ವಿಜಯಪುರ: ಐತಿಹಾಸಿಕ ಗುಮ್ಮಟ ನಗರಿಯಲ್ಲಿ ಗಾನ ಗಾರುಡಿಗ ದಿ. ಎಸ್.ಪಿ. ಬಾಲಸುಬ್ರಹ್ಮಣ್ಯಂ ಅವರ ಸ್ವರ ವೈಭವ ಇನ್ನೂ ಪ್ರತಿಧ್ವನಿಸುತ್ತಿದೆ. 2017ರ ಫೆ.8ರಂದು ವಿದ್ಯಾಭಾರತಿ ಶಾಲೆ ಸಹಾಯಧನದ ಪ್ರಯುಕ್ತ ಆಯೋಜಿಸಿದ್ದ ಸ್ವರ ವೈಭವ ಕಾರ್ಯಕ್ರಮದಲ್ಲಿ ಎಸ್ಪಿಬಿ ಭಾಗವಹಿಸಿದ್ದೇ ಜಿಲ್ಲೆಯ ಪಾಲಿಗೆ ಕೊನೆಯದ್ದು.
ಅಂದು ಡಾ.ಬಿ.ಆರ್. ಅಂಬೇಡ್ಕರ್ ಕ್ರೀಡಾಂಗಣದಲ್ಲಿ ಎಸ್ಪಿಬಿ ತಮ್ಮ ಗಾನಸುಧೆ ಹರಿಸಿದ್ದರು. ಸಾವಿರಾರು ಜನ ಎಸ್ಪಿಬಿ ಧ್ವನಿಮಾಧುರ್ಯಕ್ಕೆ ಮಾರುಹೋಗಿದ್ದರು. ಕನ್ನಡ, ತೆಲಗು, ತಮಿಳು ಭಾಷೆಯಲ್ಲಿ ಎಸ್ಪಿಬಿ ಗಾನ ಲಹರಿ ಮೊಳಗಿಸಿದ್ದರು. ಅಂಥ ಶ್ರೇಷ್ಠ ಗಾಯಕ ಇನ್ನಿಲ್ಲ ಎಂಬ ಸುದ್ದಿ ಕೇಳಿ ಗುಮ್ಮಟ ನಗರಿ ಜನ ದುಃಖದಲ್ಲಿ ಮುಳುಗಿದ್ದು, ಗುಮ್ಮಟದ ಗ್ಯಾಲರಿಯಲ್ಲೂ ಶೋಕಗೀತೆ ಮೊಳಗುತ್ತಿದೆ.
ಅಂದಿನ ಸ್ವರ ವೈಭವ ಕಾರ್ಯಕ್ರಮ ಆಯೋಜಿಸಿದ್ದ ಚಂದ್ರಶೇಖರ್ ಕವಟಗಿ, ಶರಣು ಸಬರದ, ಶಿವಾನಂದ ಭುಯ್ಯಾರ ಮತ್ತಿತರರು ಕಾರ್ಯಕ್ರಮ ನೆನೆದು ಎಸ್ಪಿಬಿ ಅವರ ಅಗಲಿಕೆ ಹಿನ್ನೆಲೆ ಕಂಬನಿ ಮಿಡಿದಿದ್ದಾರೆ.