ಸಾವಯವ ಕೃಷಿಯಲ್ಲೇ ಸ್ವಾವಲಂಬಿ ಬದುಕು Agriculture

ಮಾಲೂರು ತಾಲೂಕಿನ ಮಾಸ್ತಿ ಹೋಬಳಿಯ ಕುಪ್ಪೂರು ಗ್ರಾಮದ ಕೃಷಿಕ ಕುಟುಂಬದ ಮಂಜುಳಾ ಅವರೇ ಈ ಸಾಧಕಿ. ಕುಟುಂಬ ಸದಸ್ಯರ ಸಹಕಾರದಿಂದ ತೆರೆದ ಬಾವಿ, ಕೊಳವೆ ಬಾವಿ ಹಾಗೂ ಕೃಷಿ ಹೊಂಡದಲ್ಲಿನ ನೀರು ಬಳಕೆ ಮಾಡಿಕೊಂಡು ಹನಿ ನೀರಾವರಿ ಪದ್ಧತಿ ಅಳವಡಿಸಿಕೊಂಡು ನಾನಾ ರೀತಿಯ ಬೆಳೆ ಬೆಳೆಯುವ ಮೂಲಕ ಸಮಗ್ರ ಕೃಷಿ ಬೇಸಾಯಯದಲ್ಲಿ ಯಶಸ್ವಿಯಾಗಿದ್ದು, ಸುಮಾರು 10 ಎಕರೆಯಲ್ಲಿ ಮಿಶ್ರ ಬೇಸಾಯ ಮಾಡಿ ಯಶಸ್ಸು ಕಂಡುಕೊಂಡಿದ್ದಾರೆ. ನ.15ರಂದು ಜಿಕೆವಿಕೆಯಿಂದ ಕೊಡಮಾಡುವ ಅತ್ಯುತ್ತಮ ರೈತ ಕೃಷಿ ಪ್ರಶಸ್ತಿಗೆ ಭಾಜನರಾಗಿದ್ದಾರೆ.

ಜಿಲ್ಲೆಯಲ್ಲಿ ಸಮರ್ಪಕ ಮಳೆಯಾಗದ ಕಾರಣ ಅಂತರ್ಜಲಮಟ್ಟ ಸಂಪೂರ್ಣ ಕುಸಿದಿದೆ.

1,500 ಅಡಿ ಆಳಕ್ಕೆ ಕೊಳವೆಬಾವಿ ಕೊರೆಸಿದರೂ ನೀರು ಸಿಗುತ್ತಿಲ್ಲ. ನೂರಾರು ಕೊಳವೆಬಾವಿಗಳು ಬತ್ತಿವೆ. ರೈತರು ಕೃಷಿ ಚಟುವಟಿಕೆ ಸ್ಥಗಿತಗೊಳಿಸಿ ಜೀವನೋಪಾಯಕ್ಕಾಗಿ ಕಾರ್ಖಾನೆಗಳತ್ತ ಮುಖ ಮಾಡುತ್ತಿದ್ದಾರೆ.

ಇಂತಹ ಸನ್ನಿವೇಶದಲ್ಲಿ ಕುಪ್ಪೂರು ಗ್ರಾಮದ ಮಂಜುಳಾ, ಪತಿ ಹನುಮಂತಪ್ಪ ಸಹಕಾರದಿಂದ ಕೊಳವೆಬಾವಿ ಹಾಗೂ ಕೃಷಿ ಹೊಂಡದ ನೀರು ಬಳಕೆ ಮಾಡಿಕೊಂಡು 1 ಎಕರೆಯಲ್ಲಿ ಕ್ಯಾಪ್ಸಿಕಂ, 3 ಎಕರೆಯಲ್ಲಿ ಆಲೂಗಡ್ಡೆ, 2 ಎಕರೆಯಲ್ಲಿ ಬೀನ್ಸ್​, 2 ಎಕರೆ ರಾಗಿ ಬೆಳೆಯುತ್ತಿದ್ದು, ಇದರ ಜತೆಗೆ ಕೋಳಿ ಫಾಮ್​ರ್ ಹಾಗೂ ಉಪಕಸುಬಿನಲ್ಲಿ ತೊಡಗಿದ್ದಾರೆ.

ಮನೆಯ ಮುಂಭಾಗದಲ್ಲಿರುವ ಶೆಡ್​ಗಳಲ್ಲಿ 3 ನಾಟಿ ಹಸು, 4 ಎಮ್ಮೆ, 26 ಕುರಿ, 16 ಮೇಕೆ, 40 ನಾಟಿ ಕೋಳಿ ಸಾಕುತ್ತಿದ್ದಾರೆ. ಸರ್ಕಾರದ ವಿವಿಧ ಇಲಾಖೆಗಳಿಂದ ಸಿಗುವಂತಹ ಸೌಲಭ್ಯ ಸದ್ಬಳಸಿಕೊಂಡಿದ್ದಾರೆ. ಆಧುನಿಕ ಯಂತ್ರಗಳಾದ ಟ್ರ್ಯಾಕ್ಟರ್​, ರೋಟೊವೇಟರ್​, ಸೈಕಲ್​ವೀಲ್​ನಂತಹ ಆಧುನಿಕ ಉಪಕರಣ ಅಳವಡಿಸಿಕೊಂಡಿದ್ದಾರೆ.

ರಾಸುಗಳಿಗೆ ಜೋಳದ ಮೇವು, ಮೆಕ್ಕೆಜೋಳ ಮತ್ತು ನೇಪಿರ್​ಹುಲ್ಲನ್ನು ಬೆಳೆಯುತ್ತಿದ್ದು, ಮಣ್ಣಿನ ಫಲವತ್ತತೆ ಕಾಪಾಡಲು, ಹಸಿರೆಲೆ ಗೊಬ್ಬರ, ಕೊಟ್ಟಿಗೆ ಗೊಬ್ಬರ, ಎರೆಹುಳ ಗೊಬ್ಬರ ಮತ್ತು ಇತರೆ ರಾಸಯನಿಕ ಗೊಬ್ಬರ ನೀಡುವುದರ ಮೂಲಕ ಪೋಷಕಾಂಶ ನಿರ್ವಹಣೆ ಮಾಡುತ್ತಿದ್ದಾರೆ.

ಉತ್ತಮ ಆರೋಗ್ಯ ಪಡೆಯಬೇಕೆಂದರೆ ಸಾವಯವ ಕೃಷಿ ಪದ್ಧತಿಯಲ್ಲಿ ಬೆಳೆ ಬೆಳೆಯಬೇಕು. ರೈತರು ಅಧಿಕ ಇಳುವರಿ ಪಡೆಯುವ ಉದ್ದೇಶದಿಂದ ರಾಸಾಯನಿಕ ಹೆಚ್ಚಾಗಿ ಬಳಕೆ ಮಾಡುತ್ತಿದ್ದಾರೆ. ಆದರೆ ಅದು ನಮ್ಮ ಮಕ್ಕಳ ಹಾಗೂ ಮುಂದಿನ ಪೀಳಿಗೆಗೆ ಸಮಸ್ಯೆಯಾಗುತ್ತದೆ. ಅಲ್ಲದೆ, ಪ್ರತಿ ದಿನದ ಸಂಪಾದನೆ ರೋಗಗಳ ವೆಚ್ಚಕ್ಕೆ ಸಾಕಾಗುವುದಿಲ್ಲ. ನಮ್ಮ ರೈತರು ಈಗಲಾದರೂ ಎಚ್ಚೆತ್ತುಕೊಂಡು ಆರೋಗ್ಯಯುತ ಹಾಗೂ ಪೌಷ್ಟಿಕ ತರಕಾರಿ ಬೆಳೆದು ಸಮೃದ್ಧ ಭಾರತದ ಅಭಿವೃದ್ಧಿಗೆ ಕೈ ಜೋಡಿಸಬೇಕು.

— ಮಂಜುಳಾ, ರೈತ ಮಹಿಳೆ, ಕುಪ್ಪೂರು, ಮಾಸ್ತಿ ಹೋಬಳಿ