ಕೊಲೊಂಬೊ: ಕರೊನಾ ವಿರುದ್ಧ ಹೋರಾಟದಲ್ಲಿ ಶ್ರೀಲಂಕಾಗೆ ಸಹಾಯಾರ್ಥವಾಗಿ 5 ಲಕ್ಷ ಕೋವಿಶೀಲ್ಡ್ ಲಸಿಕೆಗಳ ಡೋಸ್ಗಳು ಇಂದು ಭಾರತದಿಂದ ಲಂಕಾಗೆ ಆಗಮಿಸಿವೆ ಎಂದು ಶ್ರೀಲಂಕಾದಲ್ಲಿನ ಭಾರತದ ಹೈಕಮಿಷನ್ ಟ್ವೀಟ್ ಮಾಡಿದೆ. ಈ ಲಸಿಕೆಗಳನ್ನು ನಾಳೆಯಿಂದ ವಿವಿಧ ಪ್ರದೇಶಗಳಿಗೆ ವಿತರಿಸಲಾಗುವುದು ಎನ್ನಲಾಗಿದೆ.
ಹೀಗೆ ಲಸಿಕೆಯನ್ನು ಅಂತರಾಷ್ಟ್ರೀಯ ಸಹಕಾರ ಒಪ್ಪಂದವಾದ ಕೋವಾಕ್ಸ್ ಕಾರ್ಯಕ್ರಮದ ಅಡಿ ಪಡೆಯಲಾಗಿದೆ. ಶ್ರೀಲಂಕಾ ಸರ್ಕಾರದ ಆರೋಗ್ಯ ಸಚಿವರಾದ ಚನ್ನ ಜಯಸುಮನ ಕೋವಿಶೀಲ್ಡ್ ಲಸಿಕೆಯ 5 ಲಕ್ಷ ಡೋಸ್ಗಳು ತಲುಪಿರುವ ಬಗ್ಗೆ ಗುರುವಾರ ಮಾಹಿತಿ ನೀಡಿದ್ದಾರೆ. ಶ್ರೀಲಂಕಾದ ಸ್ಟೇಟ್ ಫಾರ್ಮಸಿಟಿಕಲ್ಸ್ ಕಾರ್ಪೊರೇಷನ್ ಮತ್ತು ಭಾರತದ ಸೀರಮ್ ಇನ್ಸ್ಟಿಟ್ಯೂಟ್ ನಡುವೆ ಆಗಿರುವ ಒಪ್ಪಂದದ ಅನುಸಾರವಾಗಿ ಈ ಹೊಸ ಕಂತಿನ ಲಸಿಕೆಗಳಿಗೆ ಆರ್ಡರ್ ನೀಡಲಾಗಿತ್ತು ಎಂದು ತಿಳಿಸಿದ್ದಾರೆ.
ಜನವರಿಯಲ್ಲಿ ಶ್ರೀಲಂಕಾಗೆ ಕರೊನಾ ಲಸಿಕೆಯ 5 ಲಕ್ಷ ಡೋಸ್ಗಳ ಮೊದಲ ಕಂತನ್ನು ಭಾರತ ಉಡುಗೊರೆಯಾಗಿ ನೀಡಿತ್ತು. ತನ್ಮೂಲಕ ಲಂಕಾ ತನ್ನ ಲಸಿಕಾ ಅಭಿಯಾನವನ್ನು ಆರಂಭಿಸಿದ್ದು, ಮುಂಚೂಣಿ ಕಾರ್ಯಕರ್ತರಿಗೆ ಮತ್ತು ಸುರಕ್ಷಾ ಸಿಬ್ಬಂದಿಗೆ ಲಸಿಕೆಯನ್ನು ನೀಡಲಾಗಿತ್ತು. ಶ್ರೀಲಂಕದಲ್ಲಿ ಈವರೆಗೂ 80,500 ಕರೊನಾ ಪ್ರಕರಣಗಳು ವರದಿಯಾಗಿದ್ದು, 450 ಸಾವುಗಳು ಸಂಭವಿಸಿವೆ.
ಶ್ರೀಲಂಕಾ ಜೊತೆಗೆ ಭೂತಾನ್, ಮಾಲ್ಡೀವ್ಸ್, ಬಾಂಗ್ಲಾದೇಶ, ನೇಪಾಳ, ಮ್ಯಾನ್ಮಾರ್ ಮತ್ತು ಸೀಶೆಲ್ಸ್, ಅಫ್ಘಾನಿಸ್ತಾನ ಮತ್ತು ಮಾರಿಷಸ್ ದೇಶಗಳಿಗೆ ಕೂಡ ಕರೊನಾ ಲಸಿಕೆಗಳನ್ನು ಅನುದಾನದ ರೀತಿಯಲ್ಲಿ ಭಾರತ ನೀಡುತ್ತಿದೆ. ಭಾರತವು ವಿಶ್ವದ ಅತಿದೊಡ್ಡ ಔಷಧ ತಯಾರಕರಲ್ಲಿ ಒಂದಾಗಿದ್ದು, ಅನೇಕ ದೇಶಗಳು ಈಗಾಗಲೇ ಕರೊನಾ ಲಸಿಕೆಗಾಗಿ ಭಾರತದೊಂದಿಗೆ ಮಾತುಕತೆ ನಡೆಸುತ್ತಿವೆ.(ಏಜೆನ್ಸೀಸ್)
ಕ್ಷಣಕ್ಷಣದ ಮಾಹಿತಿಗಾಗಿ ವಿಜಯವಾಣಿ ಫೇಸ್ಬುಕ್ ಪೇಜ್ ಲೈಕ್ ಮಾಡಿ