ಬೆಂಗಳೂರು: ಸ್ಯಾಂಡಲ್ವುಡ್ ನಟ, ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಆಪ್ತ ವಲಯದಲ್ಲಿ ಗುರುತಿಸಿಕೊಂಡಿದ್ದ ನಟ ಧನ್ವೀರ್ ವಿರುದ್ಧ ದರ್ಶನ್ ಪತ್ನಿ ವಿಜಯಲಕ್ಷ್ಮೀ ಅವರ ಆಪ್ತ ಸಹಾಯಕ ನಾಗರಾಜ ಎನ್ನುವವರು ಪೊಲೀಸ್ ಕಂಪ್ಲೇಂಟ್ (NCR) ನೀಡಿದ್ದಾರೆಂದು ತಿಳಿದುಬಂದಿದೆ.
ಪೋನ್ ಕರೆಯಲ್ಲಿ ಅವಾಚ್ಯ ಪದಗಳನ್ನು ಬಳಸಿದ ಹಿನ್ನಲೆಯಲ್ಲಿ ನಟ ಧನ್ವೀರ್ ವಿರುದ್ಧ ಮ್ಯಾನೇಜರ್ ನಾಗರಾಜ್ ರಾಜರಾಜೇಶ್ವರಿ ಠಾಣೆಯಲ್ಲಿ ದೂರನ್ನು ದಾಖಲಿಸಿದ್ದಾರೆಂದು ಹೇಳಲಾಗುತ್ತಿದೆ. ದೂರವಾಣಿ ಕರೆಯಲ್ಲಿ ಧನ್ವೀರ್ ಕೆಟ್ಟಾ-ಕೊಳಕ ಪದಗಳನ್ನು ಬಳಸಿದ್ದಾರೆಂದು ಆರೋಪಿಸಿರುವ ನಾಗರಾಜ್, ಕಾಲ್ ರೆಕಾರ್ಡ್ ಅನ್ನು ಪೊಲೀಸರಿಗೆ ಸಾಕ್ಷಿರೂಪದಲ್ಲಿ ಸಲ್ಲಿಸಿದ್ದು, ಕೆಲವೇ ಸಮಯದಲ್ಲಿ ನಟ ಧನ್ವೀರ್ನನ್ನು ಆರ್ಆರ್ ನಗರ ಪೊಲೀಸರು ವಿಚಾರಣೆಗೆ ಕರೆತರಲಿದ್ದಾರೆಂದು ಹೇಳಲಾಗುತ್ತಿದೆ.
ಕಳೆದ ಕೆಲ ದಿನಗಳಿಂದ ನಟ ಧನ್ವೀರ್ ವಿಚಾರ ಸೋಷಿಯಲ್ ಮೀಡಿಯಾನಲ್ಲಿ ವಿವಾದಕ್ಕೆ ಕಾರಣವಾಗುತ್ತಲೇ ಇದೆ. ಯುವ ದಸರಾ ಸಂದರ್ಭದಲ್ಲಿ ಕೂಡ ಧನ್ವೀರ್ ನೀಡಿದ್ದ ಹೇಳಿಕೆ ವಿವಾದದ ರೂಪವನ್ನು ಪಡೆದುಕೊಂಡು ತೀವ್ರ ಚರ್ಚೆಗೆ ಕಾರಣವಾಗಿತ್ತು.
ನಂತರ ದರ್ಶನ್ ಪತ್ನಿ ವಿಜಯಲಕ್ಷ್ಮೀ ಇನ್ಸ್ಟಾಗ್ರಾಂನಲ್ಲಿ, "ಕೆಲವರು ದರ್ಶನ್ ಅವರ ಹೆಸರನ್ನು ತಮ್ಮ ಸ್ವಾರ್ಥಕ್ಕಾಗಿ ಬಳಸಿಕೊಳ್ಳುತ್ತಾರೆ" ಎನ್ನುವ ಅರ್ಥದಲ್ಲಿ ಸ್ಟೋರಿಯೊಂದನ್ನು ಹಂಚಿಕೊಂಡಿದ್ದರು. ಇದು ನಟ ಧನ್ವೀರ್ಗೆ ಪರೋಕ್ಷವಾಗಿ ನೀಡಿದ್ದ ಟಾಂಗ್ ಎಂಬ ವದಂತಿ ಹಬ್ಬಿತ್ತು.
ಇದಕ್ಕೆ ಪ್ರತಿಯಾಗಿ ನಟ ಧನ್ವೀರ್ ಕೂಡ, ಬೇರೆಯವರ ಮೇಲೆ ಗೂಬೆ ಕೂರಿಸಿ, ಕೊನೆಗೆ ತಾವೇ ಸಂತ್ರಸ್ತರೆಂಬಂತೆ ವರ್ತಿಸುವುದು ಕೆಲವರ ಜಾಯಮಾನ. ಹೆದರಿಸುವುದು ನಿಮ್ಮ ಚಾಳಿಯಾದರೆ, ಅದನ್ನು ಎದುರಿಸಿ ನಿಲ್ಲುವುದು ನನ್ನ ಗುಣವಾಗಿದೆ ಎಂದು ವಿಜಯಲಕ್ಷ್ಮೀಗೆ ಧನ್ವೀರ್ ಪರೋಕ್ಷ ತಿರುಗೇಟನ್ನು ನೀಡಿದ್ದರು. ಈ ಘಟನೆ ಬಳಿಕ, ನಟ ಧನ್ವೀರ್, ಮ್ಯಾನೇಜರ್ ನಾಗರಾಜ್ಗೆ ಕರೆ ಮಾಡಿ, ಅವಾಚ್ಯ ಪದಗಳಿಂದ ನಿಂದಿಸಿದ್ದಾರೆಂದು ಈಗ ದೂರನ್ನು ದಾಖಲಿಸಲಾಗಿದೆ.