿದ ನ್ಯಾಯಪೀಠ, ಇದು ಸುಪ್ರೀಂ ಕೋರ್ಟ್​ ಆದೇಶದ ಉಲ್ಲಂನೆಯಲ್ಲದೆ ಮತ್ತೇನು ಎಂದು ಪ್ರಶ್ನಿಸಿತು. ಎಲ್ಲ ಠಾಣೆಗಳಲ್ಲಿ ಸಿಸಿ ಕ್ಯಾಮರಾ ಇದೆ ಎಂದು ಸರ್ಕಾರ ಹೇಳುತ್ತದೆ. ಆದರೆ, ಅದೊಂದು ಔಪಚಾರಿಕ ವ್ಯವಸ್ಥೆಯಲ್ಲ. ಪೊಲೀಸ್​ ದೌರ್ಜನ್ಯ ತಡೆಗಟ್ಟಲು ಅವಶ್ಯಕ ಸಾಧನ. ಕೇವಲ ಅಳವಡಿಸಿದ್ದರೆ ಸಾಲದು, ಕಾರ್ಯಾಚರಣೆಯಲ್ಲಿಯೂ ಇರಬೇಕು ಎಂದು ಹೇಳಿತು. ಮುಂದಿನ ವಿಚಾರಣೆ ಸೆ.7ಕ್ಕೆ ನಿಗದಿಯಾಗಿದೆ.

ಪೊಲೀಸರ ಉತ್ತರಕ್ಕೆ ಆಕ್ರೋಶ ವ್ಯಕ್ತಪಡಿಸಿದ ಅರ್ಜಿದಾರ ಮಹಿಳೆ, ಪೊಲೀಸರು ನ್ಯಾಯಾಲಯದ ಮುಂದೆಯೇ ಸುಳ್ಳು ಹೇಳುತ್ತಿದ್ದಾರೆ ಎಂದು ಆರೋಪಿಸಿದರು. ಪೊಲೀಸ್​ ಠಾಣೆಯಲ್ಲಿ ನನ್ನ ಖಾಸಗಿ ಅಂಗಕ್ಕೆ ಲಾಠಿಯಿಂದ ಹಲ್ಲೆ ಮಾಡಿದ್ದಾರೆ. ಈಗ ಆ ದಾಖಲೆಗಳನ್ನು ಕೊಟ್ಟರೆ ನಿಜ ಬೆಳಕಿಗೆ ಬರುತ್ತದೆ ಎಂದು ನೆಪ ಹೇಳುತ್ತಿದ್ದಾರೆ ಎಂದು ಅಳಲು ತೋಡಿಕೊಂಡರು. ಪ್ರತಿಕ್ರಿಯಿಸಿದ ನ್ಯಾಯಪೀಠ, ಈ ಟನೆಗಳು 2024ರಲ್ಲಿ ಆಗಿದೆ. ನೀವು ಆಗಲೇ ನ್ಯಾಯಾಲಯಕ್ಕೆ ಬಂದಿದ್ದರೆ, ನಾವು ಸೂಕ್ತ ಆದೇಶ ಮಾಡುತ್ತಿದ್ದೆವು ಎಂದು ಹೇಳಿತು. ಅದಕ್ಕೆ ಉತ್ತರಿಸಿದ ಮಹಿಳೆ, ನಾನು ಆರ್​ಟಿಐ ಅರ್ಜಿ ಸಲ್ಲಿಸಿದ್ದೆ. ಆ ಪ್ರಕ್ರಿಯೆಗಳೆಲ್ಲ ಮುಗಿದು ಇಲ್ಲಿಗೆ ಬರುವಾಗ ತಡವಾಯಿತು ಎಂದು ಉತ್ತರಿಸಿದರು.