ಧಾರವಾಡ ನಗರ ಹೊರವಲಯದಲ್ಲಿ ಯುವತಿಯ ಶವ ಪತ್ತೆ

ಪ್ಯಾರಾ ಮೆಡಿಕಲ್​ ಕೋರ್ಸ್​ ಮುಗಿಸಿದ್ದ ಝಕಿಯಾ ನೌಕರಿಗಾಗಿ ಹುಡುಕಾಟ ನಡೆಸಿದ್ದಳು. ಇದೇ ವಿಚಾರವಾಗಿ ಮಂಗಳವಾರ ಸಂಜೆ 5 ಗಂಟೆ ಸುಮಾರಿಗೆ ಹೊರ ಹೋದವಳು ರಾತ್ರಿಯಾದರೂ ಮನೆಗೆ ಬಂದಿರಲಿಲ್ಲ. ಇದರಿಂದ ಗಾಬರಿಗೊಂಡ ಪಾಲಕರು ಶಹರ ಠಾಣೆಗೆ ಮಾಹಿತಿ ನೀಡಿದ್ದರು.

ಯುವತಿಯ ಬಳಿ ಇದ್ದ ಮೊಬೈಲ್​ ಟವರ್​ ಲೊಕೇಶನ್​ ಅತ್ತಿಕೊಳ್ಳ, ಮನಸೂರು ರಸ್ತೆ ತೋರಿಸಿದ್ದನ್ನು ಪೊಲೀಸರು ಪಾಲಕರಿಗೆ ತಿಳಿಸಿದ್ದರು. ಪೊಲೀಸ್​ ಸಿಬ್ಬಂದಿ ಹಾಗೂ ಸಂಬಂಧಿಕರು ಈ ಪ್ರದೇಶದಲ್ಲಿ ತಡರಾತ್ರಿವರೆಗೆ ಹುಡುಕಾಟ ನಡೆಸಿದರೂ ಪತ್ತೆಯಾಗಿರಲಿಲ್ಲ. ಬುಧವಾರ ಬೆಳಗ್ಗೆ ಈ ರಸ್ತೆ ಮಾರ್ಗವಾಗಿ ಹೋಗುತ್ತಿದ್ದವರು ಮೃತದೇಹ ಕಂಡು ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ. ಸಂಬಂಧಿಕರು ಸ್ಥಳಕ್ಕೆ ಭೇಟಿ ನೀಡಿದಾಗ ಮೃತದೇಹದ ಗುರುತು ಪತ್ತೆಯಾಗಿದೆ.

ಸ್ಥಳಕ್ಕೆ ಎಸ್​ಪಿ ಗುಂಜನ್​ ಆರ್ಯ ಹಾಗೂ ಗ್ರಾಮಿಣ ಠಾಣೆ ಪೊಲೀಸರು ಭೇಟಿ ನೀಡಿ ಪರಿಶೀಲಿಸಿದರು. ಯುವತಿಯ ಕತ್ತಿಗೆ ವೇಲ್​ನಿಂದ ಬಿಗಿದು ಹತ್ಯೆ ಮಾಡಿ ನಿರ್ಜನ ಪ್ರದೇಶದಲ್ಲಿ ಎಸೆದು ಹೋಗಲಾಗಿದೆ ಎಂದು ಮೇಲ್ನೋಟಕ್ಕೆ ಕಂಡುಬಂದಿದೆ. ಈ ಕುರಿತು ತನಿಖೆ ಕೈಗೊಳ್ಳಲಾಗುವುದು ಎಂದು ಎಸ್​ಪಿ ಗುಂಜನ್​ ಆರ್ಯ ಪ್ರತಿಕ್ರಿಯಿಸಿದರು.