ಯಾದಗಿರಿ ಕೋರ್ಟ್​ಗೆ ಬಾಂಬ್​ ಬೆದರಿಕೆ

ಯಾದಗಿರಿ: ಮುದ್ನಾಳ ಕ್ರಾಸ್​ ಹತ್ತಿರದ ಜಿಲ್ಲಾ ನ್ಯಾಯಾಲಯಕ್ಕೆ ಗುರುವಾರ ಇಮೇಲ್​ ಮೂಲಕ ಬಂದ ಬಾಂಬ್​ ಬೆದರಿಕೆ ಇಡೀ ದಿನ ಕೋರ್ಟ್​ ಪರಿಸರದಲ್ಲಿ ಆತಂಕ ಮೂಡಿಸಿತ್ತು.

ವಿಷಯ ತಿಳಿಯುತ್ತಲೇ ದೌಡಾಯಿಸಿದ ಎಸ್​ಪಿ ಪೃಥ್ವಿಕ್​ ಶಂಕರ್​ ಅವರು ಬಾಂಬ್​ ನಿಷ್ಕ್ರಿಯ ದಳ, ಶ್ವಾನದಳ ಸಿಬ್ಬಂದಿಯನ್ನು ಕರೆಸಿ ಎಲ್ಲೆಡೆ ಪರಿಶೀಲನೆ ನಡೆಸಿದರು. ಎಲ್ಲೂ ಬಾಂಬ್​ ಅಥವಾ ಸ್ಫೋಟಕ ವಸ್ತು ಪತ್ತೆಯಾಗದ್ದರಿಂದ ಇದೊಂದು ಹುಸಿ ಬೆದರಿಕೆ ಎಂಬುದು ಖಾತ್ರಿಯಾದ ಬಳಿಕ ಎಲ್ಲರೂ ನಿಟ್ಟುಸಿರು ಬಿಡುವಂತಾಯಿತು.

ಮಧ್ಯಾಹ್ನ 12ರ ಸುಮಾರಿಗೆ ಮೇಲ್​ ಮೂಲಕ ಬಾಂಬ್​ ಬೆದರಿಕೆ ಬರುತ್ತಲೇ ಎಚ್ಚೆತ್ತ ಸಿಬ್ಬಂದಿ ಮತ್ತು ವಕೀಲರು ಕೋರ್ಟ್​ ಹಾಲ್​ನಿಂದ ಹೊರಬಂದರು. ಜಮೀಶಾ ಮುಬೀನ್​ ಎಂಬ ಹೆಸರಿನ ಐಡಿಯಿಂದ ಬಂದ ಇಮೇಲ್​ನಲ್ಲಿ ಇಂದು ಮಧ್ಯಾಹ್ನ 1.20ರಿಂದ 3ರ ಮಧ್ಯೆ ನಿಮ್ಮ ನ್ಯಾಯಾಲಯದಲ್ಲಿ 13 ವಿಷ ಅನಿಲ+ಆರ್​ಡಿಎಕ್ಸ್​ ಬಾಂಬ್​ಗಳು ಸ್ಫೋಟಗೊಳ್ಳಲಿವೆ. ನ್ಯಾಯಾಧೀಶರು, ಮುಗ್ಧ ಸಾರ್ವಜನಿಕರನ್ನು ಸ್ಥಳಾಂತರಿಸಿ ಎಂದು ಉಲ್ಲೆಖಿಸಲಾಗಿತ್ತು.

ನಿಷ್ಕ್ರಿಯ ದಳ, ಶ್ವಾನದಳದ ಸಿಬ್ಬಂದಿ ಕೋರ್ಟ್​ನ ಎಲ್ಲ ಸಭಾಂಗಣ, ಆವರಣ, ಕೋಣೆಗಳು ಸೇರಿ ಒಂದಿಷ್ಟೂ ಸ್ಥಳ ಬಿಡದೆ ಶ್ವಾನದೊಂದಿಗೆ ಎರಡು ಗಂಟೆ ಶೋಧ ನಡೆಸಿದರೂ ಪತ್ತೆಯಾಗದ್ದರಿಂದ ಹುಸಿ ಇಮೇಲ್​ ಎಂಬುದು ಖಾತ್ರಿಯಾಯಿತು.

"

ಜಿಲ್ಲಾ ನ್ಯಾಯಾಲಯಕ್ಕೆ ಬಾಂಬ್​ ಬೆದರಿಕೆ ಇಮೇಲ್​ ಬಂದಿದ್ದರಿಂದ ಕೂಡಲೇ ಎಲ್ಲೆಡೆ ಶೋಧ ನಡೆಸಲಾಗಿದೆ. ಶಹಾಪುರ, ಸುರಪುರ ಕೋರ್ಟ್​ಗಳಲ್ಲೂ ತಪಾಸಣೆ ಮಾಡಿಸಿದ್ದು, ಎಲ್ಲೂ ಬಾಂಬ್​ ಪತ್ತೆಯಾಗಿಲ್ಲ. ಕೋರ್ಟ್​ನ ಅನುಮತಿ ಪಡೆದು ದೂರು ದಾಖಲಿಸಲಾಗುವುದು.

— > ಪೃಥ್ವಿಕ್​ ಶಂಕರ್​ ಜಿಲ್ಲಾ ಪೊಲೀಸ್​ ವರಿಷ್ಠಾಧಿಕಾರಿ