ಅಕ್ರಮವಾಗಿ ಕೊಳಚೆ ನೀರು ಹರಿಸಿಕೊಂಡರೆ ಕ್ರಮ

ಗೋಪಸಂದ್ರ ಕೆರೆ ಮತ್ತು ಸಮೀಪದ ಮ್ಯಾನ್​ಹೋಲ್​ ಬಳಿ ಅಕ್ರಮವಾಗಿ ಅಳವಡಿಸಿದ್ದ ಪೈಪ್​ಗಳು ಹಾಗೂ ಮೋಟಾರ್​ಗಳನ್ನು ನಗರಸಭೆ ಸಿಬ್ಬಂದಿ ವಶಪಡಿಸಿಕೊಂಡಿದ್ದಾರೆ.

ಪೌರಾಯುಕ್ತ ಮಾತನಾಡಿ, ನಗರದ ಯುಜಿಡಿ ನೀರು ಗೋಪಸಂದ್ರ ಕೆರೆಗೆ ಸೇರಬಾರದು ಮತ್ತು ಕೆರೆಯನ್ನು ಪ್ರವಾಸಿ ತಾಣವನ್ನಾಗಿ ಮಾಡಬೇಕು ಎಂಬ ಉದ್ದೇಶದಿಂದ ಶಾಸಕ ಡಾ.ಎಂ.ಸಿ.ಸುಧಾಕರ್​ ಅವರು ಕಾಳಜಿವಹಿಸಿ ಎಸ್​ಟಿಪಿ (ತ್ಯಾಜ್ಯ ನೀರು ಶುದ್ಧೀಕರಣ ಟಕ) ಸ್ಥಾಪಿಸಿದ್ದಾರೆ. ಯುಜಿಡಿ ನೀರನ್ನು ಸದ್ಯ ಈ ಟಕಕ್ಕೆ ಹರಿಸಲಾಗುತ್ತಿದೆ. ಆದರೆ ಕೆಲವರು ಯುಜಿಡಿ ಮ್ಯಾನ್​ಹೋಲ್​ಗಳಿಗೆ ಕಲ್ಲು ಹಾಗೂ ಮರಳು ಮೂಟೆಗಳನ್ನು ಹಾಕಿ ನೀರು ಮುಂದಕ್ಕೆ ಹರಿಯದಂತೆ ತಡೆಯುತ್ತಿದ್ದಾರೆ. ಬಳಿಕ ಪೈಪ್​ಗಳ ಮೂಲಕ ಅಕ್ರಮವಾಗಿ ಜಮೀನುಗಳಿಗೆ ಹರಿಸಿಕೊಳ್ಳುತ್ತಿರುವುದು ಕಂಡುಬಂದಿದೆ ಎಂದರು.

ಮ್ಯಾನ್​ಹೋಲ್​ಗಳಿಗೆ ಅಡ್ಡಲಾಗಿ ಕಲ್ಲು, ಮರಳು ಮೂಟೆ ಹಾಕುವುದರಿಂದ ಇಡೀ ಯುಜಿಡಿ ವ್ಯವಸ್ಥೆ ಹಾಳಾಗುತ್ತಿದೆ. ಪೈಪ್​ಗಳಲ್ಲಿ ಕೊಳಚೆ ನೀರು ತುಂಬಿ ಮ್ಯಾನ್​ಹೋಲ್​ಗಳ ಮೂಲಕ ರಸ್ತೆಗೆ ಚಿಮ್ಮುತ್ತಿದೆ. ಇದರಿಂದ ಇಡೀ ಪರಿಸರ ದುರ್ವಾಸನೆಯಿಂದ ಕೂಡಿದ್ದು, ಸಾರ್ವಜನಿಕರ ಆರೋಗ್ಯಕ್ಕೆ ತೊಂದರೆಯಾಗುತ್ತಿದೆ ಎಂದು ಪೌರಾಯುಕ್ತರು ಬೇಸರ ವ್ಯಕ್ತಪಡಿಸಿದರು.

ಕೆರೆ, ಕೊಳಚೆ ನೀರನ್ನು ಪಂಪ್​ ಮೋಟಾರ್​ ಮೂಲಕ ಜಮೀನುಗಳಿಗೆ ಹರಿಸಿಕೊಳ್ಳುತ್ತಿದ್ದವರ ಮೋಟಾರ್​ ಹಾಗೂ ಪೈಪ್​ಗಳನ್ನು ಜಪ್ತಿ ಮಾಡಲಾಗಿದೆ. ತಪ್ಪು ಮಾಡಿದವರ ವಿರುದ್ಧ ಠಾಣೆಯಲ್ಲಿ ಎಫ್​ಐಆರ್​ ದಾಖಲಿಸಲಾಗುವುದು. ಅಕ್ರಮ ನಡೆದಿರುವ ಜಾಗ ನಗರಸಭೆ ವ್ಯಾಪ್ತಿಯಲ್ಲಿದ್ದರೆ ನಾನೇ ನೇರವಾಗಿ ದೂರು ನೀಡುತ್ತೇನೆ. ಒಂದು ವೇಳೆ ಗ್ರಾಪಂ ವ್ಯಾಪ್ತಿಯಲ್ಲಿದ್ದರೆ ಪಿಡಿಒ ಮೂಲಕ ದೂರು ದಾಖಲಿಸಲು ಕ್ರಮ ಕೈಗೊಳ್ಳಲಾಗುವುದು ಎಂದು ಸ್ಪಷ್ಟಪಡಿಸಿದರು.

ಊಲವಾಡಿ ಗ್ರಾಪಂ ಅಭಿವೃದ್ಧಿ ಅಧಿಕಾರಿ ಸುರೇಶ್​ ಮಾತನಾಡಿ, ಯುಜಿಡಿ ನೀರಿಗೆ ಕೆಲವರು ಅಕ್ರಮವಾಗಿ ಪೈಪ್​ ಅಳವಡಿಸಿಕೊಂಡಿರುವ ಮಾಹಿತಿ ಸಿಕ್ಕ ತಕ್ಷಣವೇ ಪೌರಾಯುಕ್ತರ ಗಮನಕ್ಕೆ ತಂದಿದ್ದೇನೆ. ಹಿರಿಯ ಅಧಿಕಾರಿಗಳ ಆದೇಶದಂತೆ ಮುಂದಿನ ಕ್ರಮ ಜರುಗಿಸಲಾಗುವುದು ಎಂದರು.