ಎಂಬಿಬಿಎಸ್​ ಸೀಟು ವಂಚಿತರಿಗೆ ತಲಾ 20 ಲಕ್ಷ ರೂ. ಪರಿಹಾರ| High court

ಬೆಂಗಳೂರಿನ ಸ್ಪರ್ಶಾ ವಿಜಯ್​ ಮತ್ತು ತುಮಕೂರಿನ ಕೆ.ಸಿ. ಮಂಜುನಾಥ್​ ಎಂಬುವವರು ಸಲ್ಲಿಸಿದ್ದ ಅರ್ಜಿ ವಿಚಾರಣೆ ನಡೆಸಿದ ನ್ಯಾಯಮೂರ್ತಿಗಳಾದ ಜಯಂತ್​ ಬ್ಯಾನರ್ಜಿ ಮತ್ತು ಟಿ.ಎಂ. ನದಾಫ್ ಅವರಿದ್ದ ವಿಭಾಗೀಯ ನ್ಯಾಯಪೀಠ ಈ ಆದೇಶ ನೀಡಿದೆ. ದಂಡದ ಮೊತ್ತವನ್ನು ಸಂತ್ರಸ್ತ ಅಭ್ಯರ್ಥಿಗಳಿಗೆ ಪಾವತಿಸಲು ನಿರ್ದೇಶನ ನೀಡಲಾಗಿದೆ.

ಅರ್ಜಿದಾರರು 2016-17ನೇ ಸಾಲಿನ ನೀಟ್​ ಪರೀಕ್ಷೆಯಲ್ಲಿ ಅರ್ಹತೆ ಪಡೆದು, ಎಎಂಪಿಸಿಕೆ ನಡೆಸಿದ ಎರಡನೇ ಸುತ್ತಿನ ಕೌನ್ಸೆಲಿಂಗ್​ನಲ್ಲಿ ಬೆಂಗಳೂರಿನ ಖಾಸಗಿ ಕಾಲೇಜೊಂದರಲ್ಲಿ ಎಂಬಿಬಿಎಸ್​ ಸೀಟು ಪಡೆದುಕೊಂಡಿದ್ದರು.2016 ಸೆ. 30ಕ್ಕೆ ನಿಗದಿ ಮಾಡಲಾಗಿದ್ದ ಅಂತಿಮ ಗಡುವಿನೊಳಗೆ ಕೋರ್ಸ್​ ಶುಲ್ಕದ 5.75 ಲಕ್ಷ ಮೊತ್ತದ ಡಿಮಾಂಡ್​ ಡ್ರಾಫ್ಟ್ (ಡಿಡಿ) ಮತ್ತು ಇತರ ಅಗತ್ಯ ದಾಖಲೆಗಳೊಂದಿಗೆ ಕಾಲೇಜಿಗೆ ವರದಿ ಮಾಡಿಕೊಂಡಿದ್ದರೂ, ಸೀಟುಗಳ ಲಭ್ಯತೆಯಿಲ್ಲ ಎಂಬ ಕಾರಣ ನೀಡಿ ಕಾಲೇಜು ಆಡಳಿತ ಮಂಡಳಿಯು ಅರ್ಜಿದಾರರನ್ನು ವಾಪಾಸು ಕಳುಹಿಸಿತ್ತು.

ಈ ಬಗ್ಗೆ ಪ್ರಶ್ನಿಸಲು ಎಎಂಪಿಸಿಕೆ ಕಚೇರಿಗೆ ಬೇಟಿ ನೀಡಿದಾಗ ಅದು ಮುಚ್ಚಲ್ಪಟ್ಟಿತ್ತು ಮತ್ತು ಇವರು ಕಳುಹಿಸಿದ್ದ ಇ-ಮೇಲ್​ಗಳಿಗೂ ಯಾವುದೇ ಪ್ರತಿಕ್ರಿಯೆ ನೀಡಿರಲಿಲ್ಲ. ಇದೇ ಅವಧಿಯಲ್ಲಿ ಅರ್ಜಿದಾರರಿಗಿಂತ ಕಡಿಮೆ ಅಂಕಗಳಿಸಿದ್ದ ಬೇರೆ ಇಬ್ಬರು ವಿದ್ಯಾರ್ಥಿಗಳಿಗೆ ಸೀಟು ಹಂಚಿಕೆ ಮಾಡಿದ್ದ ಕಾಲೇಜು ಆಡಳಿತ ಮಂಡಳಿಯು ಪ್ರವೇಶಾತಿ ನೀಡಿತ್ತು. ಈ ಕ್ರಮ ಪ್ರಶ್ನಿಸಿ ಹೈಕೋರ್ಟ್​ಗೆ ಅರ್ಜಿ ಸಲ್ಲಿಸಿದ್ದ ಅಭ್ಯರ್ಥಿಗಳು 3 ಕೋಟಿ ರೂಪಾಯಿ ಪರಿಹಾರ ಕೋರಿದ್ದರು. 

ಈ ಪ್ರಕರಣ ನಡೆದು 10 ವರ್ಷ ಕಳೆದಿರುವುದರಿಂದ ಮತ್ತು ಅರ್ಜಿದಾರರು ತಮ್ಮ ವಿದ್ಯಾಭ್ಯಾಸವನ್ನು ಬೇರೆ ಕಾಲೇಜುಗಳಲ್ಲಿ ಮುಂದುವರಿಸಿ ಪದವಿ ಪೂರೈಸಿರುವ ಕಾರಣ ಪ್ರವೇಶಾತಿ ನೀಡಲು ಸಾಧ್ಯವಾಗುವುದಿಲ್ಲ. ಆದ್ದರಿಂದ ಎಸ್​. ಕೃಷ್ಣ ಶ್ರದ್ಧಾ ಪ್ರಕರಣದಲ್ಲಿ ಸುಪ್ರೀಂ ಕೋರ್ಟ್​ ನೀಡಿರುವ ನಿರ್ದೇಶನದಂತೆ ಹಣಕಾಸಿನ ಪರಿಹಾರ ನೀಡಿ ಹೈಕೋರ್ಟ್​ ಆದೇಶಿಸಿದೆ. ಅರ್ಜಿದಾರರ ಬದಲಾಗಿ ಸೀಟು ಪಡೆದುಕೊಂಡ ಇಬ್ಬರು ಅಭ್ಯರ್ಥಿಗಳ ವಿರುದ್ಧ ಯಾವುದೇ ಆದೇಶ ನೀಡಲಾಗಿಲ್ಲ.