| ಶ್ರೀಕಾಂತ್ ಶೇಷಾದ್ರಿ ಬೆಂಗಳೂರು
ರಾಜ್ಯದಲ್ಲಿ ಟೆಂಡರ್ ಕಮಿಷನ್ ಗಲಾಟೆ ನಡುವೆಯೇ ಬೋಗಸ್ ಬಿಲ್ ಸೃಷ್ಟಿಸಿ ಸರ್ಕಾರದ ಹಣ ಲೂಟಿ ಹೊಡೆದಿರುವ ಪ್ರಕರಣ ಭಾರಿ ಸದ್ದು ಮಾಡುತ್ತಿದೆ. ಇದರ ಬೆನ್ನಲ್ಲೇ ಜಲಸಂಪನ್ಮೂಲ ಇಲಾಖೆಯ ವಿಚಕ್ಷಣಾ ದಳ ದಾಖಲೆಗಳ ಹುಡುಕಾಟ ತೀವ್ರಗೊಳಿಸಿದೆ. ಪ್ರಕರಣದ ಗಂಭೀರತೆ ಅರಿತು ಮಧ್ಯ ಪ್ರವೇಶಿಸಿರುವ ಸರ್ಕಾರ, ಕೇಂದ್ರೀಕೃತ ಪಾವತಿ ವ್ಯವಸ್ಥೆ ಜಾರಿಗೆ ಮುಂದಾಗಿದೆ.
ಕರ್ನಾಟಕ ನೀರಾವರಿ ನಿಗಮ ಸೇರಿ ವಿವಿಧ ನಿಗಮಗಳ ಅಧಿಕಾರಿ, ಸಿಬ್ಬಂದಿ ಗುತ್ತಿಗೆದಾರರೊಂದಿಗೆ ಶಾಮೀಲಾಗಿ ಕಾಮಗಾರಿಯ ಟೆಂಡರ್ ಕರೆಯದೆ ನಕಲಿ ಬಿಲ್ ಸೃಷ್ಟಿಸಿ ಕೋಟ್ಯಂತರ ರೂಪಾಯಿ ನುಂಗಿರುವ ಕುರಿತು ಸರ್ಕಾರದ ಮಟ್ಟದಲ್ಲಿ ಗುಸುಗುಸು ಚರ್ಚೆ ನಡೆದಿತ್ತು. ಈ ವೇಳೆಯೇ ಕರ್ನಾಟಕ ನೀರಾವರಿ ನಿಗಮ ವ್ಯಾಪ್ತಿಯ ಹಿಪ್ಪರಗಿ ಬ್ಯಾರೇಜ್ ಯೋಜನಾ ವಿಭಾಗ ಅಥಣಿ (ಬೆಳಗಾವಿ ವಲಯ), ನೀರಾವರಿ ಯೋಜನಾ ವಿಭಾಗ, ಕಲಬುರಗಿ (ಕಲಬುರಗಿ ವಲಯ), ತುಂಗಭದ್ರಾ ಎಡದಂಡೆ ಕಾಲುವೆ ವಿಭಾಗ, ಸಿರವಾರ (ಮುನಿರಾಬಾದ್) ವಲಯದ ಕಚೇರಿಗಳಲ್ಲಿ ನಕಲಿ ದಾಖಲೆ ಸೃಷ್ಟಿಸಿ ಕೋಟಿ ಕೋಟಿ ಲೂಟಿ ಮಾಡಿರುವುದು ಸರ್ಕಾರದ ಗಮನಕ್ಕೆ ಬಂದಿದೆ.
2015-16ರಿಂದಲೂ ಇಂತಹ ಪ್ರಕರಣಗಳು ನಡೆದಿರುವ ಬಗ್ಗೆ ಅನುಮಾನಗಳಿದ್ದು, ಇದರ ಪತ್ತೆ ಹೇಗೆಂಬುದೆ ಚಿಂತೆಯಾಗಿದೆ. ಇದೇ ಕಾರಣಕ್ಕೆ ತಕ್ಷಣದ ಡ್ಯಾಮೇಜ್ ಕಂಟ್ರೋಲ್ಗೆ ಕೇಂದ್ರೀಕೃತ ಪಾವತಿ ವ್ಯವಸ್ಥೆ ಮತ್ತು ಗುತ್ತಿಗೆದಾರರು ಆಡಿಟಿಂಗ್ ಮತ್ತು ಅಕೌಂಟ್ಸ್ ವ್ಯವಸ್ಥೆ ಸಂಪರ್ಕಕ್ಕೆ ಬಾರದ ವ್ಯವಸ್ಥೆ ರೂಪಿಸಲೂ ಇಲಾಖೆ ಮುಖ್ಯಸ್ಥರಿಗೆ ಸೂಚನೆ ನೀಡಲಾಗಿದೆ. ಇನ್ನು ಜಲಸಂಪನ್ಮೂಲ ಇಲಾಖೆ ನಿವೃತ್ತ ಇಂಜಿನಿಯೊಬ್ಬರು ಈ ನಕಲಿ ಬಿಲ್ ಪ್ರಕರಣ ವಿಚಾರವಾಗಿ ವಿಜಯವಾಣಿಗೆ ಮಾಹಿತಿ ನೀಡಿ, ಹಿಂದಿನ ಸರ್ಕಾರದಿಂದಲೂ ಬೋಗಸ್ ಬಿಲ್ ಸೃಷ್ಟಿ ಸದ್ದಿಲ್ಲದೆ ನಡೆದಿದೆ. ಎಲ್ಲರೂ ಶಾಮೀಲಾಗಿರುವ ಕಾರಣ ಬಹಿರಂಗವಾಗದಂತೆ ನೋಡಿಕೊಳ್ಳಲಾಗುತ್ತದೆ. ಅಲ್ಲಿ ಲೂಟಿ ಹೊಡೆದ ಹಣ ವಿಧಾನಸೌಧದವರೆಗೂ ಮುಟ್ಟಿರುವ ಸಾಧ್ಯತೆ ಇದೆ. ಅದರ ತನಿಖೆ ಅಷ್ಟು ಸುಲಭವಲ್ಲ ಎಂದು ವಿವರಿಸಿದ್ದಾರೆ.
ಸಾಮಾನ್ಯವಾಗಿ ಮಂಜೂರಾದ ಕಾಮಗಾರಿಗೆ ಮೊದಲು ಅಂದಾಜು ಪಟ್ಟಿ ತಯಾರಿಕೆ ಆಗುತ್ತದೆ, 100 ಕೋಟಿ ರೂ.ಗಿಂತ ಹೆಚ್ಚಿನದಾದರೆ ಸಮಗ್ರ ಯೋಜನಾ ವರದಿಯನ್ನು ಖಾಸಗಿಯವರ ನೆರವು ಪಡೆದು ಸಿದ್ಧಪಡಿಸಲಾಗುತ್ತದೆ. ಬಳಿಕ ತಾಂತ್ರಿಕ ಸಲಹಾ ಸಮಿತಿಯಿಂದ ಅನುಮೋದನೆಯಾಗುತ್ತದೆ. ಟೆಂಡರ್ ಒಪ್ಪಿಗೆಯಾದ ಮೇಲೆ ವರ್ಕ್ ಆರ್ಡರ್ ನೀಡಿ ಅಗ್ರಿಮೆಂಟ್ ಮಾಡಿಕೊಂಡು ಹಂತಹಂತವಾಗಿ ಪಾವತಿ ಮಾಡಲಾಗುತ್ತದೆ. ಕೊನೆಗೆ ಗುಣಮಟ್ಟ ಪರೀಕ್ಷೆ, ಅಂತಿಮ ಬಿಲ್ ಪಾವತಿ ಸಾಮಾನ್ಯ ಪ್ರಕ್ರಿಯೆಗಳು. ಆದರೆ ಈ ಬೋಗಸ್ ಬಿಲ್ ಪ್ರಕರಣದಲ್ಲಿ ಟೆಂಡರ್ ಕರೆಯದೆ, ಬೋರ್ಡ್ ಮೀಟಿಂಗ್ನಲ್ಲಿ ಅನುಮೋದನೆಯೂ ಆಗದೆ ಕೋಟ್ಯಂತರ ರೂ. ಅನ್ನು ಗುತ್ತಿಗೆದಾರರಿಗೆ ಪಾವತಿ ಹಿಂದೆ ದೊಡ್ಡ ಕೈಗಳಿರುವ ಶಂಕೆ ಎದ್ದು ಕಾಣಿಸುತ್ತಿದೆ.
ಮತ್ತೆ 20 ನಕಲಿ ಬಿಲ್ ಪತ್ತೆ: ಕರ್ನಾಟಕ ನೀರಾವರಿ ನಿಗಮ ನೇಮಿಸಿದ ತನಿಖಾ ತಂಡವು ಹಿಪ್ಪರಗಿ ಬ್ಯಾರೇಜ್ ನಾಲಾ ವಿಭಾಗಕ್ಕೆ ಸಂಬಂಧಿಸಿದಂತೆ ಕಾಮಗಾರಿಗಳ ನಕಲಿ ಬಿಲ್ ಹಾಗೂ ದಾಖಲೆಗಳನ್ನು ಸೃಷ್ಟಿಮಾಡಿ ಸರ್ಕಾರ 16.62 ಕೋಟಿ ರೂ. ದುರುಪಯೋಗಪಡಿಸಿಕೊಂಡಿದ್ದನ್ನು ಬಯಲಿಗೆಳೆದಿತ್ತು. ಈ ಪ್ರಕರಣದಲ್ಲಿ 8 ಅಧಿಕಾರಿಗಳನ್ನು ವಾರದ ಹಿಂದಷ್ಟೇ ಅಮಾನತು ಮಾಡಲಾಗಿದೆ. ಇದೀಗ ಹಿಪ್ಪರಗಿ ಬ್ಯಾರೇಜ್ ಯೋಜನಾ ವಿಭಾಗ, ಯೋಜನಾ ವಿಭಾಗ 1, ತುಂಗಭದ್ರಾ ಎಡದಂಡೆ ಕಾಲುವೆ ವಿಭಾಗ ನಂ.4ರ ಕಚೇರಿಗಳಲ್ಲಿ ಒಟ್ಟು 20 ನಕಲಿ ಬಿಲ್ಗಳನ್ನು ಸೃಷ್ಟಿಸಿ ಸುಮಾರು 11.72 ಕೋಟಿ ರೂ. ದುರುಪಯೋಗ ಪತ್ತೆ ಮಾಡಿದೆ. ಈ ಪ್ರಕರಣದಲ್ಲಿ 16 ಅಧಿಕಾರಿ, ನೌಕರರು, 6 ಗುತ್ತಿಗೆದಾರರ ವಿರುದ್ಧ ಕ್ರಮಕೈಗೊಳ್ಳಲಾಗಿದೆ. ಒಂಬತ್ತು ಮಂದಿ ನಿವೃತ್ತರಾಗಿದ್ದು, ಒಬ್ಬರು ನಿಧನರಾಗಿದ್ದಾರೆ. ಸದ್ಯ ಸರ್ಕಾರ ಇವರ ಬ್ಯಾಂಕ್ ಖಾತೆ ರದ್ದು ಮಾಡಲು ಹೇಳಿದೆ, ಜತೆಗೆ ಆಸ್ತಿ ಪರಭಾರೆಗೂ ತಡೆ ಹಾಕಿದೆ.
ತನಿಖಾ ಸಮಿತಿ ದಾಖಲಿಸಿದ್ದೇನು?: ನಿಯಮಾನುಸಾರ ಯಾವುದೆ ಬಿಲ್ಗಳ ಪಾವತಿಗೆ ಸಂಬಂಧಿಸಿದಂತೆ ಪಿಡಬ್ಲ್ಯುಡಿ ಎ ಕೋಡ್, ರಿ ವ್ಯಾಲಿ ಅಕೌಂಟಿಂಗ್ ಕೋಡ್, ಕಂಪನೀಸ್ ಆಕ್ಟ್ 1956, ಕೆಟಿಟಿಪಿ ಆಕ್ಟ್, ಕರ್ನಾಟಕ ಫೈನಾನ್ಸಿಯಲ್ ಕೋಡ್ ಮತ್ತು ಇನ್ನಿತರ ಕಾಯ್ದೆಗಳ ಪ್ರಕಾರ ಸರ್ಕಾರ ಹೊರಡಿಸಿದ ಆದೇಶಗಳನ್ನು ಪಾಲಿಸಿಲ್ಲ. ಕರ್ತವ್ಯ ಲೋಪ, ಕಾರ್ಯವಿಧಾನದಲ್ಲಿನ ವ್ಯತ್ಯಾಸ ಆಗಿವೆ. ಅಕ್ರಮ ವಾಗಿ ಹಣ ಸೆಳೆಯುವ ಸಂದರ್ಭ ಉಂಟಾಗಿದೆ.