ಮಟನ್ ಊಟ ಆರ್ಡರ್ ಮಾಡುವ ಮುನ್ನ ಎಚ್ಚರ!; ಬೆಂಗಳೂರಲ್ಲಿ ಮಟನ್ ಹೆಸರಲ್ಲಿ ಬೀಫ್ ಖಾದ್ಯ ಮಾರಾಟ, ಇಬ್ಬರ ಬಂಧನ..Bengaluru

ಬೆಂಗಳೂರು: ಮಟನ್​ ಮಾರಾಟ ಮಾಡುವ ನೆಪದಲ್ಲಿ ಗ್ರಾಹಕರಿಗೆ  ದನದ ಮಾಂಸದ ಬಾಡೂಟ ಉಣಿಸುತ್ತಿದ್ದ  ಘಟನೆ ಬೆಂಗಳೂರಿನಲ್ಲಿ ಬೆಳಕಿಗೆ ಬಂದಿದೆ. ರೆಸ್ಟೋರೆಂಟ್ ಮಾಲೀಕರಿಬ್ಬರನ್ನು ಗುಪ್ತಚರ ಅಧಿಕಾರಿಗಳು ನೀಡಿದ ಮಾಹಿತಿ ಮೇರೆಗೆ ಆವಲಹಳ್ಳಿ ಪೊಲೀಸರು ಬಂಧಿಸಿದ್ದಾರೆ.

ಕೇರಳ ಮೂಲದ ಜಿಜೂ ಅಲೆಕ್ಸಾಂಡರ್​​ (45) ಮತ್ತು ಶೀಬು (44) ಬಂಧಿತರು. ಮತ್ತೊಬ್ಬ ಆರೋಪಿ ಅಭಿಲಾಷ್ ಎಂಬಾತ ಪರಾರಿಯಾಗಿದ್ದು, ಆತನ ಪತ್ತೆಗಾಗಿ ಪೊಲೀಸರು ಹುಡುಕಾಟ ನಡೆಸುತ್ತಿದ್ದಾರೆ ಎನ್ನಲಾಗಿದೆ. ಭೈರತಿಯಲ್ಲಿ ಬಾಡಿಗೆ ಮನೆ ಪಡೆದು ವಾಸವಾಗಿದ್ದ  ಆರೋಪಿಗಳು ಬೊಮ್ಮನಹಳ್ಳಿ ಬಳಿ ಇರುವ ಕಾಯಲೋರಂ ರೆಸ್ಟೋರೆಂಟ್​​ನ ಮಾಲೀಕರು ಎನ್ನಲಾಗಿದೆ,

ಇತ್ತೀಚೆಗೆ ಯುವಕರ ತಂಡವೊಂದು ರೆಸ್ಟೋರೆಂಟ್‌ಗೆ ಊಟ ಮಾಡಲು ಹೋಗಿತ್ತು. ಅವರು ಆರ್ಡರ್ ಮಾಡಿದ್ದ  ಮಟನ್​ ಊಟದ ಬದಲಿಗೆ, ಹೋಟೆಲ್ ಸಿಬ್ಬಂದಿ ದನದ ಮಾಂಸ ನೀಡಿದ್ದರು. ಇದನ್ನು ಸೇವಿಸಿದ ಯುವಕರಿಗೆ ಅನುಮಾನ ಬಂದು ಹೊಟೇಲ್ ಮಾಲೀಕರನ್ನು ಪ್ರಶ್ನಿಸಿದ್ದಲ್ಲದೆ ಪೊಲೀಸರಿಗೂ ಮಾಹಿತಿ ನೀಡಿದ್ದರು.

ಆರೋಪಿಗಳು ಒಂದೂವರೆ ವರ್ಷಗಳಿಂದ ಅಂದರೆ 18 ತಿಂಗಳಿನಿಂದ ರೆಸ್ಟೋರೆಂಟ್​ನಲ್ಲಿ ಮಟನ್​ ಎಂದು ಹೇಳಿ ಬೀಫ್​ ಆಹಾರ ನೀಡಲಾಗುತ್ತಿದೆ ಆ ಮೂಲಕ ಮೋಸ ಮಾಡಲಾಗುತ್ತಿದೆ ಎಂದು ನೂರಾರು ಗ್ರಾಹಕರು ಪೊಲೀಸರಿಗೆ ದೂರು ನೀಡಿದ್ದರು. ರೆಸ್ಟೋರೆಂಟ್​ ಮೆನುವಿನಲ್ಲಿಯೂ ಬೀಫ್​ ಬಗ್ಗೆ ಉಲ್ಲೇಖಿಸಿರಲಿಲ್ಲ.  ಈ ದೂರುಗಳ ಆಧಾರದಮೇಲೆ ಗ್ರಾಹಕರ ಸೋಗಿನಲ್ಲಿ ರೆಸ್ಟೋರೆಂಟ್​ಗೆ ಭೇಟಿ ಕೊಟ್ಟ ಪೊಲೀಸರು ಫುಡ್​ ಆರ್ಡರ್​ ಮಾಡಿದರು, ಮಟನ್​ ಖಾದ್ಯಗಳನ್ನು ಪರಿಶೀಲಿಸಿದಾಗ ಇದು ಗೋಮಾಂಸ ಎಂದು ತಿಳಿಯಿತು. ಸದ್ಯ ರೆಸ್ಟೋರೆಂಟ್ ಸೀಜ್​ ಮಾಡಿದ್ದಾರೆ. 

ನಾವು ನಂಬಿಕೆಯಿಂದ ಹಣ ಕೊಟ್ಟು ಮಟನ್ ಬಿರಿಯಾನಿ ತಿನ್ನಲು ಬಂದರೆ, ನಮಗೆ ಈ ರೀತಿ ವಂಚನೆ ಮಾಡುತ್ತಿರುವುದು ಅತ್ಯಂತ ದ್ರೋಹದ ಕೆಲಸ. ಇಂತಹ ರೆಸ್ಟೋರೆಂಟ್‌ಗಳ ಲೈಸೆನ್ಸ್ ಅನ್ನು ಶಾಶ್ವತವಾಗಿ ರದ್ದುಗೊಳಿಸಬೇಕು" ಎಂದು ಸಾಮಾಜಿಕ ಜಾಲತಾಣಗಳಲ್ಲಿ ಸಾರ್ವಜನಿಕರು ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ, (ಏಜೆನ್ಸೀಸ್).