Singer Sunitha Upadrashta
Singer Sunitha Upadrashta -
ಐಶ್ವರ್ಯಾ ರೈ ಬಚ್ಚನ್, ಸೌಂದರ್ಯ, ರತಾ, ನಯನತಾರಾ ಸೇರಿ 110 ನಟಿಯರಿಗೆ ಡಬ್ ಮಾಡಿರುವ, 750ಕ್ಕೂ ಹೆಚ್ಚು ಸಿನಿಮಾಗಳ ಹಾಡುಗಳಿಗೆ ಧ್ವನಿಯಾಗಿರುವ ಹೆಗ್ಗಳಿಕೆ ಗಾಯಕಿ, ಡಬ್ಬಿಂಗ್ ಕಲಾವಿದೆ ಸುನಿತಾ ಉಪದ್ರಷ್ಟಗೆ ಸಲ್ಲುತ್ತದೆ. ಮೂರು ದಶಕಗಳ ಕರಿಯರ್ನಲ್ಲಿ ಒಂಬತ್ತು ನಂದಿ ಪ್ರಶಸ್ತಿ ಮತ್ತು ಮೂರು ಫಿಲಂೇರ್ಗಳನ್ನು ಪಡೆದಿದ್ದಾರೆ. ಹೀಗೆ ತಮ್ಮ ಧ್ವನಿ ಮೂಲಕ ಮನೆ ಮಾತಾಗಿರುವ ಸುನಿತಾಗೆ ಅವರ ಮಾತೇ ಇದೀಗ ಮುಳ್ಳಾಗಿದೆ! ಹೌದು, ಇತ್ತೀಚೆಗಷ್ಟೆ ಫೆಮಿನಿಸಂ ಮತ್ತು ಲಿಂಗ ಸಮಾನತೆ ಕುರಿತು ಮಾತನಾಡುವಾಗ ಅವರು, ಫೆಮಿನಿಸಿಂ ಪ್ರತಿಪಾದಿಸುವವರು ಮೈ ಬಾಡಿ ಮೈ ಚಾಯ್ಸ್ (ನನ್ನ ದೇಹ ನನ್ನಿಷ್ಟ) ಸ್ಲೋಗನ್ ಹೇಳುವಂತೆಯೇ ಪುರುಷರು, ಹಿಸ್ ಐಸ್ ಹಿಸ್ ಚಾಯ್ಸ್ (ಅವನ ಕಣ್ಣು ಅವನಿಷ್ಟ)' ಎಂದಿದ್ದರು. ಜತೆಗೆ, "ಪುರುಷರು ಧೂಮಪಾನ ಮಾಡುತ್ತಾರೆ ಅಂತ ಹೆಣ್ಣುಮಕ್ಕಳೂ ಸಿಗರೇಟ್ ಸೇದಲು ಪ್ರಾರಂಭಿಸಿದರೆ ಸಮಾನತೆ ಬೆಳೆಯುವುದಿಲ್ಲ' ಎಂದು ನಕಲಿ ಸ್ತ್ರೀವಾದದ ಬಗ್ಗೆ ಅಸಮಾಧಾನ ವ್ಯಕ್ತಪಡಿಸಿದ್ದರು. ಆದರೆ, ಅವರ ಈ ಹೇಳಿಕೆಗಳು ಜಾಲತಾಣದಲ್ಲಿ ವೈರಲ್ ಆದ ಬೆನ್ನಲ್ಲೇ ನೆಟ್ಟಿಗರು, ಸುನಿತಾ ಮಾತನ್ನು ವಿರೋಧಿಸಿದ್ದರು. ಹೀಗಾಗಿ ಈಗ ಗಾಯಕಿ ತಮ್ಮ ಮಾತುಗಳ ಬಗ್ಗೆ ಸ್ಪಷ್ಟನೆ ನೀಡಿದ್ದಾರೆ. "ನಾನು ಕೋಪ ಮತ್ತು ಹತಾಷೆಯಲ್ಲಿ ಹೇಳಿದ ಮಾತುಗಳು ವೈರಲ್ ಆಗಿವೆ. ನಾನು ಲಿಂಗ ಸಮಾನತೆ, ಸಮಾನ ಅವಕಾಶ, ಗೌರವ, ಹಕ್ಕುಗಳ ಪರ ಧ್ವನಿ ಎತ್ತಿದ್ದೇನೆಯೇ ಹೊರತು ಮತ್ತೊಬ್ಬ ಮಹಿಳೆಯ ಬಗ್ಗೆ ಅವಹೇಳನ ಮಾಡಿಲ್ಲ' ಎಂದಿದ್ದಾರೆ. ಆದರೆ, ಸದ್ಯ ಸುನಿತಾ ಪರ ಮತ್ತು ವಿರೋಧದ ಚರ್ಚೆಗಳು ಜಾಲತಾಣದಲ್ಲಿ ಮುಂದುವರಿದಿವೆ.